ជាតិ
របរកាប់ឈើរបស់ពលរដ្ឋក្រីក្រ ក៏ជាកង្វល់របស់ក្រសួងបរិស្ថាន ![](https://image.thmeythmey.com/pictures/2017/01/21/409_o.jpg)
×![]()
ការទប់ស្កាត់ពលរដ្ឋក្រីក្រដែលនៅបន្តលួចកាប់ឈើទ្រង់ទ្រាយតូចៗ នៅតែជាបញ្ហាសម្រាប់លោក សាយ សំអាល់ ខណៈលោករដ្ឋមន្ត្រីរូបនេះអះអាងថា ការបង្ក្រាបទ្រង់ទ្រាយធំក្នុងពេលថ្មីៗនេះ បានធ្វើឲ្យការកាប់បំផ្លាញព្រៃឈើថយចុះ។ សម្រាប់លោក សាយ សំអាល់ ការផ្តល់របរថ្មី ដែលផ្តល់ចំណូលច្រើន ជាមធ្យោបាយមួយដែលអាចបញ្ចប់ការលួចកាប់ឈើរបស់ពលរដ្ឋ។
«ខ្ញុំសុំឲ្យមានការយោគយល់។ យើងត្រូវការពេលវេលាច្រើនដើម្បីប្រែក្លាយជីវភាពពលរដ្ឋឲ្យប្រសើរ ដើម្បីពួកគាត់អាចងាកចេញពីការលួចកាប់ឈើជារៀងរាល់ថ្ងៃ។ យើងត្រូវរករបរណាឲ្យពួកគាត់ដែលគាត់អាចរកកម្រៃបានច្រើនជាងការកាប់ឈើនេះ»។ នេះជាការពន្យល់របស់លោក សាយ សំអាល់ រដ្ឋមន្ត្រីក្រសួងបរិស្ថាននៅក្នុងសន្និសីទកាសែតមួយនាថ្ងៃទី១៩ខែមករា ដោយឆ្លើយតបទៅនឹងសំណួរជាច្រើនរបស់អ្នកកាសែតដែលសួរអំពីស្ថានភាពនៃការបង្ក្រាបបទល្មើសព្រៃឈើ។
ទោះយ៉ាងណាក៏ដោយ ក្រសួងបរិស្ថាននៅកំពុងបន្តតាមដាន និងបង្ក្រាបបទល្មើសព្រៃឈើ ដោយត្រូវពិនិត្យតាមដេប៉ូឈើ បន្ទាប់ពីការបង្ក្រាបទ្រង់ទ្រាយធំក្នុងពេលកន្លងមក។ នេះបើតាមការបញ្ជាក់របស់លោករដ្ឋមន្ត្រី។
និយាយអំពីពលរដ្ឋដែលលួចកាប់ឈើខុសច្បាប់ដដែល បើតាមការពន្យល់របស់លោករដ្ឋមន្ត្រីបរិស្ថាន មន្ត្រីមានសមត្ថកិច្ចរបស់ក្រសួងតែប្រើប្រាស់វិធានការអប់រំជាជាងវិធានការច្បាប់នៅពេល ពលរដ្ឋអ្នកកាប់ឈើត្រូវបានចាប់ខ្លួន។ លោក សាយ សំអាល់ រម្លឹកយ៉ាងដូច្នេះថា៖«វាទាក់ទងនឹងជីវភាពរបស់ពួកគាត់។ ដូច្នេះយើងប្រើយន្តការអប់រំ។ សូមលោកគិតមើលដូច្នេះ! ជួនកាលគាត់ជាមេគ្រួសារ បើយើងចាប់គាត់ផ្តន្ទាទោស តើកូនរបស់គាត់ យើងត្រូវគិតយ៉ាងណា? ធ្វើម៉េច បើយើងធ្វើការជាមួយមនុស្សដែលអត់ (ក្រីក្រ)»។
ការកាប់ឈើខុសច្បាប់ គឺជាបញ្ហាចាស់ដែលនៅតែក្តៅគគុកនៅក្នុងប្រទេសកម្ពុជា។ សាធារណមតិបានរិះគន់រដ្ឋាភិបាលដែលមិនអាចលុបបំបាត់ករណីជួញដូរឈើខុសច្បាប់ដែលតែងតែនៅលើទំព័រមុខនៃសារព័ត៌មានជាញឹកញាប់។ ក្នុងពេលកន្លងមក លោកដ្ឋមន្ត្រីក្រសួងបរិស្ថាន ធ្លាប់បានអះអាងប្រាប់សារព័ត៌មានថា ក្នុងយុទ្ធនាការទប់ស្កាត់ការកាប់ឈើខុសច្បាប់ លោកបានស្នើផ្ទាល់មាត់ឲ្យឧកញ៉ាមួយចំនួនបញ្ឈប់របរជួញដូរឈើតែម្តង។ ក្នុងយុទ្ធនាការបង្ក្រាបការជួញដូរឈើដដែល សម្តេចនាយករដ្ឋមន្ត្រី ហ៊ុន សែន ក៏ធ្លាប់បានចេញបញ្ជាបង្កើតក្រុមការងារពិសេសដោយមានទាំងសមសភាពកងប្រដាប់អាវុធផង ដើម្បីលុបបំបាត់ការកាប់បំផ្លាញព្រៃឈើខ្មែរ៕
© រក្សាសិទ្ធិដោយ thmeythmey.com