ជាតិ
×![]()
ដោយ: ថ្មីៗ
សភាពាណិជ្ជកម្មនិងឧស្សាហកម្មបារាំង-កម្ពុជា (CCIFC) រួមសហការជាមួយស្ថានទូតបារាំងប្រចាំកម្ពុជា នឹងរៀបចំបុណ្យជាតិបារាំង នៅមជ្ឈមណ្ឌលកោះពេជ្រ នារាត្រីថ្ងៃព្រហស្បតិ៍ ទី១៣ ខែកក្កដា ឆ្នាំ២០១៧ ចាប់ពីម៉ោង៦ល្ងាចដល់ម៉ោង១២អាធ្រាត្រ។ ការប្រារព្ធព្រឹត្តិការណ៍ប្រចាំឆ្នាំដ៏សំខាន់របស់បារាំងនេះ ធ្លាប់បានរៀបចំម្តងហើយកាលពីឆ្នាំមុន ដោយមានអ្នកចូលរួមជាង១២០០នាក់។
យោងតាមសេចក្តីប្រកាសព័ត៌មានរបស់ស្ថានទូតបារាំង ពិធីបុណ្យនេះនឹងអនុញ្ញាតឲ្យពលរដ្ឋបារាំង និងមិត្តភក្តិនៃប្រទេសបារាំងទាំងអស់ ចូលរួមអបអរវប្បធម៌បារាំង នៅក្នុងបរិយាកាសដ៏សប្បាយរីករាយមួយ។ រាត្រីនោះនឹងមានការទទួលទានអាហារពេលល្ងាចបែបបារាំង និងការរាំរែកកម្សាន្ត ដែលជាកម្មវិធីមិនអាចខ្វះបាននៅក្នុងការប្រារព្ធពិធីបុណ្យប្រជាប្រិយជាតិនៅប្រទេសបារាំង ហើយក្រៅពីនោះនឹងមានព្រឹត្តិការណ៍គួរអោយភ្ញាក់ផ្អើលផ្សេងៗទៀតជាច្រើន។
សូមបញ្ជាក់ថា ម្ហូបអាហារបែបបារាំង ដែលត្រូវបម្រើជូនភ្ញៀវនៅតាមតុនីមួយៗ ត្រូវបានរៀបចំយ៉ាងសម្រិតសម្រាំងឡើងដោយគណៈកម្មការ Good France Cambodia។ ក្រៅពីការប្រគុំតន្ត្រីនិងការរាំរែកកម្សាន្តសម្រាប់មនុស្សធំ នឹងមានការរៀបចំកម្មវិធីកម្សាន្តដោយឡែកសម្រាប់កុមារផងដែរ។
អ្នកដែលមានបំណងចូលរួមក្នុងរាត្រីសមោសរនេះ ត្រូវទាក់ទងទិញសំបុត្រទុកជាមុន ដោយតម្លៃ២៥ដុល្លារអាមេរិកសម្រាប់មនុស្សធំ ១០ដុល្លារសម្រាប់កុមារអាយុក្រោម១២ឆ្នាំ និងមិនគិតថ្លៃសម្រាប់ក្មេងអាយុក្រោម៣ឆ្នាំ៕
Tag:
កម្ពុជា-បារាំង
បុណ្យជាតិបារាំង
© រក្សាសិទ្ធិដោយ thmeythmey.com
«ទាយជ្ជទាន»មានន័យដូចម្តេច?
1 សប្តាហ៍
