អន្តរជាតិ
កូរ៉េខាងត្បូង៖ វត្តមាន THAAD ធ្វើឲ្យចិនទាស់ចិត្ត តែអាចបង្ខំឲ្យកូរ៉េខាងជើងចូលតុចរចាបាន
× កូរ៉េខាងត្បូងទើបពង្រាយជើងទម្របាញ់មីស៊ីលនៃប្រព័ន្ធការពារ THAAD ចំនួនបួនគ្រឿងទៀត ដែលការពង្រាយនេះធ្វើឡើងក្រោយកូរ៉េខាងជើងសាកល្បងគ្រាប់បែកអ៊ីដ្រូសែននៅចុងសប្ដាហ៍មុន។ ប្រជាជនកូរ៉េខាងត្បូងខ្លះ និងរដ្ឋាភិបាលចិនផងនោះ បានជំទាស់ការពង្រាយនេះយ៉ាងខ្លាំង។ ប៉ុន្តែរដ្ឋាភិបាលក្រុងសេអ៊ូលអះអាងថា វត្តមានប្រព័ន្ធការពារនេះ គឺជារឿងចាំបាច់បំផុតដើម្បីឆ្លើយតបទង្វើកូរ៉េខាងជើង។
ជាថ្មីម្ដងទៀត មន្ត្រីកូរ៉េខាងត្បូងបានចេញមុខការពារការពង្រាយប្រព័ន្ធការពារ THAAD ដែលរងការរិះគន់ពីសំណាក់ប្រជាជនកូរ៉េខាងត្បូងមួយចំនួន ក៏ដូចជារដ្ឋាភិបាលក្រុងប៉េកាំងដែរ។ មន្ត្រីការិយាល័យប្រធានាធិបតី មូន ចេអ៊ីន និយាយថា ការពង្រាយ THAAD មានត្រឹមតែគោលដៅដើម្បីតែការពារខ្លួនពីការគំរាមរបស់កូរ៉េខាងជើងប៉ុណ្ណោះទេ តែក៏បានចាប់បង្ខំឲ្យរបបដឹកនាំក្រុងព្យុងយ៉ាងងាកចូលតុចរចាបានដែរ។
យោងតាមទីភ្នាក់ងារព័ត៌មាន Yonhap មន្ត្រីកូរ៉េខាងត្បូងក៏និយាយដែរថា ក្រុងសេអ៊ូលយល់ពីការបារម្ភរបស់ចិនលើការពង្រាយ THAAD ប៉ុន្តែសេអ៊ូលនឹងពន្យល់ចិនឲ្យពីភាពចាំបាច់របស់ THAAD ក្នុងការដាក់សម្ពាធលើក្រុងព្យុងយ៉ាង។ ក្រុងសេអ៊ូល ពិតជាបារម្ភនឹងសកម្មភាពរបស់ក្រុងព្យុងយ៉ាង ហើយក៏ទំនងជាគ្មានណាផ្សេងក្រៅពីចូលរួមជាមួយអន្តរជាតិដើម្បីដាក់សម្ពាធលើរបបដឹកនាំឯកោមួយនេះដែរ។
តាមពិតទៅ រដ្ឋបាលប្រធានាធិបតី មូន ចេអ៊ីន បានប្រកាន់ជំហរដោះស្រាយបញ្ហានុយក្លេអ៊ែររបស់កូរ៉េខាងជើងដោយសន្តិវិធី និងតាមរយៈផ្លូវការទូត។ ប៉ុន្តែទង្វើរបស់កូរ៉េខាងជើងនាពេលកន្លងមកពិតជាធ្វើឲ្យគេឯងពិបាកទទួលយកណាស់។ នេះមានន័យថា ជម្រើសភ្លាមៗរបស់កូរ៉េខាងត្បូងមានតែការដាក់សម្ពាធឲ្យបានធ្ងន់ៗលើកូរ៉េខាងជើង សំដៅបង្ខំឲ្យរដ្ឋកុម្មុយនីស្តក្បាលរឹងមួយនេះបន្ទន់ឥរិយាបថរបស់ខ្លួន។
ទាក់ទងការពង្រាយ THAAD ចុងក្រោយនេះ ចលនាប្រជាជនក្នុងស្រុកបានបន្តការប្រឆាំងរបស់ខ្លួន ហើយក៏ឈានដល់ការប្រទូស្តរាយជាមួយក្រុមសន្តិសុខផងដែរ។ ប្រជាជនកូរ៉េខាងត្បូងជាង៣០នាក់បានរងរបួសក្នុងពេលប៉ះទង្គិចជាមួយប៉ូលិស ពេលពួកគេធ្វើបាតុកម្មប្រឆាំងវត្តមាន THAAD នៅឯ ខេត្ត Seongju ថ្ងៃព្រហស្បតិ៍ ទី៧ ខែកញ្ញា។ ពួកគេតវ៉ាមិនមែនផ្អែកលើហេតុផលនយោបាយឡើយ ប៉ុន្តែពួកគេរងការរំខានខ្លាំងដោយសារការពង្រាយអាវុធនេះ។
ចំណែកឯ ចិនដែលជាសម្ព័ន្ធមិត្តយូរឆ្នាំរបស់កូរ៉េខាងជើង និងជាមិត្តជិតខាងកូរ៉េខាងត្បូង គឺជំទាស់ដាច់ខាតហើយតែងតែប្រឆាំងគម្រោងពង្រាយប្រព័ន្ធការពាររបស់អាមេរិកនេះ។ ចិនយល់ថាប្រព័ន្ធការពារមីស៊ីលនេះអាចក្លាយជាឧបករណ៍សម្រាប់ឃ្លាំមើលដល់ទឹកដីខ្លួន និងអាចប៉ះពាល់ដល់សន្តិសុខខ្លួនផងដែរ។ យ៉ាងណាក្ដី កូរ៉េខាងត្បូងក៏បានពន្យល់ចិនម្ដងហើយម្ដងទៀតលើរឿងនេះ ព្រោះការពង្រាយ THAAD គឺជារឿងការពារខ្លួនសុទ្ធសាធ៕
Tag:
កូរ៉េខាងត្បូង
ចិន
កូរ៉េខាងជើង
THAAD
© រក្សាសិទ្ធិដោយ thmeythmey.com