អន្តរជាតិ
លោក ពូទីន ចេញក្រឹត្យដាក់ទណ្ឌកម្មកូរ៉េខាងជើង
× ប្រធានាធិបតីរុស្ស៊ីរុស្ស៊ីលោក វ្ល៉ាឌីមៀ ពូទីន បានចុះលេខាលើក្រឹត្យមួយ ដាក់ទណ្ឌកម្មប្រឆាំងកូរ៉េខាងជើងដើម្បីឆ្លើយតបនឹងការបាញ់សាកល្បងអាវុធនុយក្លេអ៊ែរនិងមីស៊ីលកន្លងមក។ ការចេញក្រឹត្យដាក់ទណ្ឌកម្មនេះគឺធ្វើឡើងតាមដំណោះស្រាយក្រុមប្រឹក្សាសន្តិសុខអង្គការសហប្រជាជាតិលេខ ២៣២១។
ក្រឹត្យថ្មីមួយស្តីពីការអនុវត្តដំណោះស្រាយក្រុមប្រឹក្សាសនិ្តសុខអង្គការសប្រជាជាតិដែលដាក់ទណ្ឌកម្មប្រឆាំងកូរ៉េខាងជើងត្រូវបានប្រធានាធិបតីរុស្ស៊ីលោក វ្ល៉ាឌីមៀ ពូទីន ចុះហត្ថលេខាជាផ្លូវការកាលពីសប្តាហ៍មុន។ ក្រឹត្យនេះបានចូលជាធរមានកាលពីថ្ងៃ ១៤ ខែតុលាមកម្ល៉េះ។
តាមការផ្សាយរបស់សារព័ត៌មានរដ្ឋរុស្ស៊ី Sputnik ក្រឹត្យប្រធានាធិបតីនេះកម្រិតការធ្វើពាណិជ្ជកម្ម ធនាគារ ហិរញ្ញវត្ថុ ផ្លាស់ប្តូរទំនាក់ទំនងវិទ្យាសាស្ត្រ និងបច្ចេកវិទ្យាផង។អ្វីដែលសំខាន់ក្រឹត្យនោះក៏កំណត់ការដាក់ទណ្ឌកម្មប្រឆាំងបុគ្គលស្ថិតក្នុងរបបដឹកនាំក្រុងព្យុងយ៉ាងចំនួន ១១នាក់ និង ក្រុមហ៊ុនពាក់ព័ន្ធកម្មវិធីនុយក្លេអ៊ែរកូរ៉េខាងជើងចំនួន ដប់ផងដែរ។ វាក៏មានបញ្ជាក់ច្បាស់ពីសម្ភារៈ បច្ចេកវិទ្យា និងផលិតនានាដែលត្រូវហាមនាំចេញទៅកាន់កូរ៉េខាងជើងដូចគ្នា។
នៅដើមសប្តាហ៍នេះដែរ ប្រធានរដ្ឋសភារុស្ស៊ី Valentina Matvienko បានបញ្ជាក់ពីជំហររឹងមាំរបស់រុស្ស៊ីក្នុងការថ្កោលទោសសកម្មភាពកូរ៉េខាងជើងដែលបន្តអភិវឌ្ឍអាវុធនុយក្លែអ៊ែរជាបន្តបន្ទាប់ ហើយរុស្ស៊ីក៏ទទូចឲ្យសហគមន៍អន្តរជាតិអនុវត្តដំណោះស្រាយក្រុមប្រឹក្សាសន្តិសុខឲ្យបានខ្ជាប់ខ្ជួនផងដែរ។
តាមពិតទៅ កូរ៉េខាងជើងបានបាញ់សាកល្បងមីស៊ីលលើកចុងក្រោយ បង្អស់គឺថ្ងៃ ១៥ ខែកញ្ញាកន្លងទៅ ប៉ុន្តែ ទោះបីមានការព្យាករក៏ដោយ នៅក្នុងខួបលើកទី ៧២ នៃបក្សពលករ កូរ៉េខាងជើងមិនបានបាញ់មីស៊ីលទៀតឡើយ។ រុស្ស៊ីចាត់ទុកសកម្មភាពបាញ់មីស៊ីលរបស់កូរ៉េខាងជើងនេះជាការបង្ករឿង និងជាការដុតបញ្ឆេះកម្តៅ និងភាពតានតឹងក្នុងតំបន់ទាំងមូលផង។
ដោយឡែកនៅដើមខែតុលានេះ ក្នុងវេទិកាថាមពលដែលធ្វើឡើងក្នុងប្រទេសរុស្ស៊ី លោក ពូទីន បានបង្ហាញក្តីបារម្ភខ្លាំងផងដែរចំពោះការវិវត្តនៃស្ថានការណ៍ និងភាពតានតឹងនៅឧបទ្វីបកូរ៉េ។ មេដឹកនាំរូបនេះនិយាយថា លោកបារម្ភខ្លាំងដោយសារកូរ៉េខាងជើងមានព្រំដែនជាប់ជាមួយរុស្ស៊ី ហើយការប្រឈមមុខដាក់គ្នា និងសង្គ្រាមពាក្យសម្តីរវាងភាគីអាចធ្វើឲ្យបញ្ហាកាន់តែធ្ងន់ធ្ងរដែលគ្រប់គ្នាមិនចង់ឃើញថែមទៀត។ ប្រមុខរដ្ឋរុស្ស៊ីរូបនេះក៏បានឆ្លៀតអំពាវនាវឲ្យភាគីពាក់ព័ន្ធព្យាយាមបញ្ឈប់សកម្មភាពទាំងឡាយណាដែលធ្វើឲ្យបញ្ហាកាន់តែធ្ងន់ធ្ងរ ហើយត្រឡប់មកអង្គុយចរចាគ្នាវិញ៕
Tag:
វ្ល៉ាឌីមៀ ពូទីន
កូរ៉េខាងជើង
Valentina Matvienko
© រក្សាសិទ្ធិដោយ thmeythmey.com