ព្រះពុទ្ធរូបពីរអង្គ ដែលរកឃើញពេលកំណាយឆ្នាំ២០១១ នឹងត្រូវតម្កល់នៅទីតាំងដើមក្នុងប្រាសាទតាព្រហ្ម

ជាតិ

ព្រះពុទ្ធរូបពីរអង្គ ដែលរកឃើញពេលកំណាយឆ្នាំ២០១១ នឹងត្រូវតម្កល់នៅទីតាំងដើមក្នុងប្រាសាទតាព្រហ្ម

08, Jul 2017 , 5:09 pm

រូបភាព

រូបភាពពីអាជ្ញាធរជាតិអប្សរា

ដោយ:

ភ្នំពេញ៖ ព្រះពុទ្ធរូបពីរអង្គ ដែលត្រូវបានរកឃើញពេលធ្វើកំណាយក្នុងអំឡុងពេលជួសជុលប្រាសាទតាព្រហ្មកាលពីឆ្នាំ ២០១១ នឹងត្រូវយកទៅតម្កល់នៅទីតាំងដើមវិញ ពោលគឺក្នុងសាលរបាំនៃប្រាសាទតាព្រហ្ម។ នេះបើតាមព័ត៌មានដែលផ្សព្វផ្សាយលើទំព័រហ្វេសប៊ុករបស់អាជ្ញាធរជាតិអប្សរា នៅថ្ងៃទី៨ខែកក្កដានេះ។

លោក ចាន់ ឡាយ អ្នកគ្រប់គ្រងការដ្ឋានជួសជុលប្រាសាទតាព្រហ្ម ឲ្យដឹងថា ក្រោយមានការយល់ព្រមពីអ្នកជំនាញការជាន់ខ្ពស់នៃគណៈកម្មាធិការ ICC-ANGKOR ក្រុមការងារលោកនឹងយកព្រះពុទ្ធរូបទៅតម្កល់នៅសាលរបាំដែលជាទីតាំងដើម ដើម្បីឲ្យពលរដ្ឋ និងភ្ញៀវទេសចរទស្សនា និងគោរពបូជា។ លោកបញ្ជាក់ថា ព្រះពុទ្ធរូបពីរអង្គនេះ ជាព្រះពុទ្ធរូបប្រក់នាគ ដែលមានតែដងខ្លួនបាត់ព្រះកេស។

ប៉ុន្តែចំពោះកាលបរិច្ឆេទនៃការការដង្ហែព្រះពុទ្ធរូបយកទៅតម្កល់ លោក ចាន់ ឡាយ មិនទាន់អាចបញ្ជាក់បានឡើយ ដោយសារការជួសជុលសាលរបាំមិនទាន់រួចរាល់ស្ថាពរ។

គួរបញ្ជាក់ថា ការជួសជុលប្រាសាទតាព្រហ្មបានឈានដល់ដំណាក់កាលទីពីរ (ឆ្នាំ២០១៥-២០២៥) ដែលគម្រោងស្ថិតក្រោមកិច្ចសហការកម្ពុជា-ឥណ្ឌានេះ មកទល់សព្វថ្ងៃកំពុងជួសជុលសាលរបាំ៕