អន្តរជាតិ
ចិនផ្តល់ជំនួយអភិវឌ្ឍន៍ ៣៥៤ពាន់លានដុល្លារទៅប្រទេស១៤០ រយៈពេល១៥ឆ្នាំមកនេះ
× របាយការណ៍ថ្មីមួយស្តីពីជំនួយអភិវឌ្ឍន៍បានបង្ហាញថា មហាយក្សចិនបានចំណាយថវិកាសរុប ៣៥៤,៣ពាន់លានដុល្លារក្នុងរយៈពេល ១៥ ឆ្នាំ ចន្លោះពីឆ្នាំ ២០០០ដល់ឆ្នាំ ២០១៤ ក្នុងជំនួយអភិវឌ្ឍទៅកាន់ប្រទេស ១៤០ ទូទាំងពិភពលោក។
ក្នុងនាមជាមហាអំណាចសេដ្ឋកិច្ចទីពីរ ចិនបន្តបង្កើនការផ្តល់ជំនួយអភិវឌ្ឍន៍កាន់តែច្រើនទៅកាន់ប្រទេសកំពុងអភិវឌ្ឍទូទាំងពិភពលោក។ របាយការណ៍ថ្មីមួយនៃស្ថាប័នស្រាជ្រាវ AidData ដែលចេញផ្សាយសប្តាហ៍នេះបង្ហាញថា ចិនបានផ្តល់ជំនួយអភិវឌ្ឍន៍ក្នុងទំហំ ៣៥៤,៣ពាន់លានដុល្លារឯណោះ។
របាយការណ៍ថ្មីនេះបង្ហាញថា ចិនព្យាយាមផ្លាស់ប្តូរខ្លួនពីប្រទេសទទួលជំនួយទៅជាប្រទេសផ្តល់ជំនួយដល់ប្រទេសដទៃដែលកំពុងអភិវឌ្ឍវិញផងដែរ។ ជំនួយហិរញ្ញវត្ថុ ៣៥៤,៣ ពាន់លានដុល្លារនេះត្រូវបានផ្ដល់ឲ្យប្រទេស ១៤០ លើពិភពលោកចន្លោះពីឆ្នាំ ២០០០ ដល់២០១៤។ ជំនួយទាំងនេះភាគច្រើនផ្តោតសំខាន់លើការអភិវឌ្ឍហេដ្ឋារចនាសម្ព័ន្ធ។
គេកត់សម្គាល់ថា កន្លងមក គេមិនអាចដឹងច្បាស់ពីទំហំជំនួយអភិវឌ្ឍន៍ផ្លូវការ និងប្រទេសនានាដែលទទួលជំនួយពីចិននេះឡើយ ដោយសារកង្វះព័ត៌មានពាក់ព័ន្ធនឹងការផ្តល់ជំនួយនេះ។
បើតាម AidData រដ្ឋាភិបាលចិនមិនបោះពុម្ភផ្សាយទិន្នន័យពាក់ព័ន្ធជំនួយហិរញ្ញវត្ថុរបស់ខ្លួនតាមប្រទេសនីមួយៗឡើយ ហើយចិនក៏មិនផ្សាយទិន្ន័យពាក់ព័ន្ធគម្រោងនានាដែលត្រូវស្ថិតក្រោមជំនួយរបស់ខ្លូនដែរ។នេះក៏ព្រោះថា ចិនចាត់ទុក កម្មវិធីផ្តល់ជំនួយហិរញ្ញវត្ថុអន្តរជាតិនេះ ជាកិច្ចការសម្ងាត់របស់រដ្ឋ ហើយចិនមិនចង់បញ្ចេញព័ត៌មាននេះឲ្យគេដឹងឡើយ។
ត្រឡប់មកវិញ ថ្វីបើចិនចំណាយរហូតដល់ ៣៥៣ពាន់លានដុល្លាក្តី ក្នុងរយៈពេលដូចគ្នា សហរដ្ឋអាមេរិកនៅនាំមុខចិនក្នុងការផ្តល់ជំនួយហិរញ្ញវត្ថុច្រើនជាងគេទៅកាន់ប្រទេសកំពុងអភិវឌ្ឍដដែល។ ក្នុងរយៈពេល ១៥ឆ្នាំ ពីឆ្នាំ ២០០០ ដល់ឆ្នាំ ២០១៤ សហរដ្ឋអាមេរិកបានផ្តល់ជំនួយអភិវឌ្ឍន៍ក្នុងទំហំ ៣៩៤, ៦ពាន់លានដុល្លារអាមេរិកឯណោះ។
© រក្សាសិទ្ធិដោយ thmeythmey.com