ជាតិ
បើឯកឧត្តម កឹម សុខា បាត់បង់តំណែងដូចលោក សម រង្ស៊ី តើCNRP អាចចុះខ្សោយដែរទេ? រូបលោក កឹម សុខា និងលោក សម រង្ស៊ី ដឹកនាំការតវ៉ានៅទីលានប្រជាធិបតេយ្យ កាលពីឆ្នាំ២០១៤
× ភ្នំពេញ៖ ប្រធានគណបក្សសង្គ្រោះជាតិ ឯកឧត្តម កឹម សុខា ត្រូវបានតុលាការចោទប្រកាន់ពីបទ សន្ទិដ្ឋិភាពជាមួយជនបរទេស។ បទចោទនេះអាចធ្វើឲ្យឯកឧត្តម កឹម សុខា ប្រឈមមុខនឹងការជាប់ពន្ធនាគារពី១៥ឆ្នាំ ទៅ៣០ឆ្នាំ។ តើឯកឧត្តម កឹម សុខា អាចប្រឈមនឹងការបាត់បង់តំណែងប្រធានបក្សប្រឆាំងដូចលោក សម រង្ស៊ី ដែរទេ? ហើយតើគណបក្សប្រឆាំងមួយនេះ នឹងចុះខ្សោយដែរទេ?
បើនិយាយពីបញ្ហាឯកឧត្តម កឹម សុខា ទំនងនឹងមានជោគវាសនាដូចលោក សម រង្ស៊ី អតីតប្រធានគណបក្សប្រឆាំងដែរ បើបញ្ហាក្តីក្ដាំនេះអូសបន្លាយរហូតដល់ឆ្នាំ២០១៨នោះ ។ នេះជាទិដ្ឋភាពខាងក្រៅមួយផ្នែកនៅក្នុងនយោបាយ ដែលត្រូវបានលើកឡើងដោយលោក មាស នី អ្នកវិភាគនយោបាយ។ លោក មាស នី ដែលចាត់ទុកករណីឯកឧត្តម កឹម សុខា ជារឿងនយោបាយនេះ បាននិយាយថា ការចាប់ខ្លួនប្រធានគណបក្សប្រឆាំង មិនមែនជារឿងចៃដន្យទេ ពោលគឺជាគម្រោងទុកជាមុន ដែលមានការរៀបចំជាដំណាក់កាល ។ «នេះគេប្រើយុទ្ធសាស្ត្របិទទ្វាវាយឆ្កែ ព្រោះគេធ្លាប់ប្រើបានជោគជ័យ។ គេមុនចាប់ខ្លួន គេមានការបិទប្រព័ន្ធផ្សព្វផ្សាយ បិទNDIជាដើម ដើម្បីកុំឲ្យមានការផ្សព្វផ្សាយពីការចាប់ខ្លួននេះទូលំទូលាយពេក»។ នេះជាការយល់ឃើញរបស់លោក មាស នី។
ប៉ុន្តែបើនិយាយពីទិដ្ឋភាពស៊ីជម្រៅនៅក្នុងផ្នែកនយោបាយវិញ លោក មាស នី ជឿជាក់ថា ករណីឯកឧត្តម កឹម សុខា អាចនឹងមានការប្រែប្រួល។ តែការប្រែប្រួលយ៉ាងណានោះ លោក មាស នី មិនអាចសន្និដ្ឋានបានឡើយ ព្រោះវាស្ថិតនៅលើ«អណ្តាត»របស់អ្នកនយោបាយ។ បើតាមអ្នកវិភាគរូបនេះ ការដាក់សម្ពាធពីសហគមន៍អន្តរជាតិមកលើរដ្ឋាភិបាលកម្ពុជា ទាក់ទងករណីឯកឧត្តម កឹម សុខា នេះ ក៏ជាមូលហេតុនាំឲ្យមានការប្រែប្រួលលើស្ថានភាពនយោបាយផងដែរ។
បើទោះជាមិនទាន់អាចសន្និដ្ឋានបាន ចំពោះជោគវាសនារបស់លោក កឹម សុខា ក្តី ប៉ុន្តែសម្រាប់លោក មាស នី យល់ឃើញថា គណបក្សសង្គ្រោះជាតិ ក៏ហាក់បានត្រៀមខ្លួនរួចដែរ សម្រាប់ដាក់អ្នកជំនួសប្រធានគណបក្សខ្លួន ដែលត្រូវប្រឈមមុខនឹងផ្លូវច្បាប់នេះ។ «អ្នកចាប់ និងអ្នកត្រូវបានគេចាប់ សុទ្ធតែដឹងនិងបានត្រៀមរៀងៗខ្លួន។ គណបក្សសង្គ្រោះជាតិ ដឹងខ្លួនថា នៅថ្ងៃណាមួយនឹងមានបញ្ហានេះ ដូច្នេះបានជារៀបចំក្បាលម៉ាស៊ីនអនុប្រធាន៣នាក់ និងប្រធាន១នាក់ ដើម្បីទប់ទល់។ នេះជាការយល់ឃើញរបស់លោក មាស នី។
ចុះបើករណីឯកឧត្តម កឹម សុខា ចេះតែវិវត្តទៅមុខ ហើយអាចនឹងបាត់បង់តំណែងប្រធានដូចលោក សម រង្ស៊ី ដែរនោះថា តើគណបក្សសង្គ្រោះជាតិ ចុះខ្សោយដែរទេ? ត្រង់ចំណុចនេះលោក មាស នី មើលឃើញថា បើទោះជាគណបក្សសង្គ្រោះជាតិ មិនមានឯកឧត្តម កឹម សុខា ដឹកនាំបក្ស ក៏គ្មានអ្វីដែលធ្វើឲ្យគណបក្សប្រឆាំងនេះ ចុះខ្សោយកម្លាំងគាំទ្រដែរ។
អ្នកវិភាគរូបនេះ ពន្យល់ដូច្នេះថា៖«បើតាមការសង្កេតមើលខ្ញុំឃើញថា ចាប់តាំងពីការបោះឆ្នោត២០១៣មក ពលរដ្ឋមិនសូវឲ្យតម្លៃលើបុគ្កលដឹកនាំគណបក្សដូចមុនឡើយ បានន័យថាពលរដ្ឋឲ្យតម្លៃលើគណបក្សជាងលើបុគ្គល។ ដូច្នេះបើនិយាយការចុះខ្សោយកម្លាំង និងបាត់បង់ការគាំទ្រនោះ ខ្ញុំមើលឃើញថា បើទោះជាបុគ្គលណាដឹកនាំគណបក្ស ក៏គណបក្សនោះមិនចុះខ្សោយដែរ។ ប៉ុន្តែលើកលែងតែមានការតែងតាំងអ្នកថ្មី ហើយមានការចាប់ខ្លួនជាបន្តបន្ទាប់ទៀតទេ ទើបអាចមានប៉ះពាល់ដល់ធ្ងន់ធ្ងរដល់គណបក្ស»។
ទាក់ទងនឹងបញ្ហានេះអនុប្រធានគណបក្សសង្គ្រោះជាតិ លោកស្រី មួរ សុខហួរ បានប្រាប់សារព័ត៌មានថ្មីៗថា គណបក្សខ្លួន នឹងមិនតែងតាំងប្រធានជំនួសឯកឧត្តម កឹម សុខា ឡើយ ។ បើតាមលោកស្រី មួរ សុខហួរ មូលហេតុដែលគណបក្សមិនតែងតាំងប្រធានថ្មី ព្រោះកុំឲ្យមហាជនយល់ច្រឡំថា គណបក្សខ្លួន មានគំនិតបំផ្លាញប្រជាធិបតេយ្យ ដូចការចោទប្រកាន់មកលើឯកឧត្តម កឹម សុខា។
ដោយឡែកគណៈកម្មាធិការជាតិរៀបចំការបោះឆ្នោត ក៏មិនទាន់អាចវាយតម្លៃយ៉ាងណាលើបញ្ហាគណបក្សសង្គ្រោះជាតិដែរ ដោយរង់ចាំមើលទិដ្ឋភាពជាក់ស្ដែង នៃករណីឯកឧត្តម កឹម សុខា សិន។ បើតាមលោក ហង្ស ពុទ្ធា គជប នៅបន្តធ្វើការជាមួយគ្រប់គណបក្សនយោបាយទាំងអស់ ហើយបញ្ហារបស់ប្រធានគណបក្សប្រឆាំង ក៏មិនប៉ះពាល់ដល់ដំណើការបោះឆ្នោតដែរ។
ថ្លែងប្រាប់សារព័ត៌មានថ្មីៗ អ្នកនាំពាក្យគជបរូបនេះ បានបញ្ជាក់ដូច្នេះថា៖«យើងជាស្ថាប័នឯករាជ្យ ដូច្នេះយើងបំពេញតួនាទីត្រឹមត្រូវតាមភារកិច្ចខ្លួន។ ខ្ញុំមិនធ្វើអត្ថាធិប្បាយលើបញ្ហានយោបាយទេ ប៉ុន្តែគជប នឹងបន្តធ្វើការជាមួយគ្រប់ភាគីនយោបាយ។ ហើយចំពោះករណីលោក កឹម សុខា យើងរង់ចាំមើលទិដ្ឋភាពជាក់ស្ដែង ព្រោះករណីលោក កឹម សុខា វាអាស្រ័យលើតុលាការជាអ្នកសម្រេច»។
អតីតប្រធានគណបក្សសង្គ្រោះជាតិ លោក សម រង្ស៊ី ដែលបានជាប់ឈ្មោះជាទណ្ឌិត គេចខ្លួនរស់នៅក្រៅប្រទេស ដោយសារបញ្ហាក្តីក្ដាំនោះ បានលាលែងពីតួនាទីប្រធាន និងសមាជិកនៃគណបក្ស កាលពីថ្ងៃទី១១ កុម្ភៈ កន្លងមក ។ ការលាលែងពីតំណែងរបស់លោក សម រង្ស៊ី នេះ គឺដើម្បីការពារផលប្រយោជន៍គណបក្ស កុំឲ្យប្រឈមមុខនឹងច្បាប់ស្តីពីគណបក្សនយោបាយ ដែលហាមទណ្ឌិតធ្វើនយោបាយ។
មកដល់ពេលនេះប្រធានគណបក្សសង្គ្រោះជាតិ ឯកឧត្តម កឹម សុខា ត្រូវបានតុលាការចោទប្រកាន់ពីបទ សន្ទិដ្ឋិភាពជាមួយជនបរទេស។ បទចោទនេះអាចធ្វើឲ្យឯកឧត្តម កឹម សុខា ប្រឈមមុខនឹងការជាប់ពន្ធនាគារពី១៥ឆ្នាំ ទៅ៣០ឆ្នាំ។ តុលាការកំពុងបន្តនិតីវិធីស៊ើបសួរលើករណីប្រធានគណបក្សប្រឆាំងនេះ៕
Tag:
កឹម សុខា
CNRP
វិភាគ
© រក្សាសិទ្ធិដោយ thmeythmey.com