អន្តរជាតិ
អេស្តូនី បារម្ភថា រុស្ស៊ីប្រើ «ល្បិចស្រីស្អាត» ដាក់ទាហានអង់គ្លេសដើម្បីបំបាក់មុខណាតូ
× ប្រមុខស្ថាប័នចារកម្មរបស់អេស្តូនី Mikk Marran ព្រួយបារម្ភចំពោះសុវត្ថិភាពទាហានអង់គ្លេស ដែលនឹងមកដល់ទឹកដីអេស្តូនីនៅដំណាច់ខែមីនាខាងមុខ ដើម្បីទប់ទល់សកម្មភាពគំរាមកំហែងរបស់រុស្ស៊ី។ លោកបារម្ភថា ទាហានអង់គ្លេស ដែលមកកាន់អេស្តូនីក្រោមឆ័ត្របក្សសម្ព័ន្ធណាតូ នឹងក្លាយជាគោលដៅវាយប្រហាររបស់ទីភ្នាក់ងារចារកម្មរុស្ស៊ី ដែលត្រូវបញ្ជូនមកដើម្បីបង្កបញ្ហាក្នុងចំណោមទាហានទាំងនោះក្នុងន័យបង្ខូចកេរ្តិ៍ឈ្មោះបក្សសម្ព័ន្ធយោធាណាតូ។
ក្នុងកិច្ចសម្ភាសកម្រមួយជាមួយសារព័ត៌មានអង់គ្លេស Times លោក Mikk Marran ប្រធានគណៈកម្មាធិការព័ត៌មានអេស្តូនី ដែលជាទីភ្នាក់ងារចារកម្ម បានព្រមានទុកមុនពីការគំរាមកំហែងរបស់រុស្ស៊ី ចំពោះកងទ័ពអង់គ្លេស៨០០នាក់ ដែលត្រូវពង្រាយនៅអេស្តូនី។ លោកជឿថា ទាហានអង់គ្លេស នឹងក្លាយជាផ្ទាំងស៊ីបរបស់ចារកម្មរុស្ស៊ី ដែលប្រើល្បិចសម័យសង្គ្រាមត្រជាក់ សំដៅបំបាក់មុខមាត់សម្ព័ន្ធយោធាណាតូ។
បើតាមសារព័ត៌មានអង់គ្លេស Times លោក Mikk Marran និយាយថា មធ្យោបាយមួយរបស់រុស្ស៊ីប្រើដើម្បីគំរាមគេឯងនៅអឺរ៉ុបខាងកើត គឺធ្វើយ៉ាងណាឲ្យទាហានអង់គ្លេសមើលទៅដូចជាមនុស្សប្រព្រឹត្តអំពើអនាចារ។ លោកពន្យល់ថា៖ «ទ័ពអង់គ្លេសនឹងមកដល់ដំណាច់ខែមីនា។ ពួកគេនឹងធ្វើដំណើរពីមូលដ្ឋានទ័ពរបស់ខ្លួនទៅកាន់ទីក្រុង ហើយអាចចូលទៅហាងផឹកស៊ី។ ការវាយតប់ប្រាកដជាមាន ព្រោះនឹងមានអ្នករករឿងមិនខាន។ ឧទាហរណ៍ ពួកគេអាចប្រើល្បិចស្រីស្អាតដើម្បីបង្កជម្លោះ»។
ប្រភពព័ត៌មានដដែលបន្តថា មន្ត្រីអង់គ្លេស និងអេស្តូនី បានជួបពិភាក្សាគ្នាដើម្បីរកដំណោះស្រាយពីការគំរាមកំហែងនេះ។ ហើយគោលដៅសំខាន់នោះ គឺធ្វើយ៉ាងណាការពារទាហានអង់គ្លេសដែលត្រូវពង្រាយនៅអេស្តូនីឲ្យរួចផុតពីល្បិចសម័យសង្គ្រាមត្រជាក់របស់រុស្ស៊ី។ ប្រធានស្ថាប័នចារកម្មខាងលើបញ្ជាក់ថា រុស្ស៊ីមានល្បិចច្រើនណាស់ ហើយចំណូលចិត្តស៊ីផឹករបស់ទាហានអង់គ្លេស និងទាហានណាតូដទៃទៀត អាចធ្វើឲ្យពួកគេធ្លាក់ចូលអន្ទាក់របស់រុស្ស៊ី គឺបង្ខូចមុខមាត់បស្ចឹមប្រទេស។
វត្តមានទ័ពអង់គ្លេសនៅអេស្តូនី គឺជាផ្នែកមួយនៃការពង្រាយកងទ័ពសម្ព័ន្ធយោធាណាតូជាង៤០០០នាក់ នៅតំបន់អឺរ៉ុបខាងកើត និងរដ្ឋជាប់ព្រំដែនជាមួយរុស្ស៊ី ដើម្បីការពារពួកគេពីការគំរាមរបស់រុស្ស៊ី។ រដ្ឋទាំងនោះ ភ័យបារម្ភខ្លាំងនឹងសកម្មភាពរបស់រុស្ស៊ី ដែលអាចឈ្លានពានពួកគេដូចគ្រីមៀដែរ។ ដើម្បីការពារសម្ព័ន្ធមិត្តរបស់ខ្លួន ណាតូ ក៏បានសហការបញ្ជូនទ័ព និងសព្វាវុធយ៉ាងច្រើន បើទោះជារុស្ស៊ីប្រឆាំងដាច់ណាត់ក្ដី។
យ៉ាងណាក្ដី ក្រសួងការពារជាតិរុស្ស៊ី ក៏បានចាត់វិធានការឆ្លើយតបនឹងវត្តមានយោធាសម្ព័ន្ធយោធាណាតូ ប៉ុន្តែទំនងជាមិនមែនល្បិចស្រីស្អាតឡើយ។ បច្ចុប្បន្ននេះ ក្រុងមូស្គូ បានបង្កើនការផ្គត់ផ្គង់សព្វាវុធយ៉ាងច្រើន និងគ្រប់ប្រភេទ ទៅកាន់តំបន់ព្រំដែនទល់នឹងតំបន់អឺរ៉ុបខាងកើត ក៏ដូចជាតំបន់បាល់ទិកផងដែរ។ មិនត្រឹមតែពង្រាយទ័ពឡើយ រុស្ស៊ី ក៏ប្រឹងអភិវឌ្ឍប្រព័ន្ធមីស៊ីលរបស់ខ្លួន ដើម្បីត្រៀមទប់ទល់សម្ព័ន្ធយោធាណាតូដូចគ្នា៕
Tag:
អេស្តូនី
អង់គ្លេស
រុស្ស៊ី
Mikk Marran
© រក្សាសិទ្ធិដោយ thmeythmey.com