អគ្គនាយកដ្ឋានពន្ធដារ ឲ្យសហគ្រាសកែតម្រូវលិខិតប្រកាសពន្ធដែលមិនត្រឹមត្រូវដើម្បីរួចទោស

ជាតិ

សេដ្ឋកិច្ច

អគ្គនាយកដ្ឋានពន្ធដារ ឲ្យសហគ្រាសកែតម្រូវលិខិតប្រកាសពន្ធដែលមិនត្រឹមត្រូវដើម្បីរួចទោស

21, Jan 2017 , 4:19 pm

រូបភាព

ដោយ:

ភ្នំពេញ៖ អគ្គនាយកដ្ឋានពន្ធដារ ប្រកាសឲ្យសហគ្រាសចូលខ្លួនធ្វើការកែតម្រូវដោយស្ម័គ្រចិត្តនូវបញ្ជិកាគណនេយ្យ និងលិខិតប្រកាសពន្ធរបស់ខ្លួនឲ្យបានត្រឹមត្រូវ មុនថ្ងៃទី១ ខែមេសាឆ្នាំ២០១៧ ដើម្បីរួចទោសទណ្ឌនានា។ នេះបើតាមសេចក្ដីជូនដំណឹងរបស់អគ្គនាយកដ្ឋានពន្ធដារ ចុះថ្ងៃទី១៩ខែមករា។

អគ្គនាយកដ្ឋានពន្ធដារ បានអះអាងតាមរយៈសេចក្ដីជូនដំណឹងខាងលើនេះថា ការកាន់កាប់បញ្ជិកាគណនេយ្យរបស់សហគ្រាសមួយចំនួនមិនទាន់ត្រឹមត្រូវតាមច្បាប់នៅឡើយ ដែលនឹងជះឥទ្ធិពលដល់ការគោរពច្បាប់ស្ដីពីពន្ធដារ និងជាហេតុនាំឲ្យសហគ្រាសទាំងនោះ ត្រូវទទួលរងនូវទោសទណ្ឌនានាតាមច្បាប់ ព្រមទាំងប៉ះពាល់ដល់ការប្រមូលចំណូលរដ្ឋ។

កន្លងមកអគ្គនាយកដ្ឋានពន្ធដារ បានណែនាំនិងជំរុញឲ្យសហគ្រាសមកធ្វើការកែតម្រូវបញ្ជិកាគណនេយ្យនិងលិខិតប្រកាសបង់ពន្ធឡើងវិញឲ្យបានត្រឹមត្រូវ។ សេចក្ដីជូនដំណឹងដដែលបញ្ជាក់ថា មានសហគ្រាសមួយចំនួនបានមកកែតម្រូវបញ្ជិកាគណនេយ្យនិងលិខិតប្រកាសពន្ធឡើងវិញតាមការស្ម័គ្រចិត្ត ប៉ុន្តែសហគ្រាសមួយចំនួនទៀតដែលមានបញ្ហាដូចគ្នាដែរនេះ នៅមិនទាន់ហ៊ានចូលខ្លួនមកធ្វើការកែតម្រូវលិខិតប្រកាសពន្ធឡើយ ដោយហេតុថានឹងត្រូវទទួលរងនូវទោសទណ្ឌនានា។

ដើម្បីពង្រឹងការប្រមូលចំណូលសារពើពន្ធឲ្យមានប្រសិទ្ធភាព និងតម្លាភាព អគ្គនាយកដ្ឋានពន្ធដារសម្រេចលើកទឹកចិត្តដោយអនុគ្រោះលើកលែងទោសទណ្ឌនានា ចំពោះសហគ្រាសណាដែលស្ម័គ្រចិត្តចូលខ្លួនមកកែតម្រូវបញ្ជិកាគណនេយ្យនិងលិខិតប្រកាសពន្ធឡើងវិញយ៉ាងតិចរយៈពេល៣ឆ្នាំថយក្រោយ ឲ្យបានមុនថ្ងៃទី១ខែមេសាឆ្នាំ២០១៧ ។ ក្នុងករណីសវនករនៃអគ្គនាយកដ្ឋានពន្ធដាររកឃើញថា មានប្រាក់ពន្ធត្រូវបង់បន្ថែម ក្នុងអំឡុងពេលធ្វើសវនកម្ម សហគ្រាសទាំងនោះនឹងមិនទទួលបានការលើកទឹកចិត្តនេះទេ។ នេះបើតាមសេចក្ដីជូនដំណឹងខាងលើ៕