ជាតិ
សមត្ថកិច្ចស្គាល់កន្លែងលាក់ខ្លួនលោក ឈាន ពិសិដ្ឋ ![](https://image.thmeythmey.com/pictures/2017/04/12/10122014130615khieu_sopheak_thmeythmey.jpg)
×![]()
ភ្នំពេញ៖ អ្នកនាំពាក្យក្រសួងមហាផ្ទៃលោក ខៀវ សុភ័គ បានឲ្យដឹងថា សមត្ថកិច្ចបានស្គាល់កន្លែងលាក់ខ្លួន របស់លោក ឈាន ពិសិដ្ឋ ហើយសមត្ថកិច្ចនឹងចាប់ខ្លួនបុគ្គលនេះ យកមកដាក់ទោសតាមច្បាប់។ លោក ឈាន ពិសិដ្ឋ ដែលកំពុងគេចខ្លួននេះ បានបង្កបញ្ហាផ្ទុះអាវុធមួយគ្រាប់ក្នុងអង្គភាព កាលពីថ្ងៃទី៩ ខែមេសា ។
លោក ខៀវ សុភ័គ បានប្រាប់សារព័ត៌មានថ្មីៗថា នៅពេលនេះ សមត្ថកិច្ចមានដីការពីតុលាការ ដែលបានបង្គាប់ចាប់ខ្លួនលោក ឈាន ពិសិដ្ឋ នៅក្នុងដៃហើយ។ ប៉ុន្តែសមត្ថកិច្ច ត្រូវការពេលវេលាតាមដានសកម្មភាពលោក ឈាន ពិសិដ្ឋ សិន។ អ្នកនាំពាក្យរូបនេះ បានបញ្ជាក់យ៉ាងខ្លីដូច្នេះថា៖«សមត្ថកិច្ចយើងបានស្គាល់កន្លែងលាក់ខ្លួនគេ (ឈាន ពិសិដ្ឋ) ហើយយើងកំពុងតាមដានគេ នៅពេលនេះ»។
តែយ៉ាងណា លោក ខៀវ សុភ័គ ពុំអាចបង្ហើបពីទីតាំងដែលលោក ឈាន ពិសិដ្ឋ កំពុងលាក់ខ្លួននោះទេ ដោយលោកបានលើកហេតុផលថា វាជារឿង ស៊ើបអង្កេតសម្ងាត់របស់សមត្ថកិច្ច។
គួរបញ្ជាក់ថា លោក ឈាន ពិសិដ្ឋ ដែលគេស្គាល់ថា ជាមន្ត្រីប៉ូលិសអន្តោប្រវេសន៍ដែលធ្លាប់មានជម្លោះជាមួយសកម្មជនគណបក្សសង្គ្រោះជាតិ កាលពីចុងឆ្នាំ២០១៦ កន្លងមក នៅបុស្តិ៍ច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យនោះ បានបង្កបញ្ហាផ្ទុះអាវុធមួយគ្រាប់ក្នុងអង្គភាព កាលពីថ្ងៃទី៩ ខែមេសា នេះ។ មួយថ្ងៃក្រោយករណីផ្ទុះអាវុធ រដ្ឋមន្ត្រីក្រសួងមហាផ្ទៃ សម្តេច ស ខេង បានសម្រេចដកឋានន្តរស័ក្តិ និងបណ្តេញឈ្មោះ ឈាន ពិសិដ្ឋ ចេញពីក្របខ័ណ្ឌនគរបាលជាតិភ្លាមៗផងដែរ កាលពីថ្ងៃទី១០ មេសា តាមសំណើអគ្គនាយកដ្ឋាននគរបាលអន្តោប្រវេសន៍ ៕
Tag:
ឈាន ពិសិដ្ឋ
មហាផ្ទៃ
អន្តោប្រវេសន៍
© រក្សាសិទ្ធិដោយ thmeythmey.com