អន្តរជាតិ
ទំហំសេដ្ឋកិច្ចទ្វេភាគីចិន-អាស៊ាននឹងកើនដល់ ១ទ្រីលានដុល្លារឆ្នាំ ២០២០
× ទំនាក់ទំនងពាណិជ្ជកម្មរវាងចិន និងអាស៊ានកើនឡើងជាបន្តបន្ទាប់រយៈពេលប៉ុន្មានឆ្នាំចុងក្រោយ។ បើតាមមន្ត្រីជាន់ខ្ពស់អាស៊ាន ទំហំពាណិជ្ជកម្មទ្វេភាគីនេះនឹងកើនឡើងដល់ ១ទ្រីលានដុល្លារនៅត្រឹមឆ្នាំ ២០២០ខាងមុខនេះ។
ទំហំពាណិជ្ជកម្មទ្វេភាគីរវាងកម្ពុជានិងអាស៊ាននឹងកើនឡើងដល់ ១ទ្រីលានដុល្លារនៅត្រឹមឆ្នាំ ២០២០ ខាងមុខ។ នេះជាការបញ្ជាក់របស់អគ្គលេខាធិការរងអាស៊ាន ទទួលបន្ទុកកិច្ចការសហប្រតិបត្តិការ AKP Mochtan ក្នុងកិច្ចពិភាក្សាមួយស្តីពីដំណើរការកសាងសហគមន៍អាស៊ាននិងទំនាក់ទំនងចិន-អាស៊ាន។
យោងតាមសារព័ត៌មាន Asia One កិច្ចពិភាក្សានេះត្រូវបានរៀបចំឡើងដោយបេសកម្មសាធារណរដ្ឋចិនមកកាន់អាស៊ាន នៅអំឡុងពេលនៃកិច្ចប្រជុំកំពូលខ្សែក្រវ៉ាត់មួយវិថីមួយ( OBOR) ដើម្បីកិច្ចសហប្រតិបត្តិការអន្តរជាតិ។
វេទិកាពិភាក្សានេះ ក៏ត្រូវរៀបចំឡើងចំខួបលើកទី ៥០នៃការបង្កើតអាស៊ានផង ហើយវាក៏មានគោលដៅសំខាន់ជំរុញនិងលើកស្ទួយកិច្ចសហប្រតិបត្តិការរវាងចិននិងអាស៊ានតាមរយៈគំនិតផ្តួចផ្តើមខ្សែក្រវ៉ាត់មួយវិថីមួយ និងធ្វើយ៉ាងណាធ្វើឲ្យទំនាក់ទំនងនេះកាន់តែស៊ីជម្រៅ។
ថ្លែងក្នុងវេទិកាពិភាក្សានេះ លោក Mochtan កត់សម្គាល់ដូច្នេះថា៖«កិច្ចព្រមព្រៀងស្តីពីកិច្ចសហប្រតិបត្តិការ និងយន្តការទាំងអស់ដែលត្រូវបានបង្កើតឡើងរវាងចិននិងអាស៊ានលើវិស័យជាច្រើនបាននាំមកនូវឱកាសជាច្រើនសម្រាប់ចិននិងអាស៊ាន។ ទស្សនវិស័យអាស៊ានឆ្លើយតបនឹងគម្រោងខ្សែក្រវ៉ាត់មួយវិថីមួយរបស់ចិននឹងនាំគ្រប់គ្នាទៅរកសុខដុមរមានិងវិបុលភាព»។
ក្រៅពីការពង្រឹងទំនាក់ទំនងនិងកិច្ចសហប្រតិបត្តិការតាមកិច្ចសហប្រតិបត្តិការគំនិតផ្តួចផ្តើមខ្សែក្រវ៉ាត់មួយវិថីមួយ ចិននិងអាស៊ាននឹងព្យាយាមពង្រឹងចំណងពាណិជ្ជកម្មបន្ថែមទៀតតាមរយៈការបង្កើតកិច្ចព្រមព្រៀងពាណិជ្ជកម្មរួមគ្នា។ បច្ចុប្បន្ននេះ អាស៊ាននិងចិន ក៏ដូចជាដៃគូសន្ទនាអាស៊ាន ៥ផ្សេងទៀតកំពុងពន្លឿនការចរចាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ (RCEP) ថែមទៀត។
Tag:
អាស៊ាន
ចិន
OBOR
AKP Mochtan
© រក្សាសិទ្ធិដោយ thmeythmey.com