អន្តរជាតិ
ចិននិងរុស្ស៊ី ប្រាប់ឲ្យអាមេរិក-កូរ៉េខាងត្បូង និងកូរ៉េខាងជើងឈប់បង្កបញ្ហាដាក់គ្នា ប្រធានាធិបតីចិន ស៊ីន ជីនភីង និងសមភាគីរុស្ស៊ី វ្ល៉ាឌីមៀ ពូទីន នៅឯវិមានក្រេមឡាំង (រូបភាព Xinhua)
× ប្រធានាធិបតីរុស្ស៊ី វ្ល៉ាឌីមៀ ពូទីន និងប្រធានាធិបតីចិន ស៊ី ជីនភីង បានឯកភាពគ្នាលើកជាសំណើឲ្យអាមេរិក និងកូរ៉េខាងត្បូង ក៏ដូចជាកូរ៉េខាងជើង បញ្ឈប់ការបង្កបញ្ហានៅឧបទ្វីបកូរ៉េ ដែលជាហេតុនាំឲ្យភាគីម្ខាងៗយកធ្វើជាលេសឆ្លើយតបបាន។ រុស្ស៊ី និងចិន បានប្រាប់ឲ្យកូរ៉េខាងជើងផ្អាកកម្មវិធីនុយក្លេអ៊ែររបស់ខ្លួន ហើយអាមេរិក និងកូរ៉េខាងត្បូង ក៏ត្រូវឈប់ធ្វើសមយុទ្ធរួមគ្នាដែរ។ សម្រាប់រុស្ស៊ី និងចិន ការបញ្ឈប់សកម្មភាពបង្កហេតុនេះ នឹងបង្កជាបរិយាកាសល្អសម្រាប់ការរំសាយនុយក្លេអ៊ែរ។
ចិន និងរុស្ស៊ី បានបង្ហាញជំហររួមគ្នាក្នុងការដោះស្រាយវិបត្តិនុយក្លេអ៊ែររបស់កូរ៉េខាងជើង។ មហាអំណាចទាំងពីរ ដែលមានទំនាក់ទំនងជិតស្និទ្ធជាមួយកូរ៉េខាងជើង បានស្នើឲ្យភាគីទាំងសងខាងបញ្ឈប់ទង្វើដែលធ្វើឲ្យកម្ដៅនៃភាពតានតឹងនៅឧបទ្វីបកូរ៉េកើនឡើង ក៏ដូចជាធ្វើឲ្យភាគីម្ខាងទៀតមិនសប្បាយចិត្ត។ ចិន និងរុស្ស៊ី ក៏បង្ហាញជំហរជំទាស់ការប្រើប្រាស់កម្លាំងយោធាដើម្បីដោះស្រាយបញ្ហាសាំញាំនេះដែរ។
ជំហររួមគ្នានេះ ត្រូវបានប្រកាសអំឡុងពេលទស្សនកិច្ចប្រធានាធិបតីចិន ស៊ី ជីនភីង នៅរុស្ស៊ី។ លោក ស៊ី ជីនភីង បានជួបពិភាក្សាការងារជាមួយសមភាគីរុស្ស៊ី វ្ល៉ាឌីមៀ ពូទីន នៅថ្ងៃទី៤ ខែកក្កដា ដោយពិភាក្សាលើបញ្ហាជាច្រើនរាប់ទាំងវិបត្តិនៅឧបទ្វីបកូរ៉េផង។ រុស្ស៊ី និងចិន បានឯកភាពគ្នាជំរុញគំនិតផ្ដួចផ្ដើមប្រទេសទាំងពីរ គឺការដោះស្រាយបញ្ហាកូរ៉េខាងជើងជាជំហានៗរបស់រុស្ស៊ី និងជំហររបស់ចិនក្នុងការផ្អាកព្រមគ្នានៃកម្មវិធីនុយក្លេអ៊ែរកូរ៉េខាងជើង និងសមយុទ្ធរួមគ្នាអាមេរិក-កូរ៉េខាងត្បូង។
ក្នុងសន្និសីទកាសែតរួមគ្នាជាមួយប្រមុខរដ្ឋចិន លោក ពូទីន បញ្ជាក់ថា រុស្ស៊ី និងចិន មានជំហរដូចគ្នា និងស្រដៀងគ្នាលើបញ្ហាជាច្រើន ហើយភាគីទាំងពីរនឹងបន្តការសម្របសម្រួលនយោបាយការបរទេសទៀត។ មិនត្រឹមតែជំហរដូចគ្នាលើបញ្ហានុយក្លេអ៊ែរកូរ៉េខាងជើងទេ រុស្ស៊ី និងចិនក៏មានជំហរស្របគ្នាក្នុងការប្រឆាំងវត្តមានប្រព័ន្ធការពារមីស៊ីលអាកាស THAAD នៅកូរ៉េខាងត្បូងផងដែរ។ ប្រទេសទាំងពីរបានប្រាប់ឲ្យអាមេរិកផ្អាកផែនការពង្រាយ THAAD ព្រោះប៉ះពាល់ស្ថិរភាពតំបន់។
បើតាមសារព័ត៌មាន RT ដែលស្រង់ប្រភពពីសេចក្ដីថ្លែងការណ៍រដ្ឋមន្ត្រីការបរទេសទាំងពីរ ទាំងរុស្ស៊ី ទាំងចិន សុទ្ធតែយល់ដូចគ្នាថា ការពង្រាយ THAAD មិនបានជួយអ្វីសោះដល់ការលុបបំបាត់នុយក្លេអ៊ែរពីឧបទ្វីបកូរ៉េ និងការរក្សាសន្តិភាព ស្ថិរភាពក្នុងតំបន់ទៅទៀត។ ម្យ៉ាងទៀត វត្តមានប្រព័ន្ធការពារ THAAD នៅកូរ៉េខាងត្បូង ក៏បានប៉ះពាល់ខ្លាំងដល់ប្រយោជន៍យុទ្ធសាស្ត្ររបស់មហាអំណាចទាំងពីរ ទោះជាអាមេរិកអះអាងថានេះជាវិធានការការពារខ្លួនក៏ដោយ។
ទាក់ទិនការរលុបបំបាត់នុយកក្លេអ៊ែរនេះ ទាំងចិន ទាំងរុស្ស៊ី សុទ្ធតែមិនចង់ដោះស្រាយបញ្ហាដោយផ្ទាល់ និងជំរុញឲ្យភាគីជម្លោះទាំងសងខាង គឺកូរ៉េខាងជើង និងអាមេរិក-កូរ៉េខាងត្បូង រួមគ្នាដោះស្រាយបញ្ហាឲ្យចប់។ ចិនរងសម្ពាធខ្លាំងពីអាមេរិកឲ្យជួយដាក់សម្ពាធលើកូរ៉េខាងជើង ព្រោះអាមេរិកជឿថាចិនមានទឹកមាត់ប្រៃជាងខ្លួន ប៉ុន្តែមកទល់ពេលបញ្ហានៅមិនទាន់រកច្រកចេញបានដដែល ខណៈកូរ៉េខាងជើងបានបាញ់មីស៊ីលអន្តរទ្វីបមួយទៀតកាលពីថ្ងៃទី៤ ខែកក្កដា៕
Tag:
ចិន
រុស្ស៊ី
អាមេរិក
កូរ៉េខាងត្បូង
កូរ៉េខាងជើង
នុយក្លេអ៊ែរ
© រក្សាសិទ្ធិដោយ thmeythmey.com