ជាតិ
អតីតសិស្សវិទ្យាល័យក្រុងព្រះសីហនុម្នាក់ នឹងផ្ដល់កុំព្យូទ័រម្នាក់១គ្រឿងដល់សិស្សនិទ្ទេសA ប្រចាំខេត្តនេះ លោក នី ផល្លី រូបភាពពីហ្វេសប៊ុក លោក នី ផល្លី
×
សម័យប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០១៧នេះ នឹងប្រព្រឹត្តទៅនៅថ្ងៃទី ២១ សីហាខាងមុខ។ លោក នី ផល្លី អតីតសិស្សវិទ្យាល័យក្រុងព្រះសីហនុ បច្ចុប្បន្នជាអគ្គលេខាធិការងនៃគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា បានប្រកាសផ្ដល់កុំព្យូទ័រយួរដៃ ម្នាក់មួយគ្រឿង ដើម្បី លើកទឹកចិត្តដល់សិស្សដែលប្រឡងបាននិទ្ទេស A ប្រចាំខេត្តនេះ។
សិស្សថ្នាក់ទី១២ នៅក្នុងខេត្តព្រះសីហនុ ដែលទទួលលទ្ធផលនិទ្ទេស A ក្នុងការប្រឡងបាក់ឌុបខាងមុននេះ នឹងទទួលបានរង្វាន់លើកទឹកចិត្ត ជាកុំព្យូទ័រយួរដៃ ម្នាក់មួយគ្រឿង ពីអតីតសិស្សវិទ្យាល័យក្រុងព្រះសីហនុម្នាក់ គឺលោក នី ផល្លី។ ជាអគ្គលេខាធិការងនៃគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជាផង លោក នី ផល្លី បានប្រាប់សារព័ត៌មានថ្មីៗ តាមទូរសព្ទថា ដូច្នេះថា៖«ការផ្ដល់រង្វាន់នេះ គឺជាការលើកទឹកចិត្ត និងជំរុញដល់យុវជន ឲ្យខិតខំប្រឹងប្រែងរៀនសូត្រ ដើម្បីទទួលបានលទ្ធផលល្អក្នុងការប្រឡងបាក់ឌុបខាងមុខ»។ មន្ត្រីរូបនេះបន្ថែមថា៖ «កាលពីឆ្នាំ២០១៦កន្លងទៅ ខេត្តព្រះសីហនុមានសិស្សនិទ្ទេសតែ ៧នាក់ប៉ុណ្ណោះ។ ហើយការផ្ដល់រង្វាន់នេះ ក៏អាចកត្តាជំរុញឲ្យសិស្សានុសិស្សក្នុងខេត្តនេះ ជាប់បាននិទ្ទេស A ច្រើនផងដែរ»។
នេះជាការផ្ដល់រង្វាន់លើកទឹកចិត្ត លើកដំបូងរបស់លោក នី ផល្លី ដែលអះអាងទៀតថា ប្រសិនបើការផ្ដល់រង្វាន់នេះ មានឥទ្ធិពលអាចឲ្យសិស្សខិតខំប្រឹងប្រែងរៀន លោក នឹងបន្តផ្តល់ការលើកទឹកនៅឆ្នាំបន្តបន្ទាប់ទៀត។
អតីតសិស្សវិទ្យាល័យក្រុងព្រះសីហនុរូបនេះ ក៏នឹងរៀបចំសិក្ខាសាលាតម្រង់ទិសមួយដែរ នៅក្រោយការប្រឡងបាក់ឌុប ដើម្បីផ្តល់ភាពងាយស្រួលដល់សិស្សានុសិស្សងាយស្រួលរើសជំនាញ និងងាយរកការងារធ្វើក្រោយរៀនចប់។
សូមរម្លឹកថា សម័យប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០១៦-២០១៧នេះ នឹងប្រព្រឹត្តទៅនៅថ្ងៃទី ២១ សីហា។ បើតាមក្រសួងអប់រំ ឆ្នាំនេះ មានមណ្ឌលប្រឡងចំនួន ១៧៧ និងបែងចែកជា ៤,១៥៤ បន្ទប់ប្រឡងនៅទូទាំងប្រទេស៕
Tag:
បាក់ឌុប
និទ្ទេសA
នី ផល្លី
ព្រះសីហនុ
© រក្សាសិទ្ធិដោយ thmeythmey.com