ជាតិ
បទយកការណ៍ / បទសម្ភាសន៍
អ្នកវិទ្យាសាស្ត្រវ័យក្មេងពីររូប ជំរុញការធ្វើ «ជំនួញបៃតង» នៅកម្ពុជា ![](https://image.thmeythmey.com/pictures/2017/02/27/27220171747cover.jpg)
×![]()
ភ្នំពេញ៖ ម្ចាស់ពានរង្វាន់អ្នកវិទ្យាសាស្ត្រ និងវិស្វករវ័យក្មេង ចំនួ២រូប គឺកញ្ញា សុង ប៊ុនទៀង និងលោក ផុន ប៊ុនហេង បានពន្យល់អំពីរបៀបអភិវឌ្ឍន៍សេដ្ឋកិច្ច ដោយចៀសវាងផលប៉ះពាល់ដល់បរិស្ថាន។ ការប្រើប្រាស់បច្ចេកវិទ្យា មិនឲ្យប៉ះពាល់ពាល់ដល់បរិស្ថាន គឺជាប្រធានបទសំខាន់របស់មូលនិធិហុងដា(Honda Foundation) ដែលបានបង្កើតកម្មវិធីនេះឡើង។
កញ្ញា សុង ប៊ុនទៀង គឺនិស្សិតជ័យលាភីម្នាក់ក្នុងចំណោមនិស្សិតកម្ពុជា៤រូប ដែលបានជាប់ពានរង្វាន់អ្នកវិទ្យាសាស្ត្រ និងវិស្វករវ័យក្មេងប្រចាំឆ្នាំ២០១៦។ តាមរយៈការប្រឡងសំណេរលើប្រធានបទ៖ «សេដ្ឋកិច្ចបៃតង» ប៊ុនទៀង ដែលមានវ័យ២២ឆ្នាំ បានទទួលពានមាស លិខិតសរសើរ និងថវិកាចំនួន៣ពាន់ដុល្លារ ពីមូលនិធិហុងដា ក្នុងព្រឹត្តិការណ៍ប្រគល់ពានរង្វាន់ នៅមជ្ឈមណ្ឌលសហប្រតិបត្តិការកម្ពុជា-ជប៉ុន(CJCC) កាលពីថ្ងៃសុក្រ១៧ ខែកុម្ភៈ ឆ្នាំ២០១៧ ដែលមានការចូលរួមពីមន្ត្រីជាន់ខ្ពស់ ក្រសួងអប់រំ យុវជន និងកីឡា តំណាងក្រុមហ៊ុនហុងដា និងថ្នាក់ដឹកនាំសាកលវិទ្យាល័យជាច្រើនផងដែរ។
![](https://image.thmeythmey.com/pictures/2017/02/27/thumb2/honda.jpg)
តើហេតុអ្វីបានជាកញ្ញា សុង ប៊ុនទៀង ជាប់ជាបេក្ខនារីជ័យលាភី?
«សេដ្ឋកិច្ចបៃតង គឺការអភិវឌ្ឍសេដ្ឋកិច្ចដែលមិនប៉ះពាល់ដល់បរិស្ថាន»។ នេះជាការបញ្ជាក់របស់កញ្ញា សុង ប៊ុនទៀង និស្សិតឆ្នាំទី៤ជំនាញកសិឧស្សាហកម្ម នៅសាកលវិទ្យាល័យភូមិន្ទកសិកម្ម(ចម្ការដូង) ដែលជាទីកន្លែងនាងបានផ្តល់បទសម្ភាសន៍ជូនសារព័ត៌មានថ្មីៗ ក្រោយទទួលបានពានរង្វាន់របស់មូលនិធិហុងដា។ ប៊ុនទៀង បានរម្លឹកថា នាងបានលើកយក៣ចំណុចនៅក្នុងសំណេររបស់ខ្លួន ដើម្បីប្រកួតប្រជែងពានរង្វាន់ហុងដានេះ។
ទីមួយ ការបង្កើនការប្រើប្រាស់ Bioplastics ដែលមានន័យថា ប្លាស្ទិកដែលរលាយជាលក្ខណៈជីវសាស្ត្រ។ ប្លាស្ទិកនេះ ផលិតចេញពីផ្លែពោត មើមដំឡូង និងចំណីរបស់មនុស្ស។ ប្លាស្ទិកប្រភេទនេះ វារលាយដោយមិនប៉ះពាល់ដល់សុខភាព ព្រមទាំងផ្តល់ជីជាតិដល់ដីទៀតផង។ កញ្ញា បានអះអាងថា ប្រសិនបើម្ចាស់រោងចក្រ និងម្ចាស់អាជីវកម្មទាំងអស់ ងាកមកប្រើប្លាស្ទិកប្រភេទនេះ វានឹងជួយដល់បរិស្ថាន។
ទីពីរ ការបំលែងថាមពល។ កញ្ញា អះអាងថា បច្ចុប្បន្ន កម្ពុជាបានសង់ទំនប់វារីអគ្គិសនី ដើម្បីបង្កើតជាចរន្តអគ្គិសនី។ ប៉ុន្តែ កញ្ញាថា ការសាងសង់ទំនប់វារីអគ្គិសនី បានធ្វើឲ្យប៉ះពាល់ខ្លាំងដល់បរិស្ថាន ដូចជា ត្រូវកាប់ព្រៃឈើ ធ្វើឲ្យបាត់បង់សត្វក្នុងទឹកជាដើម។ ដោយឡែក ផ្ទាំងសូឡា គឺសក្តិសម បំផុតសម្រាប់ប្រទេសកម្ពុជា ព្រោះតែកម្ពុជាមានអាកាសធាតុអំណោយផលបំផុតសម្រាប់ការប្រើសូឡា។
ទីបី ការកែច្នៃសំរាម គឺដើម្បីកាត់បន្ថយសំរាម និងបង្កើនសេដ្ឋកិច្ច ដែលជំរុញឲ្យមានបរិស្ថានស្អាត។ កញ្ញា អះអាងថា កម្ពុជា គួរបង្កើតរោងចក្រចំនួន៤ នៅទីលានចាក់សំរាម។ ទី១) រោងចក្រញែកសំរាម ២) រោងចក្រដុតសំរាម ដើម្បីស្រូបថាមពលអគ្គិសនី ៣)រោងចក្រជីកំប៉ុស្ត និងទី៤) រោងចក្រកែច្នៃទឹកស្អុយ។
សូមស្តាប់ការពន្យល់របស់កញ្ញា សុង ប៊ុនទៀង ខាងក្រោមនេះ៖
ចំណែក លោក ផុន ប៊ុនហេង ម្ចាស់ពានរង្វាន់អ្នកវិទ្យាសាស្ត្រ និងវិស្វករវ័យក្មេងប្រចាំឆ្នាំ២០១៤ បានប្រឡងលើប្រធានបទ៖ទំនប់វារីអគ្គិសនី។ ក្នុងវ័យ២៥ឆ្នាំ និស្សិតទើបបញ្ចប់ការសិក្សាបរិញ្ញាបត្រផ្នែកស្ថាបត្យកម្មនៅវិទ្យាស្ថានបច្ចេកវិទ្យាកម្ពុជា(តិចណូ)រូបនេះ បានលើកយក៣ចំណុច ដើម្បីបង្ហាញដំណោះស្រាយលើការសាងសង់អគ្គិសនី។ ១) ធានាឲ្យបានថា កុំឲ្យមានផលប៉ះពាល់មនុស្ស ដោយយកគំរូតាមការសាងសង់ទំនប់វារីអគ្គិសនីនៅប្រទេសឡាវ ដែលកម្រឃើញប្រជាជនឡាវធ្វើការតវ៉ា។
២) កុំឲ្យប៉ះពាល់ដល់បរិស្ថាន។ កាលណាមានទំនប់វារីអគ្គិសនី ដីល្បាប់នៅខាងលើមិនធ្លាក់មកខាងក្រោមទន្លេ ដែលធ្វើឲ្យដីផ្នែកខាងក្រោមទន្លេមិនមានជីជាតិ ខណៈត្រីមិនអាចផ្លាស់ទីបាន និងប៉ះពាល់ដំណាំរបស់ប្រជាជនដែលដាំនៅតាមមាត់ទន្លេ។ ទី៣ យើងអាចទាញយកសក្តានុពលផ្សេងៗទៀត ដូចជា៖ សូឡា និងខ្សល់ជាដើម ដើម្បីកាត់បន្ថយការសាងសង់ទំនប់វារីអគ្គិសនី។ លោកបញ្ជាក់ទៀតថា ថាមពលសូឡា គឺជាថាមពលដ៏ល្អបំផុតសម្រាប់ប្រទេសកម្ពុជា ពីព្រោះកម្ពុជាមានអាកាសធាតុល្អ សម្រាប់ថាមពលប្រភេទនេះ។
សូមស្តាប់ការពន្យល់របស់ លោក ផុន ប៊ុនហេង ដូចតទៅ៖
មិនត្រឹមតែជាបេក្ខជនជ័យលាភីអ្នកវិទ្យាសាស្ត្រ និងវិស្វករវ័យក្មេងនោះទេ លោក ផុន ប៊ុនហេង ក៏ជាបេក្ខជនតំណាងកម្ពុជាម្នាក់ ក្នុងចំណោមពីរនាក់ ដែលបានជាប់សមាជិកអ្នករៀបចំកម្មវិធីវេទិកាប្រចាំឆ្នាំ២០១៦ និងកំណត់ប្រធានបទរួមគ្នាស្តីពី៖«ការប្រើប្រាស់ថាមពលអគ្គិសនី ដែលមាននិរន្តរភាពដោយប្រើបច្ចេកវិទ្យា» នៅប្រទេសជប៉ុន ដែលមាននិស្សិតចំនួន១១នាក់ មកពី៥ប្រទេសផងដែរ។
លោកបញ្ជាក់ថា និស្សិតទាំង១១នាក់នេះ បានយកប្រធានបទ បញ្ហា និងដំណោះស្រាយស្តីពីថាមពលអគ្គិសនី នៅក្នុងប្រទេសរបស់ខ្លួនមកចែករំលែក ដើម្បីកំណត់យកប្រធានបទរួមមួយ។ ដោយឡែក ប៊ុនហេង បានលើកឡើងពីការសាងសង់ផ្ទះ នៅសំណង់មិនរៀបរយ ដោយប្រើប្រាស់ថាមពលតិចបំផុត។ លោកនិយាយថា អ្នករស់នៅសំណង់មិនរៀបរយនៅស្ទឹងមានជ័យ ផ្ទះរបស់ពួកគេតូចចង្អៀត ដោយពួកគេយកស័ង្កសីមកបាំង ដែលធ្វើឲ្យផ្ទះនោះក្តៅពិបាករស់នៅ។ លោកនិយាយថា៖«ការរចនា(design)ផ្ទះ ដោយមានពន្លឺគ្រប់គ្រាន់ និងមានខ្សល់ចូលល្អ គឺអាចសន្សំសំចៃ លើការប្រើអគ្គិសនីជូនពួកគាត់ ពីព្រោះពួកគេមិនសូវធូរធារនោះទេ»៕
Tag:
សុង ប៊ុនទៀង
ផុន ប៊ុនហេង
© រក្សាសិទ្ធិដោយ thmeythmey.com