ជាតិ
នយោបាយជាតិ
សាលាឧទ្ធរណ៍ នឹងប្រកាសសាលដីកាលើសំណុំរឿងអ្នកស្រី ទេព វន្នី នៅដើមខែសីហា
×
ភ្នំពេញ៖ ក្រោយបញ្ចប់សវនាការ សាលាឧទ្ទរណ៍ បាកកំណត់យកថ្ងៃទី៨ ខែសីហា ឆ្នាំ២0១៧ ដើម្បីប្រកាសសាលដីកាលើបណ្តឹងរបស់អ្នកស្រី ទេព វន្នី សកម្មជនបឹងកក់ ដែលសុំប្រឆាំងនឹងសាលាដំបូងរាជធានីភ្នំពេញ ដែលផ្តន្ទាទោសអ្នកស្រី ឲ្យជាប់ពន្ធនាគាររយៈពេល២ឆ្នាំកន្លះ ទាក់ទងនឹងអំពើហិង្សា កាលពីឆ្នាំ២0១៣។ មន្ត្រីពន្ធានគារ បានដឹកអ្នកស្រី ទេព វន្នី ទៅកាន់សាលាឧទ្ធរណ៍ ដើម្បីចូលរួមសវនាការ នៅរសៀលថ្ងៃទី២៧ ខែកក្កដា ឆ្នាំ២0១៧នេះ។
ខណៈសវនាការកំពុងតែដំណើរការ ប្រជាពលរដ្ឋមួយចំនួន ជាពិសេសសកម្មជនបឹងកក់ បានប្រមូលផ្តុំគ្នានៅមុខសាលាឧទ្ធរណ៍ ដើម្បីសុំឲ្យដោះលែងលោកស្រី ទេព វន្នី។ ប្រជាពលរដ្ឋទាំងនោះ បានស្រែកឲ្យដោះលែងអ្នកស្រី ទេព វន្នី ដោយក្នុងដៃរបស់ពួកគាត់ មានរូបអ្នកស្រី ទេព វន្នី និងបដាមួយចំនួន។ ពួកគាត់ បានសរសេរពាក្យក្នុងបដាថា៖«ទេព វន្នី ជាស្រី្តស្អាតស្អំ។ ដោះលែងអ្នកស្រី ទេព វន្នី [….]»។
ចំណែកឯ ក្រុមសង្គមស៊ីវិលមួយចំនួន ក៏បានសេចក្តីសេចក្តីថ្លែងការណ៍រួមគ្នាផងដែរ ជុំវិញការបើកសវនាការ នៅរសៀលថ្ងៃព្រហស្បតិ៍នេះ។ តាមរយៈសេចក្តីថ្លែងការណ៍ ក្រុមសង្គមស៊ីវិល ទទូចឲ្យសាលាឧទ្ធរណ៍ច្រានចោលនូវសាលក្រមរបស់សាលាដំបូងរាជធានីភ្នំពេញ ដែលផ្តន្ទាទោសអ្នកស្រី ទេព វន្នី ឲ្យជាប់ពន្ធនាគាររយៈពេល២ឆ្នាំកន្លះ។
ក្រុមសង្គមស៊ីវិល បានលើកឡើងក្នុងសេចក្តីថ្លែងការណ៍យ៉ាងដូច្នេះ៖«យើងខ្ញុំសង្ឃឹមថា សាលាឧទ្ធរណ៍ នឹងប្រើប្រាស់ឯករាជភាពរបស់ខ្លួន និងស្វែររកយុត្តិធម៌ជូនអ្នកស្រី ទេព វន្នី វិញ តាមរយៈការបដិសេធនូវការផ្តន្ទាទោសមកលើអ្នកស្រី ពីសំណាក់សាលាដំបូងរាជធានីភ្នំពេញ»។
សូមបញ្ជាក់ថា សាលាដំបូងរាជធានីភ្នំពេញ បានប្រកាសសាលក្រម កាលពីអំឡុងខែកុម្ភៈ ឆ្នាំ២0១៧ ដោយផ្តន្ទាទោស អ្នកស្រី ទេព វន្នី ឲ្យជាប់ពន្ធនាគារយៈពេល២ឆ្នាំកន្លះ ក្រោមបទចោទ «ប្រព្រឹត្តអំពើហិង្សាដោយចេតនា មានស្ថានទម្ងន់ទោស»។ សុំណុំរឿងនេះ បានកើតឡើងតាំងពីឆ្នាំ២0១៣មកម្ល៉េះ ដោយកាលនោះអ្នកស្រី ទេព វន្នី រួមទាំងសកម្មជនបឹងកក់ដទៃទៀត បានទៅតវ៉ា នៅក្បែរផ្ទះសម្តេច ហ៊ុន សែន នាយករដ្ឋមន្ត្រីកម្ពុជា ដើម្បីសុំឲ្យដោះលែងសកម្មជនបឹងកក់មួយចំនួន ដែលត្រូវបានចាប់ខ្លួន៕
Tag:
តុលាការ
ទេព វន្នី
© រក្សាសិទ្ធិដោយ thmeythmey.com