ជាតិ
កម្ពុជាផ្តល់ថវិកាបន្ថែមជិត១លានដុល្លារដល់មន្ទីរពេទ្យគន្ធបុប្ផា ![រូបភាពពីហ្វេសប៊ុកក្រសួងសេដ្ឋកិច្ច និងហិរញ្ញវត្ថុ](https://image.thmeythmey.com/pictures/2017/04/05/wer.jpg)
រូបភាពពីហ្វេសប៊ុកក្រសួងសេដ្ឋកិច្ច និងហិរញ្ញវត្ថុ
×![]()
រាជរដ្ឋាភិបាលកម្ពុជា បានផ្តល់ថវិកាបន្ថែមជិត ១លានដុល្លារ ដល់មន្ទីរពេទ្យគន្ធបុប្ផា។ ថវិកានេះ បានមកពីការដំឡើងថ្លៃប័ណ្ណចូលទស្សនារមណីយដ្ឋានអង្គរចំពោះភ្ញៀវទេសចរបរទេស ដែលបានចាប់ផ្តើមតាំងពីខែកុម្ភៈមក។
រាជរដ្ឋាភិបាលកម្ពុជា តាមរយៈក្រសួងសេដ្ឋកិច្ច និងហិរញ្ញវត្ថុ បានផ្តល់ថវិកាបន្ថែម ចំនួន ៩៥៤,២១០ដុល្លារអាមេរិក ដល់មន្ទីរពេទ្យគន្ធបុប្ផា។ ថវិកានេះ ត្រូវបានប្រគល់នៅថ្ងៃទី៥ ខែមេសា នាកិច្ចប្រជុំក្រុមប្រឹក្សាភិបាលគ្រឹះស្ថានអង្គរ នៅទីស្តីការក្រសួងសេដ្ឋកិច្ច។
ថវិកានេះ បានពីការដំឡើងថ្លៃប័ណ្ណចូលទស្សនារមណីយដ្ឋានអង្គរចំពោះភ្ញៀវទេសចរបរទេស ដែលបានចាប់ផ្តើមតាំងពីខែកុម្ភៈមក។
សេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ បានគូសបញ្ជាក់ថា ការប្រគល់ថវិកានេះ គឺដើម្បីរួមចំណែកដោះស្រាយបញ្ហាហិរញ្ញវត្ថុរបស់មន្ទីរពេទ្យ និងជាប្រយោជន៍សម្រាប់កុមារទាំងឡាយ ជាពិសេសកុមារក្រីក្រកម្ពុជា ដែលមានជំងឺ និងសម្រាកព្យាបាលនៅមន្ទីរមួយនេះ។
សេចក្តីប្រកាសព័ត៌មានដដែល បានគូសបញ្ជាក់បន្ថែមថា ការផ្តល់ជូនថវិកានេះ ឆ្លុះបញ្ជាំងពីការយកចិត្តទុកដាក់ និងការគិតគូរបន្ថែមទៀត របស់រាជរដ្ឋាភិបាល ក្នុងការសម្រួលបញ្ហាហិរញ្ញវត្ថុ និងបន្តនិរន្តរភាពរបស់មន្ទីរពេទ្យគន្ធបុប្ផា។ ទន្ទឹមនឹងនោះ រាជរដ្ឋាភិបាលកម្ពុជា នឹងបន្តផ្តល់វថិកាវិភាគទាន និងថវិកាដែលបានពីការដំឡើងថ្លៃប័ណ្ណចូលទស្សនារមនីយដ្ឋានអង្គរ រៀងរាល់ត្រីមាស ដើម្បីទ្រទ្រង់ដល់មន្ទីរពេទ្យគន្ធបុប្ផា៕
© រក្សាសិទ្ធិដោយ thmeythmey.com