តុលាការកំពូល បើកសវនាការលើសំណុំរឿងលោក គឹម សុខ នៅព្រឹកថ្ងៃសុក្រនេះ

ជាតិ

តុលាការកំពូល បើកសវនាការលើសំណុំរឿងលោក គឹម សុខ នៅព្រឹកថ្ងៃសុក្រនេះ

09, Jun 2017 , 10:06 am

រូបភាព

ដោយ: ថ្មីៗ

ភ្នំពេញ៖ នៅព្រឹកថ្ងៃទី៩ ខែមិថុនា ឆ្នាំ២0១៧នេះ តុលាការកំពូល បានបើកសវនាការលើសំណុំរឿងរបស់លោក គឹម សុខ អ្នកវិភាគនយោបាយ ដែលកំពុងជាប់ពន្ធនាគារព្រៃស ដោយសារបណ្តឹងរបស់សម្តេច ហ៊ុន សែន នាយករដ្ឋមន្ត្រីកម្ពុជា។ ការបើកសវនាការនាព្រឹកនេះ គឺធ្វើឡើងតាមសំណើរបស់មេធាវី ដែលការពារក្តីឲ្យលោកគឹម សុខ។

លោក ជូង ជូងី ដែលជាមេធាវីរបស់លោក គឹម សុខ បានប្តឹងទៅតុលាការកំពូល ដើម្បីសុំជំទាស់នឹងការឃុំលោក គឹម សុខ។ លោកមេធាវី ជូង ជូងី ធ្លាប់ប្តឹងទៅសាលាឧទ្ធរណ៍ម្តងរួចទៅហើយ ដើម្បីសុំជំទាស់នឹងរឿងនេះ ប៉ុន្តែមិនទទួលបានជោគជ័យ។

លោក គឹម សុខ ដែលជាអ្នកតាមដានបញ្ហាសង្គមនិងស្ថានភាពនយោបាយ ត្រូវបានចៅក្រមស៊ើបសួរនៃសាលាដំបូងរាជធានីភ្នំពេញ សម្រេចយកទៅឃុំខ្លួនបណ្តោះអាសន្ន ក្រោមបទចោទ «បរិហារកេរ្តិ៍ជាសាធារណៈ» និងបទ «ញុះញង់ ឲ្យមានភាពវឹកវរដល់សន្តិសុខសង្គម» តាមពាក្យបណ្តឹងរបស់សម្តេច ហ៊ុន សែន ដែលជានាយរដ្ឋមន្ត្រី និងជាប្រធានគណបក្សប្រជាជនកម្ពុជា។ បើតាមលោក គី តិច ដែលជាមេធាវីរបស់សម្តេច ហ៊ុន សែន ការប្តឹងនេះ គឺដោយសារតែលោក គឹម សុខ បានចោទថាគណបក្សប្រជាជនកម្ពុជា នៅពីក្រោយខ្នងនៃអំពើឃាតកម្មលើលោក កែម ឡី។ នៅក្នុងពាក្យបណ្តឹងនេះ សម្តេច ហ៊ុន សែន បានទារសំណងជំងឺចិត្តចំនួន៥០ម៉ឺនដុល្លារ ពីលោក គឹម សុខ។

លោក គឹម សុខ នៅរងពាក្យបណ្តឹងមួយទៀត ពីសម្តេច ហ៊ុន សែន។ បណ្តឹងលើកទីពីរនេះ គឺពាក់ព័ន្ធនឹងការលើកឡើងរបស់ គឹម សុខ ដែលចោទថា ប្រព័ន្ធមួយ ស្ថិតនៅក្រោមការគ្រប់គ្រងរបស់រដ្ឋាភិបាលបច្ចុប្បន្ន មានការសម្លាប់មនុស្ស ហើយរកឃាតកមិនឃើញ។ សម្រាប់បណ្តឹងនេះ សម្តេច ហ៊ុន សែន ទារសំណងជំងឺចិត្តពីលោក គឹម សុខ ២៥០០ដុល្លារអាមេរិក៕