អង្គការសិល្បៈខ្មែរអមតៈ ប្រកាសផ្តល់អាហារូបករណ៍សិក្សាផ្នែកសិល្បៈ

ជាតិ

អង្គការសិល្បៈខ្មែរអមតៈ ប្រកាសផ្តល់អាហារូបករណ៍សិក្សាផ្នែកសិល្បៈ

06, Apr 2017 , 8:39 pm

រូបភាព

រូបពីហ្វេសប៊ុក Cambodia Living Arts

ដោយ: ថ្មីៗ

អង្គការសិល្បៈខ្មែរអមតៈ មានកម្មវិធីពង្រឹងសមត្ថភាពអ្នកធ្វើការក្នុងវិស័យសិល្បៈ វប្បធម៌ និងចំណេះផ្នែកសិល្បៈក្នុងសង្គមខ្មែរ តាមរយៈការផ្តល់ការបណ្តុះបណ្តាល, មូលនិធិ, បទបង្ហាញ និងតាមរយៈការចូលរួមក្នុងការអនុវត្តសកម្មភាពសិល្បៈ វប្បធម៌។

អង្គការសិល្បៈខ្មែរអមតៈ នឹងបើកទទួលពាក្យសុំអាហារូបករណ៍សិល្បៈ អមតៈ អាន ចន-ផន សម្រាប់ឆ្នាំ២០១៧-២០១៨ ចាប់ពីថ្ងៃប្រកាសនេះតទៅ។ បេក្ខជនសញ្ជាតិខ្មែរជាសិស្ស-និស្សិត សិល្បៈ អ្នកធ្វើការ ឬអ្នកស្រាវជ្រាវផ្នែកសិល្បៈ និងវប្បធម៌ដែលមានចំណាប់អារម្មណ៍ អាចមកទទួលពាក្យដោយឥតគិតថ្លៃពីអង្គការសិល្បៈខ្មែរអមតៈ ឬទាញយកពី គេហទំព័រ www.cambodianlivingarts.org។ កាលបរិច្ឆេទ ឈប់ទទួលពាក្យ នៅថ្ងៃទី១៥ ខែមិថុនា ឆ្នាំ២០១៧ ។

បើតាមសេចក្តីប្រកាសពត៌មានរបស់អង្គការសិល្បៈខ្មែរអមតៈ ការផ្ដល់អាហារូបករណ៍នេះ គឺដើម្បីឆ្លើយតបទៅនឹងតម្រូវការជាក់ស្ដែងរបស់សិល្បករ និងអ្នកធ្វើការក្នុងវិស័យសិល្បៈ និងវប្បធម៌ ដែលចង់ពង្រឹងសមត្ថភាព និងចំណេះដឹងសិល្បៈ ឬជំនាញផ្សេងទៀតដើម្បីអភិវឌ្ឍខ្លួនសម្រាប់អាជីពក្នុងវិស័យនេះ។ ក្រៅពីអាហារូបករណ៍ដែលផ្ដល់ជូន ជ័យលាភី ក៏នឹងទទួលបានកម្មវិធីបណ្ដុះបណ្ដាលតម្រង់ទិស និងការផ្ដល់ប្រឹក្សានានា ឱកាសបង្កើតទំនាក់ទំនង ព្រមទាំងកញ្ចប់ថវិកាចំនួន ១,២០០ ដុល្លារក្នុងមួយឆ្នាំដើម្បីយកទៅអភិវឌ្ឍន៍ជំនាញសិល្បៈ ឬជំនាញមិនមែនសិល្បៈរបស់ខ្លួនផងដែរ។

អង្គការនេះ លើកទឹកចិត្តដល់បេក្ខជនជាស្ត្រី ឬបេក្ខជនមានពិការភាពឲ្យដាក់ស្នើសុំអាហារូបករណ៍នេះ។ ចំពោះបេក្ខជនដែលមានពិការភាពជួបបញ្ហាលំបាកក្នុងការបំពេញព័ត៌មានពាក្យសុំអាចប្រើប្រាស់វីដេអូសម្រាប់ផ្ដល់ចម្លើយតាមសំណួរនីមួយៗបាន។

ពាក្យសុំអាហារូបករណ៍ មានផ្ដល់ជូនដោយឥតគិតថ្លៃនៅទីតាំងដូចខាងក្រោម៖
-    ភ្នំពេញ៖ សិល្បៈខ្មែរអមតៈ ផ្ទះលេខ ១២៨G៩ ផ្លូវសុធារស សង្កាត់ទន្លេបាសាក់ ខណ្ឌចំការមន (០១៧ ៥៥៧ ២៨៥ / ០១០ ៩៤១ ២២៤)
-    សៀមរាប៖ វត្តរាជបូណ៌ សង្កាត់សាលាកំរើក ខេត្តសៀមរាប (០១២ / ០៦៩ ៥៨៣ ៨៩១)
-    ឬទាញយកបានពីតំណភ្ជាប់ goo.gl/dGB7Aj។

សម្រាប់ព័ត៌មានបន្ថែម សូមទាក់ទងកញ្ញា យ៉ុន សុខខន អ្នកសម្របសម្រួលជាន់ខ្ពស់កម្មវិធីអភិវឌ្ឍន៍សិល្បៈ ទូរស័ព្ទលេខ ០១៧ ៥៥៧ ២៨៥ / ០១០ ៩៤១ ២២៤ ឬអ៊ីម៉េល [email protected]។