ជាតិ
សម្ដេច ហ៊ុន សែន ថា ទំនាក់ទំនងកម្ពុជា-ចិន គឺជាគំរូល្អដល់ប្រទេសដទៃ ![](https://image.thmeythmey.com/pictures/2017/04/11/n.jpg)
×![]()
ភ្នំពេញ៖ ថ្លែងក្នុងពិធីផ្សព្វផ្សាយជាលើកដំបូងនូវសៀវភៅជាខេមរភាសាស្តីពីលោក ស៊ី ជីនភីង «អភិបាលកិច្ចប្រទេសចិន» នៅព្រឹកថ្ងៃទី ១១ មេសានេះ សម្ដេចនាយករដ្ឋមន្ត្រី ហ៊ុន សែន បានរំឮកពីកិច្ចសហការគ្នារវាងកម្ពុជា-ចិន ជាច្រើនឆ្នាំមកនេះ ដែលបានពង្រីកវិសាលភាព និងជួយដល់ការអភិវឌ្ឍប្រទេសកម្ពុជា ឲ្យមានភាពរីកចម្រើនផងដែរ។ សម្ដេច ហ៊ុន សែន បានបន្ថែមថា ទំនាក់ទំនងប្រទេសទាំងពីរកន្លងមក គឺជាកិច្ចសហប្រតិបត្តិការរួមគ្នាប្រកបដោយសន្តិភាព ។ ប្រមុខរដ្ឋាភិបាល បានបញ្ជាក់ដូច្នេះថា៖«ទំនាក់ទំនងកម្ពុជា-ចិន គឺជាគំរូល្អ ដល់ប្រទេសដទៃ»។
បើតាមសម្ដេច ហ៊ុន សែន ប្រទេសចិនជាដៃគូដ៏វិសេសវិសាល ដែលតែងតែជួយដល់កម្ពុជានូវគ្រប់កាលៈទេសៈ ដើម្បីរួមចំណែកលើកិច្ចអភិវឌ្ឍទាំងពេលបច្ចុប្បន្ន និងអនាគត។
រដ្ឋាភិបាលចិន បានផ្តល់ហិរញ្ញប្បទាន ចំនួន៤២០០លានដុល្លារមកហើយ គិតត្រឹមខែកុម្ភៈឆ្នាំ២០១៧មកនេះ ដើម្បីជួយកសាងហេដ្ឋារចនាសម្ព័ន្ធរូបវន្ត វិស័យសុខាភិបាល អប់រំ កសិកម្ម សន្តិសុខ និងសង្គមជាដើម។ នេះជាការបញ្ជាក់របស់សម្ដេច ហ៊ុន សែន។
គួរបញ្ជាក់ថា បច្ចុប្បន្នទំហំពាណិជ្ជកម្មរវាងកម្ពុជា-ចិន មានចំនួន៤៨០០ដុល្លារ ដែលក្នុងកម្ពុជានាំចេញទៅចិន ចំនួន៨៣០លានដុល្លារ ខណៈដែលចិននាំចូលមកកម្ពុជា ៣៩០០លានដុល្លារ។ ចំណែកភ្ញៀវទេសចរចិន ដែលចូលមកប្រទេសកម្ពុជាក្នុងឆ្នាំ២០១៦ មានចំនួន៨៣០០០០នាក់ ដែលកើនឡើង២០ភាគរយបើធៀបនឹងឆ្នាំ២០១៥៕
Tag:
ហ៊ុន សែន
កម្ពុជា
ចិន
© រក្សាសិទ្ធិដោយ thmeythmey.com