អន្តរជាតិ
នយោបាយអន្តរជាតិ
ស្បថចូលភា្លម ត្រាំ ប្រើអំណាចប្រតិបត្តិបើកផ្លូវដើម្បីលុបប្រព័ន្ធសុខាភិបាលអូបាម៉ា ![ប្រភព៖ Getty image](https://image.thmeythmey.com/pictures/2017/01/21/trump.jpg)
ប្រភព៖ Getty image
×![]()
ដូចរំពឹងទុក ប្រធានាធិបតីទី៤៥ ដែលទើបបានអំណាចពេញដៃក្តៅៗ បានចុះហត្ថលេខាលើបញ្ជាប្រតិបត្តិ (executive order) ដើម្បីកាត់បន្ថយការចំណាយរបស់រដ្ឋលើច្បាប់ធានារ៉ាប់រងសុខភាពរបស់លោក អូបាម៉ា (Obamacare)។ គេវាយតម្លៃថា គាស់រំលើងមរតកនយោបាយរបស់លោក បារ៉ាក់ អូបាម៉ា ប្រហែលជាបំណងធំបំផុតរបស់រដ្ឋបាលថ្មីនេះ។
ក្រោយស្បថចូលកាន់តំណែងមិនបានទាន់បានប៉ុន្មានម៉ោងផង បុរសមានឥទ្ធិពលលើសគេលើភពផែនដី ដូណាល់ ត្រាំ បានទាញប៊ិចចុះហត្ថលេខាលើបទបញ្ជាប្រតិបត្តិមួយដើម្បីកាត់បន្ថយការចំណាយរដ្ឋលើច្បាប់ធានារ៉ាប់រងដែលបន្សល់ទុកដោយលោក បារ៉ាក់ អូបាម៉ា។
បើតាមទីភ្នាកងារព័ត៌មាន AFP ប្រធានបុគ្គលិកប្រចាំសេតវិមានលោក Reince Priebus បានអះអាងថា បទបញ្ជាប្រតិបត្តិថ្មីនេះត្រូវបានចុះហត្ថលេខាដោយលោកដូណាល់ ត្រាំ នៅការិយាល័យពងក្រពើ (Oval Office) ហើយវាមានគោលដៅសំខាន់បន្ថយរាល់បន្ទុកសេដ្ឋកិច្ចដែលបង្កើតដោយច្បាប់សុខាភិបាលអូបាម៉ា ដែលត្រូវបានដាក់ចេញឆ្នាំ ២០១០។ វាជាជំហានមួយឆ្ពោះទៅលុបចោលបទបញ្ញត្តិដែលលោក អូបាម៉ា ចុះហត្ថលេខាផ្ទាល់ដៃនោះ។
ប្រព័ន្ធសុខាភិបាល Obamacare មានគោលបំណងសំខាន់ធានាថា ប្រជាជនអាមេរិកវណ្ណៈកណ្តាលនិងវណ្ណៈទាបមានលទ្ធភាពអាចទទួលបានការថែទាំងផ្នែកសុខភិបាលបានល្អ។ ច្បាប់នេះមានលទ្ធភាពជួយឲ្យប្រជាជនអាមេរិក ២០លាននាក់ដែលមិនទទួលបានសេវាពីរដ្ឋឬម្ចាស់ក្រុមហ៊ុនខ្លួននោះ អាចទទួលបានសេវាធានារ៉ាប់រងសុខភាពត្រឹមត្រូវ។ ច្បាប់នេះបន្ថយកម្រិតប្រជាជនគ្មានធានារ៉ាប់រងសុខាភិបាលពី ១៦ភាគរយនៅឆ្នាំ ២០១០ មកត្រឹម ៨,៩ ភាគរយនៅឆ្នាំ ២០១៦។
យោងតាមមូលនិធិ Kaiser Family ត្រឹម ១ភាគ៣ នៃប្រជាជនអាមេរិកប៉ុណ្ណោះដែលទទួលបានសេវាធានារ៉ាប់រងសុខភិបាលដែលធានាដោយរដ្ឋ ដោយរាប់បញ្ចូលទាំងសេវាសម្រាប់មនុស្សចាស់វ័យលើ ៦៥ និងសម្រាប់ប្រជាជនក្រីក្រ។ ហើយពាក់កណ្តាលនៃប្រជាជនអាមេរិកទទួលបានសេវាសុខាភិបាលដែលធានាដោយម្ចាស់ក្រុមហ៊ុនឯណោះ។
ប៉ុន្តែក្រុមសាធារណរដ្ឋយល់ថា ច្បាប់នេះមិនបានប្រយោជន៍អ្វីឡើយ ហើយវានឹងបង្កើនបន្ទុកធ្ងន់លើរដ្ឋាភិបាល ដែលវានឹងឈានទៅរកការចំណាយខ្ជះខ្ជាយដូចប្រព័ន្ធសុខាភិបាលអឺរ៉ុបដែរ។ ដូច្នេះហើយ បានជាក្រុមអ្នកសាធារណរដ្ឋនេះកំណត់យកការលុបចោលច្បាប់នេះជារឿងអាទិភាពបំផុតសម្រាប់ខ្លួន។
ធម្មតាគេមើលឃើញថា លោក ដូណាល់ ត្រាំ ក្លាយជាតួឈ្នានីសដោយលោកប៉ងបំបាត់ចោលសមិទ្ធផលរបស់លោក បារ៉ាក់ អូបាម៉ា ទោះសុន្ទរកថារបស់ខ្លួនកន្លងមកបង្ហាញពីការឈានទៅផ្សះផ្សាជាតិនិងបង្រួបង្រួមជាតិក៏ដោយ។ តាំងពីយូរមកហើយ លោកបានអះអាងថា រដ្ឋបាលលោក នឹងនិរាករណ៍ច្បាប់សុខាភិបាលរបស់រដ្ឋបាលមុន និងរៀបចំបង្កើតច្បាប់សុខាភិបាលថ្មីដែលប្រសើរនិងអាចដោះស្រាយបញ្ហាសុខភិបាលអាមេរិកបានយ៉ាងមានប្រសិទ្ធភាព។
Tag:
Obamacare
ដូណាល់ ត្រាំ
បារ៉ាក់ អូបាម៉ា
© រក្សាសិទ្ធិដោយ thmeythmey.com