ជាតិ
លោកស៊ាង ចែត ចេញពីពន្ធនាគារហើយ ![](https://image.thmeythmey.com/pictures/2016/12/08/seang_chet_cssredit_.jpg)
×![]()
លោក ស៊ាង ចែត បានចេញពីពន្ធនាគារហើយ ព្រឹកថ្ងៃទី៨ ខែធ្នូនេះ។ លោក ស៊ាង ចែត ត្រូវបាន ព្រះមហាក្សត្រលើកលែងទោស តាមសំណើរបស់សម្ដេចនាយករដ្ឋមន្ត្រី ហ៊ុន សែន។
លោក ស៊ាង ចែត មេឃុំគណបក្សសម រង្ស៊ី ត្រូវបានអាជ្ញាធរដោះលែងឲ្យមានសេរីភាព នៅព្រឹកថ្ងៃទី ៨ ខែធ្នូនេះ មួយថ្ងៃក្រោយព្រះរាជទានលើកលែងទោសពីព្រះមហាក្សត្រតាមសំណើរបស់នាយករដ្ឋមន្ត្រី។
លោក ស៊ាង ចែត ជាមេឃុំស្រក ស្រុកកំពង់សៀម ខេត្តកំពង់ចាម ត្រូវសាលាដំបូងរាជធានីភ្នំពេញ ផ្តន្ទាទោសឲ្យជាប់ពន្ធនាគារ៥ឆ្នាំ ពីបទចោទសូកប៉ាន់សាក្សី តាមមាត្រា៥៤៨នៃក្រមព្រហ្មទណ្ឌ ពាក់ព័ន្ធនឹងរឿងរ៉ាវរបស់កញ្ញា ខុម ចន្ទតារ៉ាទី ហៅស្រីមុំ ជាមួយនឹងឯកឧត្តម កឹម សុខា អនុប្រធានគណបក្សសង្គ្រោះជាតិ។ រឿងនេះបានផ្ទុះឡើង បន្ទាប់ពីស្រីមុំសរសេរលិខិតចំហមួយច្បាប់ ហើយលាតត្រដាងជាសាធារណៈ ក្នុងអំឡុងខែមេសា ឆ្នាំ២០១៦ ដោយចោទលោក ស៊ាង ចែត ថាបានយកប្រាក់ចំនួន ៥០០ ដុល្លារ ទៅសូកម្តាយរបស់នាង។ ស្រីមុំ បានបញ្ជាក់ក្នុងលិខិតនោះថា លោក ស៊ាង ចែត មេឃុំគណបក្សសម រង្ស៊ីរូបនេះ បានប្រើប្រាស់ទឹកប្រាក់ទាំងនោះ ដើម្បីបញ្ចុះបញ្ចូលម្តាយ ឲ្យលួងលោមរូបនាង កុំឲ្យនិយាយការពិត ពីរឿងអាស្រូវរបស់នាង ជាមួយនឹងឯកឧត្តម កឹម សុខា។ ដោយសារតែលិខិតនេះ ទើបលោក ស៊ាង ចែត ត្រូវបានឃាត់ខ្លួន កាលពីអំឡុងខែមេសា ឆ្នាំ២០១៦ ។
ក្រៅពីលោក ស៊ាង ចែត នៅមានមន្ត្រីការពារសិទ្ធិមនុស្សនៃសមាគមអាដហុកបួនរូប និងអគ្គលេខាធិការរងនៃគណៈកម្មាធិការជាតិរៀបចំការបោះឆ្នោតមួយរូប កំពុងជាប់ពន្ធនាគារផងដែរ ដោយសារតែរឿងរ៉ាវរបស់ស្រីមុំ។
ការលើកលែងទោសមេឃុំ ស៊ាង ចែត ធ្វើឡើងបន្ទាប់ពីមានជំនួបរវាងប្រធានក្រុមតំណាងរាស្ត្រមតិភាគច្រើន និងប្រធានក្រុមតំណាងរាស្ត្រមតិភាគនៅក្នុងរដ្ឋសភាកាលពី រសៀលថ្ងៃទី៧ ខែធ្នូ។ សម្តេច ស ខេង បានបញ្ជាក់ប្រាប់អ្នកសារព័ត៌មានក្រោយជំនួបនោះថា ភាគីទាំងពីរបានជជែកគ្នា ពីការស្នើឲ្យដោះលែងមេឃុំគណបក្សសម រង្ស៊ី លោក ស៊ាង ចែត និងបញ្ហាមន្ត្រី គ.ជ.ប ព្រមទាំងមន្ត្រីអង្គការក្រៅរដ្ឋាភិបាលដែលកំពុងជាប់ពន្ធនាគារ។ ប្រធានក្រុមតំណាងរាស្ត្រមតិភាគច្រើនរូបនេះ បន្តថា បញ្ហាទាំងនោះ អាចនឹងត្រូវដោះស្រាយនៅក្នុងចុងខែនេះ ប៉ុន្តែមិនបញ្ជាក់ថា ត្រូវដោះស្រាយដោយការលើកលែងទោស ឬបែបណាទេ៕
Tag:
ព្រះមហាក្សត្រ
ស៊ាង ចែត
© រក្សាសិទ្ធិដោយ thmeythmey.com