Davis Cup៖ សំនៀង បង្កើតកំណត់ត្រា កេន្នី និងផល្គុណ រក្សាភាពខ្លាំង ខណៈសារិទ្ធបានបទពិសោធន៍ដ៏ល្អ

កីឡាជាតិ

ជាតិ

Davis Cup៖ សំនៀង បង្កើតកំណត់ត្រា កេន្នី និងផល្គុណ រក្សាភាពខ្លាំង ខណៈសារិទ្ធបានបទពិសោធន៍ដ៏ល្អ

11, Apr 2017 , 10:02 am

រូបភាព

លោក ចម ប្រសិទ្ធ ស្វាគមន៍ការមកដល់របស់ក្រុមកីឡាវាយកូនបាល់ជម្រើសជាតិកម្ពុជា ដែលមានលោក ទេព រិទ្ធីវិត ជាប្រធានក្រុម

ដោយ: នាយយ៉ាន

អគ្គលេខាធិការសហព័ន្ធកីឡាវាយកូនបាល់កម្ពុជា និងជាប្រធានក្រុមជម្រើសជាតិ រីករាយចំពោះសមត្ថភាព កីឡាកររបស់ខ្លួនដែលបាននាំកម្ពុជាទទួលបានកៅអីទៅកាន់ក្រុម III ប្រចាំតំបន់អាស៊ី/អូសេអានី នៃពានរង្វាន់ Davis Cup ឆ្នាំ២០១៨ បន្ទាប់ពីបានយកឈ្នះក្រុមទាំងអស់ក្នុងពូល ហើយបន្តបំបាក់ជើងខ្លាំងអូម៉ង់ នាការប្រកួតវគ្គខ្វែងនៅទីក្រុងអ៊ីសា ប្រទេសបារ៉ែន។

នៅក្នុងព្រឹត្តិការណ៍ប្រកួតវគ្គជម្រុះពានរង្វាន់ Davis Cup ប្រចាំតំបន់អាស៊ី/អូសេអានី Group IV កាលពីថ្ងៃទី៣ ដល់ទី៨ ខែមេសា នៅទីក្រុងអ៊ីសា ប្រទេសបារ៉ែន កន្លងមក ក្រុមកីឡាករវាយកូនបាល់ជម្រើសជាតិកម្ពុជា ដែលដឹកនាំដោយគ្រូបង្វឹកប៉ាណាម៉ា លោក Aneiros Braen បានបង្ហាញសមត្ថភាពយ៉ាងអស្ចារ្យនាការប្រកួតជម្រុះក្នុងពូល A ដោយបានយកឈ្នះមីយ៉ាន់ម៉ា ៣-០ ឈ្នះកៀហ្ស៊ីស៊ីស្ថាន ២-១ ឈ្នះម្ចាស់ផ្ទះបារ៉ែន ៣-០ និងឈ្នះអារ៉ាប៊ីសាអូឌីត ២-១ ជាបន្តបន្ទាប់ មុននឹងបំបាក់អូម៉ង់ ២-០ នាការប្រកួតដណ្តើមកៅអីទៅកាន់ក្រុម III នៅឆ្នាំ២០១៨ ។

ក្រុមកីឡាករជម្រើសជាតិកម្ពុជា បានវិលកាន់មាតុប្រទេសវិញកាលពីព្រឹកថ្ងៃទី១០ ខែមេសា ដោយមានការទទួលស្វាគមន៍ផងដែរពីសំណាក់លោកទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម និងជាប្រធានសហព័ន្ធកីឡាវាយកូនបាល់កម្ពុជា រួមទាំងអ្នកសារព័ត៌មាន អ្នកគាំទ្រជាច្រើននាក់។

ថ្លែងនៅអាកាសយានដ្ឋានអន្តរជាតិភ្នំពេញនាព្រឹកថ្ងៃទី១០ ខែមេសា លោក ទេព រិទ្ធីវិត អគ្គលេខាធិការសហព័ន្ធកីឡាវាយកូនបាល់កម្ពុជា និងជាប្រធានក្រុមជម្រើសជាតិ បានមើលឃើញចំណុចវិជ្ជមានជាច្រើនរបស់កីឡាករដែលចូលរួមក្នុងព្រឹត្តិការណ៍កន្លងមកនេះ។

ក្រៅពី ប៊ុន កេន្នី និងម៉ម ផល្គុណ ដែលមានភាពចាស់ទុំច្រើន លោក ទេព រិទ្ធីវិត រីករាយយ៉ាងខ្លាំងចំពោះសមត្ថភាពរបស់ ឡុង សំនៀង និងកីឡាករចំណូលថ្មី អោ សារិទ្ធ។ លោកគូសបញ្ជាក់ថា កំណត់ត្រាដ៏គួរឲ្យកត់សម្គាល់នោះ ឡុង សំនៀង ដែលកន្លងមកមិនធ្លាប់មានប្រវត្តិឈ្នះសោះក្នុង Davis Cup បែរជាទទួលបានជ័យជម្នះទាំង៤ប្រកួតដែលរូបបានបង្ហាញវត្តមាននៅទីក្រុងអ៊ីសា ប្រទេសបារ៉ែន។

ជាមួយគ្នានេះ ការបង្ហាញវត្តមានលើកដំបូងរបស់ អោ សារិទ្ធ បានផ្តល់ផលជាវិជ្ជមានផងដែរ ដោយ កីឡាករចំណូលថ្មីរូបនេះ ធ្វើបានយ៉ាងល្អលើវិញ្ញាសាវាយជាគូ និងមានការជួយសហការពីកីឡាករជើងចាស់ ម៉ម ផល្គុណ។ ទាក់ទងនឹងការប្រើប្រាស់កីឡាករឆ្នើម ប៊ុន កេន្នី លោក ទេព រិទ្ធីវិត បានអះអាងថា ក្រុមទាំងមូលមានយុទ្ធសាស្ត្រគ្រប់គ្រាន់ ដោយដាក់ឲ្យកីឡាកររូបនេះលេងក្នុងការប្រកួតសំខាន់ៗ និងឈ្នះគ្រប់ការប្រកួត ដោយមិនមានករណីរបួសដូចឆ្នាំមុនឡើយ។

ទោះបីជាយ៉ាងណាក៏ដោយ លោក ទេព រិទ្ធវិត ក៏មានហ៊ានក្តីរំពឹងខ្ពស់នោះឡើយសម្រាប់កម្ពុជាក្នុងព្រឹត្តិការណ៍ពិភពលោក Davis Cup។ លោកបានលើកឡើងថា៖ «ខ្ញុំជឿជាក់ថា យើងអាចរក្សាខ្លួននៅ Group III បានយូរឆ្នាំ មុននឹងឈានដល់ Group II ហើយយើងនឹងជំរុញកីឡាករថ្មីៗបន្ថែមទៀត ដើម្បីទទួលបានបទពិសោធន៍ពីការប្រកួតលំដាប់ពិភពលោកនេះ»។
ប៊ុន កេន្នី ក៏បានអះអាងដែរថា ព្រឹត្តិការណ៍ Davis Cup នេះ ជាទុនមួយដ៏ល្អសម្រាប់រូបគេក្នុងការពង្រឹងយកមេដាយនៅស៊ីហ្គេមនៅម៉ាឡេស៊ី បន្ទាប់ពីរូបគេទទួលបានមេដាយសំរិទ្ធលើវិញ្ញាសាវាយជាក្រុមកាលពីឆ្នាំ២០១១ និងសំរិទ្ធ១ទៀតលើវិញ្ញាសាវាយទោលកាលពីឆ្នាំ២០១៥ ។

ចំណែក អោ សារិទ្ធវិញ គេមានមោទកភាព ដោយការបង្ហាញខ្លួនលើកដំបូងរបស់គេ គ្មានការភ័យខ្លាច។ កីឡាកររូបនេះទទួលស្គាល់ថា គេនៅខ្វះបទពិសោធន៍ច្រើននៅលើទីលាន ជាពិសេសការប្រកួតលើវិញ្ញាសាឯកត្តជន ប៉ុន្តែរូបគេនឹងខិតខំប្រឹងប្រែងបន្ថែមទៀត៕