អន្តរជាតិ
ត្រាំ អញ្ជើញ ណេតាន់យ៉ាហ៊ូ មកអាមេរិកដើម្បីពង្រឹងទំនាក់ទំនងអ៊ីស្រាអែល-អាមេរិក
× ក្រោយឡើងកាន់អំណាចភ្លាម ប្រធានាធិបតី ដូណាល់ ត្រាំ បានទូរស័ព្ទទៅនាយករដ្ឋមន្ត្រីអ៊ីស្រាអែល បែនចាមិន ណេតាន់យ៉ាហ៊ូ ដើម្បីជជែកពិភាក្សាការពង្រឹងទំនាក់ទំនងទ្វេភាគីរវាងសម្ព័ន្ធមិត្តទាំងពីរ។ លោកក៏ឆ្លៀតអញ្ជើញប្រមុខរដ្ឋាភិបាលអ៊ីស្រាអែលនេះមកទស្សនកិច្ចនៅអាមេរិកនៅខែកុម្ភៈខាងមុខដែរ។
សូមស្តាប់ព័ត៌មានលម្អិត៖
ចុងសប្តាហ៍កន្លងទៅ លោក ដូណាល់ ត្រាំ បានអញ្ជើញនាយករដ្ឋមន្ត្រីអ៊ីស្រាអែល បែនចាមិន ណេតាន់យ៉ាហ៊ូ មកបំពេញទស្សនកិច្ចផ្លូវការនៅសហរដ្ឋអាមេរិកនៅខែកុម្ភៈខាងមុខ។ការអញ្ជើញនេះ ធ្វើឡើងក្នុងពេលដែលលោក ត្រាំ ទូរស័ព្ទទៅជជែកពិភាក្សាជាមួយមេដឹកនាំអ៊ីស្រាអែលពីទំនាក់ទំនងអ៊ីស្រាអែលនិងអាមេរិក។
យោងតាមគណនី Twitter ផ្លូវការរបស់នាយករដ្ឋមន្ត្រីអ៊ីស្រាអែល ប្រធានាធិបតី ដូណាល់ ត្រាំ ពិតជាបានអញ្ជើញលោក បែនចាមិន ណេតាន់យ៉ាហ៊ូ ទៅទស្សនកិច្ចនៅសេតវិមានអាមេរិកមែននៅខែក្រោយ។ ប៉ុន្តែគណនី Twitter ដដែលនោះបានបញ្ជាក់ថា កាលបរិច្ឆេទជាក់លាក់នៃដំណើរទស្សនកិច្ចនេះមិនទាន់ត្រូវបានកំណត់នៅឡើយទេ។
លោក ដូណាល់ ត្រាំ ចំណាយពេលប្រហែល ៣០នាទី ជជែកជាមួយនាយករដ្ឋមន្ត្រីអ៊ីស្រាអែលតាមទូរសព្ទ័។ ដូណាល់ ត្រាំ អះអាងខ្លួនឯងថា ការជជែកគ្នាជាមួយមេដឹកនាំអ៊ីស្រាអែលនេះជាការពិភាក្សាមួយដ៏កក់ក្តៅ ហើយអ្នកទាំងពីរលើកយកបញ្ហាជាច្រើនមកពិភាក្សា។
សេចក្តីថ្លែងការណ៍សេតវិមានបានបញ្ជាក់ថា៖« មេដឹកនាំទាំងពីរជជែកគ្នាពីកិច្ចព្រមព្រៀងនុយក្លេអ៊ែរអ៊ីរ៉ង់, ដំណើរការកសាងសន្តិភាពជាមួយប៉ាឡេស្ទីន និងបញ្ហាជាច្រើនទៀត»។
លោក ដូណាល់ ត្រាំ បានបញ្ជាក់ក្នុងពេលសន្ទនាជាមួយលោក ណេតាន់យ៉ាហ៊ូ ថា ការកសាងសន្តិភាពរវាងអ៊ីស្រាអែលនិងប៉ាឡេស្ទីនអាចកើតមានឡើងតាមរយៈការចរចាគ្នាដោយផ្ទាល់រវាងភាគីទាំងពីរ។ ហើយអាមេរិកនឹងឈរជាមួយអ៊ីស្រាអែលដើម្បីសម្រេចបាននូវសន្តិភាពនេះ។
ទំនាក់ទំនងរវាងអ៊ីស្រាអែលនិងសហរដ្ឋអាមេរិកធ្លាក់ចុះខ្លាំងក្នុងអាណត្តិរដ្ឋបាលលោកបារ៉ាក់ អូបាម៉ា។ ហើយទំនាក់ទំនងនេះល្អក់ករកកាន់តែខ្លាំងនៅពេលដែលក្រុមប្រឹក្សាសន្តិសុខអនុម័តដំណោះស្រាយថ្កោលទោសនិងទាមទារឲ្យអ៊ីស្រាអែលបញ្ឈប់រាល់គម្រោងសាងសង់លំនៅដ្ឋានខុសច្បាប់នៅលើទឹកដីប៉ាឡេស្ទីន។ អ៊ីស្រាអែលខឹងសម្បារខ្លាំង នៅពេលដែលមន្ត្រីទូតរបស់លោក អូបាម៉ា មិនប្រើប្រាស់សិទ្ធិជំទាស់ផ្តល់ការការពារផ្នែកការទូតដល់អ៊ីស្រាអែលនោះ។
ចំណែកលោក ដូណាល់ ត្រាំ ឯណេះវិញកន្លងមក ទាមទារឲ្យមានការការពារអ៊ីស្រាអែល និងទាត់ចោលដំណោះស្រាយប្រឆាំងអ៊ីស្រាអែលពេលលោកឡើងកាន់តំណែងជាផ្លូវការ។ លោកថែមទាំងសន្យាប្តូរទីតាំងស្ថានទូតពី Tel Aviv ទៅកាន់ទីក្រុងហ្ស៊េរុយសាឡិម ដើម្បីបង្ហាញពីចេតនាល្អរបស់អាមេរិកចំពោះអ៊ីស្រាអែលដូចគ្នា។
យ៉ាងណាមិញ គេមិនឃើញមានការលើកឡើងពីគម្រោងផ្លាស់ប្តូរទីតាំងស្ថានទូតអាមេរិកពីក្រុង Tel Aviv ទៅកាន់ទីក្រុងហ្ស៊េរុយសាឡិមក្នុងកិច្ចសន្ទនាតាមទូរស័ព្ទ ដូចលោក ដូណាល់ ត្រាំ បានសន្យាកន្លងមកឡើយ។ ប៉ុន្តែ អ្នកនាំពាក្យសេតវិមានអាមេរិកបញ្ជាក់ថា វាគ្រាន់តែជាការជជែកពិភាក្សាដំបូងបំផុតប៉ុណ្ណោះ ហើយវាមិនទាន់មានអ្វីប្រែប្រួលរហ័សឡើយ។
ការផ្លាស់ប្តូរស្ថានទូតនេះក្លាយជាប្រធានបទដ៏ចម្រូងចម្រាសបំផុតមួយ ព្រោះវានឹងអាចបំផ្លាញដំណើរការកសាងសន្តិភាពរវាងអ៊ីស្រាអែលនិងប៉ាឡេស្ទីនជាពិសេសដំណោះស្រាយរដ្ឋពីរ (Two State Solution) ។ បើអាមេរិកប្តូរស្ថានទូតទៅហ្ស៊េរុយសាឡិមខាងកើតមានន័យថា អាមេរិកទទួលស្គាល់ភាពស្របច្បាប់របស់អ៊ីស្រាអែលក្នុងការកាន់កាប់ទឹកដីប៉ាឡេស្ទីននេះ។
តាមពិតទៅ អ៊ីស្រាអែល បានវាយដណ្តើមកាន់កាប់តំបន់នៅភាគខាងកើតហ្ស៊េរុយសាឡិមនៅក្នុងសង្គ្រាម ៦ថ្ងៃ រវាងអារ៉ាប់-អ៊ីស្រាអែលនៅក្នុងឆ្នាំ ១៩៦៧។ ហើយអាជ្ញាធរអ៊ីស្រាអែលក៏បានភ្ជាប់ទឹកដីនេះនិងដាក់បញ្ចូលក្នុងឧបសម្ព័ន្ធរបស់ខ្លួនដោយបង្រួបបង្រួមទីក្រុងហ្ស៊េរុយសាឡិមទាំងមូលជាផ្លូវការក្នុងឆ្នាំ ១៩៨០ តែម្តង។ ចាប់ពីពេលនោះមក ទឹកដី ហ្ស៊េរុយសាឡិមស្ថិតក្រោមការកាន់កាប់របស់អ៊ីស្រាអែល៕
© រក្សាសិទ្ធិដោយ thmeythmey.com