ជាតិ
ក្រសួងជ្រើសរើសនិស្សិតស្ម័គ្រចិត្តឲ្យជួយបង្កើត និងគាំទ្រក្លិបគណិតវិទ្យា និងវិទ្យាសាស្ត្រ តាមវិទ្យាល័យ ![](https://image.thmeythmey.com/pictures/2017/01/20/club_study.jpg)
×![]()
ភ្នំពេញ៖ ក្រសួងអប់រំ យុវជន និងកីឡា ប្រកាសជ្រើសរើសនិស្សិតស្ម័គ្រចិត្ត ចំនួន៣០០នាក់ ដើម្បីជួយបង្កើត និងគាំទ្រក្លិបសិក្សាមុខវិជ្ជា គណិតវិទ្យា រូបវិទ្យា និងគីមីវិទ្យា នៅតាមអនុវិទ្យាល័យ និងវិទ្យាល័យ។ ការជ្រើសរើសនោះ ផ្ដោតទៅលើនិស្សិតដែលកំពុងសិក្សាឯកទេសគណិតវិទ្យា រូបវិទ្យា និងគីមីវទ្យាតែប៉ុណ្ណោះ។ នេះបើតាមសេចក្ដីជូនដំណឹងរបស់ក្រសួងអប់រំ។
បើផ្អែកតាមសេចក្ដីជូនដំណឹងរបស់ក្រសួងអប់រំ កាលពីថ្ងៃទី១៩ មករា ក្រសួង ត្រូវការជ្រើសរើសនិស្សិតស្ម័គ្រចិត្ត ចំនួន៣០០នាក់ ក្នុងការបង្កើត និងគាំទ្រក្លិបសិក្សានិងស្វ័យសិក្សាមុខវិជ្ជាគណិតវិទ្យា រូបវិទ្យា និងគីមីវិទ្យា របស់សិស្សកំពុងសិក្សា នៅតាមអនុវិទ្យាល័យ និងវិទ្យាល័យ។ ការបង្កើតក្លិបនេះ ដើម្បីជួយឲ្យកំណែទម្រង់វិស័យអប់រំមួយនេះ ពង្រឹងគុណភាពនិងប្រសិទ្ធភាពនៃការអប់រំ ការបណ្ដុះបណ្ដាល និងការកសាងសមត្ថភាព ឲ្យកាន់តែទទួលបានភាពជោគជ័យបន្ថែមទៀត។
ជាមួយគ្នានេះ និស្សិតស្ម័គ្រចិត្តទាំងអស់ នឹងទទួលបានអត្ថប្រយោជន៍ ក្នុងការបណ្ដុះបណ្ដាលបន្ថែម និងមានឱកាសពង្រឹងចំណេះដឹង និងបទពិសោធន៍ ជំនាញឯកទេស ជំនាញទន់ និងគុណធម៌ជាដើម។ បន្ថែមលើនេះ នឹងទទួលបានការចូលរួមចំណែក និងចូលរួមវិភាគទាន ក្នុងការជួយសហគមន៍ ការអភិវឌ្ឍការអប់រំ ការគាំទ្រការលើកទឹកចិត្តពីក្រសួងអប់រំ និងដៃគូអភិវឌ្ឍជាតិ និងអន្តរជាតិ។ ជាពិសេសទទួលបានលិខិតបញ្ជាក់លិខិតសរសើរ ឬរង្វាន់លើកទឹកចិត្តផ្សេងៗពីក្រសួងអប់រំ។
ជាការកត់សម្គាល់លក្ខខណ្ឌក្នុងការជ្រើសរើស និស្សិតស្ម័គ្រទាំងអស់ត្រូវជានិស្សិតកំពុងសិក្សាជំនាញឯកទេសគណិតវិទ្យា រូបវិទ្យា និងគីមីវិទ្យា នៅតាមគ្រឹះស្ថានអប់រំផ្សេងៗ និងត្រូវមានមធ្យោបាយធ្វើដំណើរផ្ទាល់ខ្លួន។ ម្យ៉ាងទៀត ត្រូវមានឆន្ទះ និងការប្ដេជ្ញាចិត្តខ្ពស់ និងមានពេលវេលាទំនេរនៅថ្ងៃសៅរ៍ ឬថ្ងៃអាទិត្យ ឬមានពេលទំនេរនៅពេលល្ងាចពីចន្ទ ដល់សុក្រ។
សម្រាប់និស្សិតដែលមានចំណាប់អារម្មណ៍ អាចមកចុះឈ្មោះនៅនាយកដ្ឋានស្រាវជ្រាវវិទ្យាសាស្ត្រនៃក្រសួងអប់រំ។ ចំពោះការទទួលពាក្យ នឹងចាប់ផ្ដើមពីថ្ងៃផ្សាយដំណឹងនេះ រហូតដល់ថ្ងៃទី៣១ ខែមករា ឆ្នាំ២០១៧ វេលាម៉ោង ៥ល្ងាច។ និស្សិតស្ម័គ្រចិត្ត ក៏អាចចូលទៅកាន់ https://goo.gl/forms/DocEZO4guq8XnhJq2 ដើម្បីចុះឈ្មោះ។ សម្រាប់ព័ត៌មានលម្អិត ទំនាក់ទំនងលេខទូរសព្ទ ០១៥ ៧៦៣ ៣៩៦/ ០៨៥ ៩៥ ៧៧៧៧ / ០៣១ ៦៦៦៦ ៨៤៧ ឬ អ៊ីម៉ែល៖ [email protected]/[email protected]/[email protected]៕
© រក្សាសិទ្ធិដោយ thmeythmey.com