យុវជនចិន៤នាក់ស្ម័គ្រចិត្តរស់នៅក្នុងបន្ទប់ពិសោធន៍ដូចឋានព្រះចន្ទរយៈពេល២០០ថ្ងៃ

អន្តរជាតិ

យុវជនចិន៤នាក់ស្ម័គ្រចិត្តរស់នៅក្នុងបន្ទប់ពិសោធន៍ដូចឋានព្រះចន្ទរយៈពេល២០០ថ្ងៃ

12, Jul 2017 , 7:39 pm

រូបភាព

ដោយ: ធីតា

យុវជនចិន៤នាក់ បានស្ម័គ្រចិត្តរស់ក្នុងបន្ទប់ពិសោធន៍មួយដោយកាត់ផ្តាច់ទំនាក់ទំនងខាងក្រៅជាបណ្តោះអាសន្នរយៈពេល២០០ថ្ងៃ។ នេះជាផ្នែកមួយនៃគម្រោងវិទ្យាសាស្ត្រដែលមានឈ្មោះថា Yuengong-1 ឬ Lunar Palace 365 (វិមានចន្ទ)ដែលចង់ពិសោធន៍ការរស់នៅរបស់មនុស្សនៅឋានព្រះចន្ទ។

ចិនធ្លាប់បានប្រកាសថា ពួកគេនឹងប្រើប្រាស់បរិយាកាសចន្លោះភពផែនដី និងភពព្រះចន្ទដើម្បីបង្កើតឋាមពល ហើយនៅឆ្នាំ២០៣៦ខាងមុខ ពួកគេនឹងបញ្ជូនមនុស្សឲ្យទៅដល់ឋានព្រះចន្ទជាលើកដំបូងផងដែរ។

មុនឈានដល់គោលដៅខ្លួន កាលពីថ្ងៃអាទិត្យ ទី៩ ខែកក្កដា និស្សិតចិន៤នាក់នៃសាកលវិទ្យាល័យ Beihang ក្រុងប៉េកាំង បានស្ម័គ្រចិត្តចូលក្នុងបន្ទប់ពិសោធន៍ដែលមានឈ្មោះថា Lunar Palace-1 ។ បើតាម Reuters នេះជាគម្រោងពិសោធន៍ផ្ទាល់របស់សាកលវិទ្យាល័យ Beihang ដោយតម្រូវឲ្យនិស្សិតទាំង៤រូបរស់នៅក្នុងបន្ទប់ដែលមានសណ្ឋានដូចព្រះចន្ទរយៈពេល២០០ថ្ងៃ។

បន្ទប់ «Lunar Palace» នោះ មានទំហំ១៦០ម៉ែត្រ ដោយមានគ្រែគេង៤ បន្ទប់សម្អាតខ្លួន បន្ទប់សម្រាកព្យាបាល ហើយក៏មានការដាំបន្លែនៅជុំវិញនោះផងដែរ។ ជាមួយគ្នានេះផងដែរ ក្រុមនិស្សិតទាំង៤ ក៏ត្រូវតម្រូវឲ្យចាត់ចែងកាកសំណល់ ជាពិសេសលាមករបស់ខ្លួនផងដែរ សម្រាប់ការរស់នៅរយៈពេល២០០ថ្ងៃក្នុង Lunar Palace នៅបរិវេណសាកលវិទ្យាល័យ Beihang។

ទាក់ទងនឹងការពិសោធន៍ជីវិតរស់នៅឋានព្រះចន្ទ វាជាដំណាក់កាលទីពីរហើយ ដោយកាលពីឆ្នាំ២០១៤ មនុស្ស៤នាក់បានសាកល្បងប្រកបដោយជោគជ័យក្នុងការរស់នៅស្ថានភាពបែបនេះរយៈពេល១០៥ថ្ងៃ ចំណែកឯដំណាក់កាលទីបី នឹងមានរយៈពេល៣៦៥ថ្ងៃ៕