អន្តរជាតិ
ចិន៖ រឿងដែលថាចិនប្រើលុយពីក្រោយការផ្តាច់ចំណងការទូតប្រទេសនៅអាហ្វ្រិក និងតៃវ៉ាន់ «គឺជារឿងប្រឌិត» អ្នកនាំពាក្យក្រសួងការបរទេសចិន លោកស្រី Hua Chunying
× រដ្ឋាភិបាលក្រុងប៉េកាំង បានអះអាងថា មិនមានការសន្យាផ្តល់ជំនួយហិរញ្ញវត្ថុពីក្រោយនៃការផ្តាច់ទំនាក់ទំនងការទូតរវាងរដ្ឋអាហ្រិ្វក Sao Tome and Principe និងកោះតៃវ៉ាន់ឡើយ។ ក្រុងប៉េកាំង អះអាងថា «គោលនយោបាយចិនតែមួយ» ត្រូវបានទទួលស្គាល់ជាសកលពីសហគមន៍អន្តរជាតិទៅហើយ។
ឆ្លើយតបនឹងសំណួរ«ថាតើរដ្ឋាភិបាលចិន មានបានសន្យាផ្តល់ជំនួយហិរញ្ញវត្ថុទៅកាន់រដ្ឋាភិបាល Sao Tome and Principe ដើម្បីផ្តាច់ចំណងការទូតជាមួយនឹងតៃវ៉ាន់ឬអត់?» អ្នកនាំពាក្យក្រសួងការបរទេសចិន បានឆ្លើយយ៉ាងខ្លីវិញថា«នោះគឺជាប្រឌិតនោះទេ»។ ការលើកឡើងបែបនេះ ត្រូវបានធ្វើឡើងនាសន្និសីទសារព័ត៌មានប្រចាំថ្ងៃរបស់ក្រសួងការបរទេសចិន នៅថ្ងៃទី២១ ធ្នូ។
ឱកាសដដែលនោះដែរ លោកស្រីអ្នកនាំពាក្យក្រសួងការបរទេសចិន Hua Chunying ក៏បានសង្កត់ធ្ងន់ទៀតថា៖«ចិន មានតែមួយនោះទេនៅលើពិភពលោក ហើយតៃវ៉ាន់ គឺជាផ្នែកមួយរបស់ចិនដែលមិនអាចផ្ទេរទៅណាបានឡើយ»។ លោកស្រី បន្ថែមទៀតថា គោលនយោបាយចិនតែមួយ ដែលបានទទួលស្គាល់តាមរយៈសេចក្តីសម្រេចលេខ ២៧៥៨ របស់អង្គការសហប្រជាជាតិ បានក្លាយជាឯកច្ឆន្ទមួយទូទៅរបស់សហគមន៍អន្តរជាតិទៅហើយ។
សូមរម្លឹកផងដែរថា ប្រទេសកោះអាហ្វ្រិក Sao Tome and Principe នៅថ្ងៃទី២០ ធ្នូ បានប្រកាសជាផ្លូវការក្នុងការផ្តាច់ទំនាក់ទំនងការទូតជាមួយនឹងតៃវ៉ាន់ ហើយទទួលស្គាល់អធិបតេយ្យរបស់សាធារណៈរដ្ឋប្រជាមានិតចិន។ Sao Tome and Principe គឺជាប្រទេសទីមួយហើយ ដែលបានប្រកាសផ្តាច់ទំនាក់ទំនងការទូតជាមួយនឹងកោះតែវ៉ាន់ ក្រោយលោកស្រីប្រធានាធិបតី Tsai Ing-wen ឡើងកាន់អំណាចនោះ។
អ្វីគួរកត់សម្គាល់នោះ នៅក្នុងថ្ងៃដដែលនៃការប្រកាសនោះ រដ្ឋមន្ត្រីការបរទេសតៃវ៉ាន់ David Lee បានថ្លែងរិះគន់ក្រុងប៉េកាំង ដែលចូលចិត្តប្រើទឹកលុយរបស់ខ្លួន ហើយតៃវ៉ាន់នឹងមិនប្រឡូកនយោបាយប្រាក់ដុល្លាររបស់ចិនទេ។ ក្នុងសន្និសីទកាសែតមួយ ប្រមុខការទូតតៃវ៉ាន់រូបនេះនិយាយថា រដ្ឋាភិបាលក្រុងប៉េកាំង មិនគួរយកឆក់ឱកាសនៃការខ្វះខាតហិរញ្ញវត្ថុរបស់ Sao Tome and Principe ដើម្បីអនុវត្តនយោបាយចិនតែមួយឡើយ។
គិតចាប់ពីកោះតៃវ៉ាន់ បានផ្តាច់ពីចិននៅឆ្នាំ១៩៤៩ តៃវ៉ាន់ មានទំនាក់ទំនងការទូតជាមួយនឹងប្រទេសប្រមាណ២១ប៉ុណ្ណោះ ហើយភាគច្រើននៃប្រទេសទាំង២១ ដែលបន្តទំនាក់ទំនងជាមួយតៃវ៉ាន់ គឺមកពីតំបន់អាមេរិកឡាទីន ខណៈនៅទ្វីបអាហ្វ្រិកមានតែប្រទេសប៉ុណ្ណោះ គឺស្វាស៊ីឡង់ និងបួគីណាហ្វាសូ។
ជុំវិញចំណងការទូតដែលតៃវ៉ាន់សេសសល់នេះដែរ លោក David Lee បានអះអាងថា តៃវ៉ាន់ សល់សម្ព័ន្ធមិត្តតែ២១ប្រទេស ដូច្នេះយើងត្រូវរក្សាឲ្យបាន។ កោះតៃវ៉ាន់ និងក្រុងប៉េកាំង បានព្យាយាមទាក់ទាញសម្ព័ន្ធមិត្តរបស់គ្នាទៅវិញទៅមក តាមរយៈការសន្យាផ្ដល់ជំនួយអភិវឌ្ឍសម្រាប់ប្រទេសកំពុងក្រីក្រ ប៉ុន្តែតៃវ៉ាន់ មិនអាចប្រជែងជាមួយអំណាចទឹកប្រាក់សន្ធឹកសន្ធាប់របស់ចិនឡើយ។ ថ្មីៗនេះ ចិន ទើបតែបានស្ដារទំនាក់ទំនងការទូតជាមួយហ្កំប៊ី ក្នុងខែមីនា។ រដ្ឋអាហ្វ្រិកហ្កំប៊ី បានផ្ដាច់ចំណងការទូតជាមួយតៃវ៉ាន់តាំងពីឆ្នាំ២០១៣មកម្ល៉េះ៕
© រក្សាសិទ្ធិដោយ thmeythmey.com