ជាតិ
នយោបាយជាតិ
ឯ.ឧ សម រង្ស៊ី និង ឯ.ឧ កឹម សុខា សុទ្ធតែអះអាងថា «តំណែងមិនសំខាន់ទេ»
× ភ្នំពេញ៖ «តំណែងមិនសំខាន់ទេ» ។ នេះគឺជាការអះអាងរបស់ឯកឧត្តម សម រង្ស៊ី នៅហ្វេសប៊ុកខ្លួនប៉ុន្មានម៉ោងប៉ុណ្ណោះ បន្ទាប់ពីឯកឧត្តម កឹម សុខា បានលើកឡើងនៅក្នុងកិច្ចប្រជុំពេញអង្គក្នុងរដ្ឋសភា។
តាមរយៈហ្វេសប៊ុកដែលឯកឧត្តម សម រង្ស៊ី បានបង្ហាញជំហរខ្លួន ក្រោយពីអនុប្រធានគណបក្សសង្គ្រោះជាតិ ឯកឧត្តម កឹម សុខា ត្រូវបានរដ្ឋសភាទទួលស្គាល់ជាប្រធានក្រុមមតិភាគតិចផង និងជាប្រធានក្រុមតំណាងរាស្ត្រគណបក្សសង្គ្រោះជាតិនៅក្នុងរដ្ឋសភាផងនោះថា ៖«អ្វីដែលសំខាន់គឺភាពទៀងត្រង់ និងភាពថ្លៃថ្នូររបស់យើងម្នាក់ៗ»។ ត្រង់ចំណុចនេះប្រធានគណបក្សប្រឆាំងដែលត្រូវបានរដ្ឋាភិបាលហាមមិនឲ្យចូលស្រុករូបនេះ បានសរសេរដូច្នេះថា៖«តែខ្ញុំសម រង្ស៊ី នៅតែ សម រង្ស៊ី ដដែល ហើយភាពស្មោះត្រង់របស់ខ្ញុំចំពោះប្រជារាស្ត្រខ្មែរ នៅតែស្មោះត្រង់ជានិច្ច រហូតដល់ដង្ហើមចុងក្រោយរបស់ខ្ញុំ។ ខ្ញុំយល់ព្រមធ្វើអ្វីៗទាំងអស់ ឲ្យតែប្រទេសជាតិយើងបាននៅគង់វង្ស និងឆ្ពោះទៅរកភាពរុងរឿង»។
ការលើកឡើងរបស់ឯកឧត្តម សម រង្ស៊ី អមជាមួយរូបថតមួយសន្លឹករវាងរូបលោក និងឯកឧត្តម កឹម សុខា ដែលអង្គុយជាមួយគ្នានៅក្នុងព្រះបរមរាជវាំង កាលពីតំណាងរាស្ត្រគណបក្សប្រឆាំងចូលស្បថកាន់តួនាទីនោះ ហាក់ដូចជាមិនឃ្លាតឆ្ងាយពីការអះអាងរបស់ឯកឧត្តម កឹម សុខា នៅក្នុងកិច្ចប្រជុំពេញអង្គរដ្ឋសភានៅថ្ងៃទី៧ ធ្នូនេះឡើយ។ ឯកឧត្តម កឹម សុខា ដែលទើបទទួលបានតំណែងពីរថ្មីនៅក្នុងរដ្ឋសភា បានក្រោកឈរអត្ថាធិប្បាយអំពីភាពចម្រូងចម្រាសនៃតំណែងនេះដូច្នេះថា៖« ចំពោះតំណែង ឬតួនាទី វាគ្រាន់តែជាមធ្យោបាយសម្រាប់យើងធ្វើដំណើរទៅរកគោលដៅប៉ុណ្ណោះ។ តែទោះបីតួនាទី ធំ ប៉ុណ្ណាក៏ដោយ តែបើយើងដើរខុសគោលដៅ ក៏យើងមិនអាចជោគជ័យដែរ»។
ឯកឧត្តម សុខា បន្ថែមបែបនេះថា៖«យើងត្រូវដោះស្រាយបញ្ហាជាមួយខ្មែរនឹងខ្មែរ។ ថ្ងៃនេះជាថ្ងៃចាប់ផ្តើម យើងត្រូវប្រុងប្រយ័ត្ន កុំឲ្យមានការរំខានណាមួយ ដែលធ្វើឲ្យដំណើរការរបស់យើងមិនឲ្យដល់គោលដៅ។ គោលដៅ គឺឯកភាពជាតិ សន្តិភាព និងអភិវឌ្ឍសម្រាប់ជាតិ ប្រជាពលរដ្ឋយើង»៕
© រក្សាសិទ្ធិដោយ thmeythmey.com