ជាតិ
នយោបាយជាតិ
ព្រះរាជអាជ្ញាកោះហៅ លោក ជុន ច័ន្ទបុត្រ ចូលតុលាការថ្ងៃទី២ឧសភា
× ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ លោក សៀង សុខ បានចេញដីកាកោះហៅលោក ជុន ច័ន្ទបុត្រ អនុប្រធានវិទ្យុអាស៊ីសេរីឲ្យចូលបំភ្លឺសំណុំរឿងបន្លំខ្លួនចូលពន្ធនាគារ នៅសាលាដំបូងរាជធានីភ្នំពេញនៅម៉ោង៩ព្រឹកនៃថ្ងៃទី២ឧសភា។ លោក សៀង សុខ ក៏បានកោះហៅតំណាងរាស្ត្រគណបក្សសង្គ្រោះជាតិពីររូបទៀត គឺលោក ឡុង រី និងអ្នកស្រី មូរ សុខហួរ ក្នុងនាមសាក្សី ទៅឆ្លើយបំភ្លឺបន្តបន្ទាប់គ្នានៅថ្ងៃទី២៧ និង២៨ខែមេសានេះដែរនៅម៉ោង៩ព្រឹក។ ដីកាកោះទាំងបីត្រូវបានចុះហត្ថលេខានៅថ្ងៃទី២១ខែមេសានេះ។
កាលពីព្រឹកថ្ងៃទី១៩មេសា លោក ឡុង រី និងអ្នកស្រី មួរ សុខហួរ ដែលជាអ្នកតំណាងរាស្ត្រនៃគណបក្សសង្គ្រោះជាតិ បានចូលទៅសួរសុខទុក្ខសមាជិក និងអ្នកគាំទ្រគណបក្សនៅមន្ទីរឃុំឃាំងព្រៃស។ នៅក្នុងប្រតិភូនៃគណបក្សសង្គ្រោះជាតិ គេឃើញមានវត្តមានរបស់លោក ជុន ច័ន្ទបុត្រ ប្រធានវិទ្យុអាស៊ីសេរីនៅកម្ពុជា ចូលទៅក្នុងពន្ធនាគារដែរ។ វត្តមានរបស់មេដឹកនាំវិទ្យុអាស៊ីសេរី បាននាំឲ្យមានការចាត់វិធានការពីសំណាក់ក្រសួងមហាផ្ទៃ។
រដ្ឋមន្ត្រីក្រសួងមហាផ្ទៃ សម្តេច ស ខេង បានសម្រេចឈប់ឲ្យប្រតិភូគណបក្សសង្គ្រោះជាតិចូលសួរសុខទុក្ខសមាជិកខ្លួនទៀត ក៏បានពិចារណាអំពីវត្តមានរបស់លោក ជុន ចន្ទបុត្រនៅក្នុងប្រតិភូគណបក្សប្រឆាំងនៅក្នុងពន្ធនាគារ រហូតដល់មានការកោះហៅពីសាលាដំបូងរាជធានីភ្នំពេញតែម្តង៕
© រក្សាសិទ្ធិដោយ thmeythmey.com