ព្រះមហាក្សត្រ យាងជាព្រះរាជាធិបតីក្នុងពិធី ដាំដើមឈើជិត ១ ម៉ឺនដើម

ជាតិ

ព្រះមហាក្សត្រ យាងជាព្រះរាជាធិបតីក្នុងពិធី ដាំដើមឈើជិត ១ ម៉ឺនដើម

09, Jul 2017 , 2:07 pm

រូបភាព

រូបពីហ្វេសប៊ុកក្រសួងកសិកម្ម រុក្ខាប្រមាញ់ និងនេសាទ

ដោយ: ថ្មីៗ

ព្រះករុណា ព្រះបាទសម្តេច ព្រះបរមនាថ នរោត្តម សីហមុនី បានយាងជាព្រះរាជាធិបតីក្នុងពិធី រុក្ខទិវា ដែលប្រារព្ធឡើងនៅស្រុកអង្គស្នួល ខេត្តកណ្តាល នៅថ្ងៃទី ៩ ខែកក្កដា នេះ។

មន្ត្រីរាជវាំង មន្ត្រីព្រឹទ្ធសភាព រដ្ឋសភា និងមន្ត្រីក្រសួងកសិកម្ម ជាដើម បានអមដំណើរព្រះរាជា យាងទៅដាំដើមឈើ ស្ថិតនៅទីតាំងស្ថានីយផ្សព្វផ្សាយ និងស្តារព្រៃឈើទួលព្រេច នៅក្នុងឃុំទួលព្រេច ស្រុកអង្គស្នួល ខេត្តកណ្តាល។ បើតាមលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលបានថ្លែងនៅក្នុងព្រះរាជពិធី រុក្ខទិវា នៅថ្ងៃទី ៩ ខែកក្កដា នោះ ការដាំដើមឈើសម្រាប់ពិធីរុក្ខទិវា នៅឆ្នាំនេះ ធ្វើឡើងនៅលើផ្ទៃដីទំហំ១០ហិកតា ហើយកូនឈើដែលត្រូវយកមកដាំ សរុបចំនួន៨,៨៣០ ដើម ដោយមានប្រភេទឈើក្រញូង ធ្នង់ និងគីនីន ជាដើម។

លោក សាខុន បន្ថែមថា គោលបំណងសំខាន់នៃពិធីរុក្ខទិវានេះ ដើម្បីបំផុតស្មារតីចូលរួមស្តារ និងដាំដើមឈើឡើងវិញ ដោយធ្វើឲ្យប្រសើរឡើងនូវសោភ័ណភាព ទេសភាពធម្មជាតិ បរិស្ថាន រក្សានិយតភាពប្រភពទឹក ការពារទីជម្រាលនិងជីវចម្រុះ កាត់បន្ថយការបញ្ចេញឧស្ម័នទៅបរិយាកាស ព្រមទាំងជួយទ្រទ្រង់ជីវភាពរស់នៅ ប្រជាពលរដ្ឋរាប់លាននាក់ ដែលពឹងអាស្រ័យទៅលើផលអនុផលព្រៃឈើ។ លោករដ្ឋមន្ត្រី ក៏អំពាវនាវឲ្យពលរដ្ឋគ្រប់រូប ចូលរួមរក្សាការពារ ប្រភពទ្រទ្រង់ជីវិតនេះ ដោយរក្សាការពារ អភិរក្ស និងអភិវឌ្ឍព្រៃឈើ ឲ្យមានប្រសិទ្ធិភាព និងនិរន្តរភាព ដើម្បីជាប្រយោជន៍ដល់មនុស្សជាតិយើងជំនាន់បច្ចុប្បន្ន និងជំនាន់ក្រោយៗទៀត៕

ដោយ៖ យន គន្ធា

រូបពីហ្វេសប៊ុកក្រសួងកសិកម្ម