ជាតិ
ថ្នាក់ដឹកនាំ និងអ្នកជំនាញនៅតំបន់អាស៊ីប៉ាស៊ីហ្វិកពិគ្រោះគ្នាស្តីពីការអភិវឌ្ឍកុមារតូច ![](https://image.thmeythmey.com/pictures/2017/03/01/soniseth1__credit_.jpg)
×![]()
សៀមរាប៖ គណៈប្រតិភូជាង៥០០នាក់ មកពីប្រទេសចំនួន៣៦ ក្នុងតំបន់អាស៊ីប៉ាស៊ីហ្វិក បាននិងកំពុងចូលរួមក្នុងសន្និសីទអន្តរជាតិថ្នាក់តំបន់អាស៊ីប៉ាស៊ីហ្វិក ស្តីពីការអភិវឌ្ឍកុមារតូច ដែលធ្វើឡើងនៅខេត្តសៀមរាប។ សន្និសីទនេះ ផ្តោតលើការអភិវឌ្ឍកុមារតូច ទាំងការអប់រំ និងអាហារូបត្ថម្ភ។
ពិធីបើកសន្និសីទអន្តរជាតិនៅព្រឹកថ្ងៃទី១ ខែមីនា ឆ្នាំ២០១៧ គឺក្រោមអធិបតីភាពសម្តេចនាយករដ្ឋមន្ត្រី ហ៊ុន សែន។ ប្រមុខរាជរដ្ឋាភិបាលកម្ពុជាមានប្រសាសន៍ថា ក្រោយថ្ងៃ៧មករាមក គឺកុមារគ្រប់រូបទទួលបានការឧបត្ថម្ភពីរាជរដ្ឋាភិបាល ដើម្បីកសាងបុគ្គលិកលក្ខណៈ អត្តចរិត និងចំណេះដឹងដំបូង សម្រាប់ត្រៀមខ្លួនចូលបឋមសិក្សា។ សម្តេចបន្ថែមថា កម្ពុជាស្រឡាញ់ និងចាត់ទុកកុមារ គឺជាដើមទុននៃធនធានមនុស្ស និងជាអ្នកដឹកនាំទៅថ្ងៃខាងមុខ។
![](https://image.thmeythmey.com/pictures/2017/03/01/thumb2/soniseth2__credit_.jpg)
នាយកយូនីសេហ្វប្រចាំតំបន់អាស៊ីខាងកើត និងប៉ាស៊ីហ្វិក លោកស្រី ខារីន ហ៊ុលហ្សុប បានលើកឡើងថា ភស្តុតាងច្បាស់លាស់ជាច្រើនបានបង្ហាញថា រយៈពេលមួយពាន់ថ្ងៃដំបូងនៃជីវិត ចាប់ពីបង្កកំណើតក្នុងផ្ទៃរហូតដល់អាយុ២ឆ្នាំ គឺជាពេលវេលាដ៏មានសារសំខាន់បំផុតសម្រាប់សុខុមាលភាព និងការអភិវឌ្ឍកុមារ។ លោកស្រីបន្តថា ការផ្តល់ការថែទាំប្រកបដោយយកចិត្តទុកដាក់ និងការផ្តល់ការអប់រំនៅវ័យក្មេង គឺជាកត្តាចំបងក្នុងការកសាងកុមារប្រកបដោយសុខភាពល្អ ដើម្បីឲ្យពួកគេអាចឈានទៅសម្រេចបាននូវសក្តានុពលរបស់ពួកគេនៅពេលពេញវ័យ។
គួរបញ្ជាក់ដែរថា សន្និសីទអន្តរជាតិស្តីពីការអភិវឌ្ឍកុមារតូចនេះ ធ្វើឡើងរយៈពេល៣ថ្ងៃ គឺចាប់ពីថ្ងៃទី១ ដល់ថ្ងៃទី៣ មីនា ឆ្នាំ២០១៧។
សន្និសីទនេះ ក៏អនុញ្ញាតឲ្យបណ្តាប្រទេសចូលរួមទាំងអស់ បានចែករំលែក និងសិក្សាពីយុទ្ធសាស្ត្រពីគ្នាទៅវិញទៅមក ស្តីពីការសម្រេចឲ្យបាននូវគោលដៅអភិវឌ្ឍប្រកបដោយចីរភាពត្រឹមឆ្នាំ២០៣០។ ក្នុងនោះដែរ ប្រទេសទាំងអស់ នឹងពិភាក្សាពីយុទ្ធសាស្ត្រផ្សេងៗ ដូចជាតម្រូវការដើម្បីធ្វើបរិយាប័ន្ន និងសមាហរណកម្មកម្មវិធី គោលនយោបាយ ដែលគាំទ្រដោយទីភ្នាក់ងារទទួលបន្ទុកសុខភាពអាហារូបត្ថម្ភ និងគាំពារសង្គមចំពោះកុមារ ខាងផ្នែកអប់រំអនាម័យទឹក៕
© រក្សាសិទ្ធិដោយ thmeythmey.com