ជាតិ
នយោបាយជាតិ
គ.ជ.ប ស្នើឲ្យក្រសួងការបរទេស អញ្ជើញសហគមន៍អន្តរជាតិ មកឃ្លាំមើលការបោះឆ្នោតនៅកម្ពុជា ![](https://image.thmeythmey.com/pictures/2017/04/05/hong_puthea.jpg)
×![]()
ភ្នំពេញ៖ តាមរយៈសំណើ ដែលដាក់ទៅកាន់ក្រសួងការបរទេស គ.ជ.ប បានបង្ហាញគោលបំណងរបស់ខ្លួន ដែលចង់ឲ្យសហគមន៍អន្តរជាតិនានា មកធ្វើជាអ្នកសង្កេតការណ៍ក្នុងការបោះឆ្នោតថ្នាក់ឃុំ សង្កាត់ នាពេលខាងមុខ។ បច្ចុប្បន្ននេះ មានស្ថានទូតមួយចំនួន រួមទាំងអង្គការអន្តរជាតិដទៃទៀត បានប្រាប់គ.ជ.ប ថា នឹងចូលរួមធ្វើជាអ្នកសង្កេតការណ៍។
លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បានដាក់សំណើ ទៅកាន់លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ដើម្បីសុំឲ្យអញ្ជើញតំណាងអង្គការអន្តរជាតិ និងតំណាងប្រទេសនានា មកចូលរួមសង្កេតការណ៍ក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ នាអាណត្តិទី៤នេះ ដែលនឹងប្រព្រឹត្តទៅនៅថ្ងៃទី៤ ខែមិថុនា ឆ្នាំ២០១៧។
នៅក្នុងលិខិតនោះ លោក ស៊ិក ប៊ុនហុក បានសរសេរដូច្នេះថា៖«ដើម្បីឲ្យការបោះឆ្នោតជ្រើសរើសក្រុមប្រឹក្សាឃុំ សង្កាត់ ក្នុងអាណត្តិទី៤នេះ ប្រព្រឹត្តទៅដោយមានការចូលរួមសង្កេតមើលដំណើរការបោះឆ្នោត ពីមជ្ឈដ្ឋាននានា សូមឯកឧត្តមទេសរដ្ឋមន្ត្រី មេត្តាអញ្ជើញតំណាងប្រទេសនានា និងតំណាងអង្គការអន្តរជាតិ ឲ្យមកចូលរួម ធ្វើជាអ្នកសង្កេតការណ៍»។
រហូតមកដល់ពេលនេះ មានស្ថានទូតចំនួនពីរហើយ ដែលប្រាប់គ.ជ.ប ថា នឹងដាក់តំណាងរបស់ខ្លួន ឲ្យធ្វើជាអ្នកសង្កេតការណ៍ក្នុងការបោះឆ្នោត នាពេលខាងមុខ។ នេះបើតាមលោក ហង្ស ពុទ្ធា អ្នកនាំពាក្យគ.ជ.ប ដែលបាននិយាយបន្ថែមពីលើលិខិតរបស់លោក ស៊ិក ប៊ុនហុក។
លោក ហង្ស ពុទ្ធា បានប្រាប់សារព័ត៌មានថ្មីៗថា ស្ថាតទូតទាំងពីរនោះ គឺស្ថានទូតអាមេរិក និងស្ថាតទូតសភាពអឺរ៉ុប។ អ្នកនាំពាក្យគ.ជ.ប រូបនេះ និយាយដូច្នេះថា៖«ស្ថានទូតទាំងពីរនេះ បានប្រាប់មុខហើយ ថានឹងចូលរួមធ្វើជាអ្នកសង្កេតកាណ៍។ តែពួកគាត់ មិនទាន់បានដាក់លិខិតជាផ្លូវការមកគ.ជ.ប ទេ។ ក្រៅពីនេះ ក៏មានអង្គការអន្តរជាតិមួយចំនួនទៀត បានបង្ហាញចំណាប់អារម្មណ៍ចំពោះរឿងនេះ»។
លោក ហង្ស ពុទ្ធា បន្តថា បច្ចុប្បន្ន មានអង្គការជាតិចំនួនបី បានដាក់ពាក្យទៅកាន់គ.ជ.ប ដើម្បីសុំធ្វើជាអ្នកសង្កេតការណ៍ក្នុងការបោះឆ្នោត។ លោក ប្រាប់ថា អង្គការទាំងបីនោះ មានអ្នកសង្កេតការណ៍ជិត២ពាន់នាក់។
សូមបញ្ជាក់ថា គណបក្សនយោបាយចំនួន១២ បានចូលរួមប្រកួតប្រជែងការបោះឆ្នោតថ្នាក់ឃុំ សង្កាត់៕
Tag:
គ.ជ.ប
បោះឆ្នោត
© រក្សាសិទ្ធិដោយ thmeythmey.com