ជាតិ
អន្តរជាតិ
ត្រាំ ប្រកាសសង្គ្រាមប្រឆាំងក្រុមជីហាតរដ្ឋឥស្លាម ពេលទស្សនកិច្ច CIA ថ្ងៃធ្វើការដំបូង
× មេបញ្ជាការកំពូលកងទ័ពអាមេរិកថ្មី លោក ដូណាល់ ត្រាំ បានប្រកាសសង្គ្រាមប្រឆាំងក្រុមភេរវជនរដ្ឋឥស្លាមជាលើកដំបូងបំផុត ក្នុងពេលលោកទៅទស្សនកិច្ចនៅទីស្នាក់ការកណ្តាលទីភ្នាក់ងារចារកម្មមជ្ឈិម។ លោកឆ្លៀតឱកាសជំរុញឲ្យព្រឹទ្ធសភាទទួលយកលោក Mike Pompeo ជាប្រមុខស្ថាប័នចារកម្មនេះផងដែរ។
ក្រោយចូលកាន់តំណែងបានមួយថ្ងៃប្រធានាធិបតី ដូណាល់ ត្រាំ បានប្រញាប់ប្រញាល់ទៅទស្សនកិច្ចនៅទីស្នាក់ការកណ្តាលភ្នាក់ងារចារកម្មមជ្ឈិម (CIA) នៅរដ្ឋ Virginia។ ក្នុងដំណើរទស្សនកិច្ចនេះ ប្រមុខកំពូលកងទ័ពអាមេរិកនេះបានឆ្លៀតឱកាសប្រកាសសង្គ្រាមប្រឆាំងក្រុមជីហាតរដ្ឋឥស្លាមនៅស៊ីរី និងអ៊ីរ៉ាក់តែម្តង។
យោងតាមសារព័ត៌មាន Politico លោក ដូណាល់ ត្រាំ បានលើកឡើងដូច្នេះថា៖« យើងទាំងអស់គ្នាប្រៀបដូចជាស្ថិតនៅលើទឹករលក, មែនឬអត់? ។ យើងមិនទាន់ បានប្រើប្រាស់សមត្ថភាពពិតដែលយើហមាន។ យើងត្រូវគេរារាំង។ យើងត្រូវតែកម្ចាត់ក្រុមភេរវជនរដ្ឋឥស្លាមឲ្យអស់»។
ក្នុលពេលថ្លែងសុន្ទរកថារយៈពេលប្រហែល ១៧នាទីថ្ងៃសច្ចាប្រណិធាន លោក ដូណាល់ ត្រាំ បានរម្លឹកពីឈ្មោះក្រុមភេរវជនរដ្ឋឥស្លាម ហើយលោកចាត់ទុកពួកនេះជាសត្រូវធំបំផុតមួយដែលលោកចង់កម្ចាត់ក្នុងនាមជាប្រធានាធិបតី។ ហើយលោកក៏និយាយពីទីភ្នាក់ងារចារកម្ម CIA នេះដែរ។ ហើយកាលពីរដូវឃោសនាបោះឆ្នោត លោក ដូណាល់ ត្រាំ ក៏បានសន្យាកម្ចាត់ក្រុមភេរវជននេះឲ្យអស់ដើម្បីរក្សាសន្តិសុខអាមេរិកដែរ។
បន្ថែមពីប្រកាសសង្គ្រាមប្រឆាំងភេរវកម្ម គោលបំណងមួយទៀតលោក ដូណាល់ ត្រាំ យកដំណើរទស្សនកិច្ចនេះដើម្បីជំរុញឲ្យសភាតែងតាំងលោក Mike Pompeo ជាប្រមុខស្ថាប័នចារកម្មនេះ។ នេះក៏ដោយសារព្រឹទ្ធសភាពន្យារពេលតែងតាំងប្រមុខស្ថាប័ននេះរហូតដល់ថ្ងៃចន្ទឯងណោះ។
លោក ត្រាំបានបញ្ជាក់ដូច្នេះថា៖ « ខ្ញុំបានជួប Mike Pompeo ហើយខ្ញុំចង់និយាយថា គាត់ជាមនុស្សល្អ។ មនុស្សម្នាឯងទៀតចូលចិត្តគាត់ ហើយគេគោរពគាត់។ អ្នកនឹងទទួលបានត្បូងដ៏មានតម្លៃបំផុតមួយ។ អ្នកទាំងអស់គ្នាស្គាល់គាត់ហើយ តែអ្នកនឹងឃើញថាវានឹងមានអ្វីកើតឡើង»។
តាមពិតទៅ កន្លងមក ត្រាំ មានទំនាក់ទំនងមិនសូវល្អជាមួយស្ថាប័ន CIA ឡើយ ដោយសារតែស្ថាប័ននេះបានអះអាងថា រុស្ស៊ីបានចូលជ្រៀតជ្រែកក្នុងដំណើរការនៃការបោះឆ្នោតប្រធានាធិបតីកន្លងមក។ លោក ត្រាំ បានរិះគន់ប្រមុខ CIA ចាស់ដៃ។ ប៉ុន្តែនៅពេលលោក ទៅទស្សនកិច្ចស្ថាប័ន CIA ដោយផ្ទាល់ លោក ត្រាំ បែរជាបន្ទោសប្រព័ន្ធផ្សព្វផ្សាយនិងអ្នកកាសែតទៅវិញដោយចោទថា អ្នកកាសែតបកស្រាយសម្តីលោកខុសពាក់ព័ន្ធស្ថាប័ន CIA៕
© រក្សាសិទ្ធិដោយ thmeythmey.com