កីឡាជាតិ
ជាតិ
ភ្នំពេញក្រោនស្វាគមន៍បឹងកេតដណ្តើមឈរលេខ៣ ឯទ័ពប៉ះវេស្ទើន ក្រោយប៉ូលិសជួបណាហ្គា កីឡាករ អ៊ិន សូដាវីដ ព្យាយាមបណ្តើរបាល់គេចពីការតាមរបស់កីឡករអគ្គិសនីកម្ពុជាក្នុងជំនួបនៅ RSN កាលពីសប្តាហ៍មុន។ រូបភាពពីហ្វេសប៊ុកក្លិបភ្នំពេញក្រោន
× ការប្រកួតកីឡាបាល់ទាត់ដណ្តើមពានរង្វាន់ក្របខណ្ឌមិត្តហ្វូនខេមបូឌានលីកប្រចាំឆ្នាំ២០១៧ បានឈានដល់សប្តាហ៍ទី៩ ដោយនៅថ្ងៃទី២៩ ខែមេសា នេះមានការប្រកួតចំនួន៣គូ។ ក្រុមភ្នំពេញក្រោនស្វាគមន៍ក្រុមភ្ញៀវបឹងកេតនៅកីឡដ្ឋាន RSN រីឯក្រសួងការពារជាតិ(ទ័ព)ប៉ះវេស្ទើនភ្នំពេញ មុនអគ្គស្នងការនគរបាលជាតិ(ប៉ូលិស)ទទួលណាហ្គាវើលនៅកីឡដ្ឋានស្តាតចាស់ដូចគ្នា។
ក្រុមបាល់ទាត់ភ្នំពេញក្រោនបើកទ្វារកីឡដ្ឋាន RSN ស្វាគមន៍ក្រុមភ្ញៀវបឹងកេតនាវេលាម៉ោង៦ល្ងាចនេះ ដើម្បីដណ្តើមឈរលេខរៀងទី៣ក្នុងសប្តាហ៍ទី៩នៃពានរង្វាន់ក្របខណ្ឌមិត្តហ្វូនខេមបូឌានលីកប្រចាំឆ្នាំ២០១៧។ ការជួបគ្នារវាងក្រុមទាំងពីរ នឹងក្លាយជាការប្រកួតមួយដ៏តានតឹង និងស្វិតស្វាញបំផុត ព្រោះបឹងកេតត្រូវការឈ្នះភ្នំពេញក្រោន ដើម្បីបង្កើនឱកាសប្រជែងឈរក្នុងតំបន់ Top2 ដែលមានក្រុមទ័ព និងស្វាយរៀង។ បច្ចុប្បន្នភ្នំពេញក្រោនកំពុងឈរលេខរៀងទី៤មាន១៤ពិន្ទុជាមួយជ័យជម្នះ៤ ស្មើ២ និងចាញ់២ ខណៈបឹងកេតឈរលេខរៀងទី៣មាន១៧ពិន្ទុក្រោយឈ្នះ៥ ស្មើ២ និងចាញ់១។
ជាមួយគ្នានេះ ក្រុមទ័ពក្រោយមិនអាចប្រើភាពមានប្រៀបក្នុងនាមជាម្ចាស់ផ្ទះដើម្បីទម្លាក់ក្រុមស្វាយរៀងពីកំពូលតារាងកាលពីសប្តាហ៍មុន នាវេលាម៉ោង៦ល្ងាចនេះ បើកទ្វារកីឡដ្ឋានស្តាតចាស់ស្វាគមន៍ក្រុមភ្ញៀវវេស្ទើនភ្នំពេញ។ ទ័ព រំពឹងអាចប្រើភាពជាម្ចាស់ផ្ទះទទួលបាន៣ពិន្ទុបន្ថែម ដើម្បីឈរកំពូលតារាងបណ្តោះអាសន្នជាមួយ២១ពិន្ទុ ខណៈស្វាយរៀងឈរកំពូលតារាងបច្ចុប្បន្នមាន២០ពិន្ទុ។ បច្ចុប្បន្នទ័ពឈរលេខរៀងទី២មាន១៨ពិន្ទុ ឯវេស្ទើនភ្នំពេញឈរលេខរៀងទី៩ដោយមាន៩ពិន្ទុ។
មុនជំនួបរវាងក្រុមទាំងពីរខាងលើនាវេលាម៉ោង៣រសៀល ក្រុមប៉ូលិស ប្រើកីឡដ្ឋានស្តាតចាស់ស្វាគមន៍ក្រុមណាហ្គាវើល ដែលទើបធ្លាក់ចេញពីតំបន់ Top4 កាលពីសប្តាហ៍ក្រោយចាញ់បឹងកេតក្នុងលទ្ធផល ២-១ នៅពហុកីឡដ្ឋានជាតិ។ ណាហ្គាវើល រំពឹងទទួលបាន៣ពិន្ទុពីប៉ូលិស ដើម្បីបង្កើនឱកាសប្រជែងក្នុងតំបន់ Top4 ម្តងទៀត។ បច្ចុប្បន្នក្រុមដែលដឹកនាំដោយ លោក មាស ចាន់ណា មួយនេះ កំពុងឈរលេខរៀងទី៥ជាមួយ១២ពិន្ទុ ខណៈប៉ូលិសឈរលេខរៀងទី៨ ដោយមាន៩ពិន្ទុ៕
*កម្មវិធីប្រកួតពានរង្វាន់ក្របខណ្ឌលីកកំពូលប្រចាំថ្ងៃទី២៩ ខែមេសា ឆ្នាំ២០១៧៖
- ម៉ោង៣:០០នាទី៖ ប៉ូលិស ជួប ណាហ្គាវើល នៅកីឡដ្ឋានស្តាតចាស់
- ម៉ោង៦:០០នាទី៖ ទ័ព ជួប វេស្ទើនភ្នំពេញ នៅកីឡដ្ឋានស្តាតចាស់
- ម៉ោង៦:០០នាទី៖ ភ្នំពេញក្រោន ជូប បឹងកេត នៅកីឡដ្ឋាន RSN
Tag:
Cambodian League 2017
បាល់ទាត់
© រក្សាសិទ្ធិដោយ thmeythmey.com