លោក សួន វិសាល ប្តេជ្ញាជំរុញក្តេរិ៍ឈ្មោះមេធាវីកម្ពុជាទៅលើឆាកអន្តរជាតិថែមទៀត

ជាតិ

លោក សួន វិសាល ប្តេជ្ញាជំរុញក្តេរិ៍ឈ្មោះមេធាវីកម្ពុជាទៅលើឆាកអន្តរជាតិថែមទៀត

20, Jan 2017 , 10:19 pm

រូបភាព

រូបថតគណៈមេធាវីកម្ពុជា

ដោយ:

ភ្នំពេញ៖ លោក សួន វិសាល បានទទួលត្រាប្រធានគណៈមេធាវីថ្មីក្នុងអាណត្តិទី ១១ ជាផ្លូវការ នៅថ្ងៃទី១៩ ខែមករា ឆ្នាំ២០១៧នេះ។ ហើយ លោកបានប្តេជ្ញាជំរុញកេរ្តិ៍ឈ្មោះមេធាវីដែលមានតួនាទីសំខាន់ក្នុងប្រព័ន្ធយុត្តិធម៌ឲ្យលេចធ្លោទាំងក្នុង និងក្រៅប្រទេសកាន់តែប្រសើរ។

លោកមេធាវីវ័យ ៥១ឆ្នាំ ដែលមានបទពិសោធន៍ផ្នែកច្បាប់ជាង ២០ឆ្នាំរូបនេះ បានចេញ វិធានការ ៤ចំណុច ក្នុងគោលដៅពង្រឹងគណៈមេធាវីកម្ពុជាថែមទៀត ពិសេសគឺ កែប្រព័ន្ធបណ្តុះបណ្តាលមេធាវីថ្មី។

ក្រៅពីការជំរុញកេរ្តិ៍ឈ្មោះមេធាវី លោកបានថ្លែងក្នុងពិធីទទួលតំណែងប្រធានគណៈមេធាវីអាណត្តិទី១១ និងពិធីចែកវិញ្ញាបនបត្រសម្បទាខាងវិជ្ជាជីវៈមេធាវីដល់សិស្សមេធាវីជំនាន់ទី១៣ និងទី១៤ជាង ៣០០នាក់ថា នឹងធានាការពារកូនក្តីទាំងជនរងគ្រោះ និងជនជាប់ចោទ ពិសេសការពារជនក្រីក្រតាមច្បាប់ ដើម្បីលើកកម្ពស់នីតិរដ្ឋនៅកម្ពុជា។

លោក សួន វិសាល បានក្លាយជាប្រធានគណៈមេធាវីថ្មីសម្រាប់អាណត្តិទី ១១ ជំនួសតំណែងលោក ប៊ុន ហុន ជាប្រធានចាស់ដែលធ្លាប់បានជាប់ឆ្នោតជាប្រធាន ២ អាណត្តិជាប់គ្នា។ លោក សួន វិសាល បានទទួលសំឡេងបោះឆ្នោត ៦២២ សំឡេង ចំណោមបេក្ខជន៤រូប ពីអ្នកចូលរួមបោះឆ្នោតសរុប ៧៨៨នាក់ ក្នុងអង្គមហាសន្និបាតលើកទី ២១ របស់គណៈមេធាវីនៃព្រះរាជាណាចក្រកម្ពុជា កាលពីខែតុលា ឆ្នាំ២០១៦ កន្លងទៅ៕