វិបត្តិរ៉ូហ៊ីងយ៉ា៖ សហភាពអឺរ៉ុបដាក់ចេញវិធានការប្រឆាំងមន្ត្រីយោធាជាន់ខ្ពស់មីយ៉ាន់ម៉ា

អន្តរជាតិ

វិបត្តិរ៉ូហ៊ីងយ៉ា៖ សហភាពអឺរ៉ុបដាក់ចេញវិធានការប្រឆាំងមន្ត្រីយោធាជាន់ខ្ពស់មីយ៉ាន់ម៉ា

17, Oct 2017 , 9:19 pm

រូបភាព

ដោយ:

ការបំពារបំពានសិទ្ធិមនុស្សបង្កឲ្យជនជាតិរ៉ូហ៊ីងយ៉ាភៀសខ្លួនកាន់តែច្រើនទៅកាន់បង់ក្លាដែស បានធ្វើឲ្យសហគមន៍អន្តរជាតិជាពិសេសហភាពអឺរ៉ុប ព្រួយបារម្ភ និងខកចិត្តខ្លាំង។ ឆ្លើយតបបញ្ហានេះ សហភាពអឺរ៉ុបបានចេញវិធានការដាក់សម្ពាធលើមន្ត្រីជាន់ខ្ពស់យោធាមីយ៉ាន់ម៉ាពាក់ព័ន្ធនឹងវិបត្តិនេះ ។

សហភាពអឺរ៉ុប បានអះអាងថា ស្ថាប័នខ្លួន នឹងផ្អាកអញ្ជើញមេបញ្ជាការកងទ័ពមីយ៉ាន់ម៉ាច្រើនរូប ពាក់ព័ន្ធនឹងការប្រើប្រាស់កងកម្លាំងមិនត្រឹមត្រូវ ដែលបានបណ្តាលឲ្យមានជនជាតិភាគតិចរ៉ូហ៊ីងយ៉ាជាង៥០ម៉ឺននាក់ភៀសខ្លួនចេញពីប្រទេស ។ នេះបើយោងតាមការចុះផ្សាយរបស់សារព័ត៌មាន The Nation នៅថ្ងៃ១៧ តុលា ។

តាមប្រភពព័ត៌មានដដែល សេចក្តីសម្រេចដែលត្រូវបានអនុម័តដោយក្រុមប្រឹក្សាអឺរ៉ុប បានបញ្ញត្តិថា៖«សហភាពអឺរ៉ុប និងសមាជិករបស់ខ្លួន នឹងផ្អាកអញ្ជើញអគ្គមេញ្ជាការកងទ័ពមីយ៉ាន់ម៉ា និងមន្ត្រីយោធាជាន់ខ្ពស់ជាច្រើនផ្សេងទៀត ក៏ដូចជាផ្អាកកិច្ចការសហប្រតិបត្តិការលើវិស័យការពារជាតិជាមួយមីយ៉ាន់ម៉ា ដើម្បីជាការឆ្លើយតបនឹងការប្រើប្រាស់កម្លាំងទ័ពមិនត្រឹមត្រូវនាពេលចុងក្រោយនេះ»។

ក្រៅពីរឹតត្បិតនិងដាក់សម្ពាធលើយោធាមីយ៉ាន់ម៉ា ក្រុមប្រឹក្សាអឺរ៉ុប ក៏បានជំរុញមីយ៉ាន់ម៉ាឲ្យចូលរួមបង្កើតកិច្ចសន្ទនាផ្សេងៗជាមួយនឹងប្រទេសជិតខាងខ្លួន ជាក់ស្តែងបង់ក្លាដែសដើម្បីស្វែងរកដំណោះស្រាយសមរម្យ ដែលរាប់បញ្ចូលទាំងការនាំជនភៀសខ្លួនមកស្រុកកំណើតរបស់ពួកគេវិញផងដែរ ។

គួរកត់សម្គាល់នោះ រដ្ឋមន្ត្រីការបរទេសសហភាពអឺរ៉ុប ក៏បានថ្លែងនៅក្នុងកិច្ចប្រជុំរបស់ខ្លួនដែរថា ការស៊ើបអង្កេតលើការបំពានសិទ្ធិមនុស្សធ្ងន់ធ្ងរ ដែលរាប់បញ្ចូលទាំងការធ្វើទុក្ខបុកម្នេញលើកុមារ ក៏ចំបាច់ត្រូវតែមានផងដែរ ដើម្បីផ្តល់យុត្តិធម៌ដល់ជនរងគ្រោះ៕