សម្តេច ស ខេង ព្រមានកុំឲ្យមានករណី«រត់ការ»ឡើងដំណែងខុសច្បាប់

ជាតិ

សម្តេច ស ខេង ព្រមានកុំឲ្យមានករណី«រត់ការ»ឡើងដំណែងខុសច្បាប់

19, Oct 2017 , 9:59 pm

រូបភាព

ដោយ: ខន ចំប៉ា

សម្តេច ស ខេង រដ្ឋមន្ត្រីក្រសួងមហាផ្ទៃ បានព្រមានកុំឲ្យមានការរត់ការឡើងដំណែងខុសនីតិវិធី ដែលទង្វើនេះ ធ្វើឲ្យប៉ះពាល់ដល់កិត្តិយសខ្លួន។ ករណីរត់ការឡើងតំណែងនេះ ក៏ធ្លាប់មានការកើតឡើងកន្លងមកហើយ ប៉ុន្តែ សម្តេច ស ខេង បានអះអាងថាមិនឲ្យកើតមានករណីនេះទៀតឡើយ។

សម្តេច ស ខេង រដ្ឋមន្ត្រីក្រសួងមហាផ្ទៃ បានព្រមានកុំឲ្យមានការរត់ការឡើងដំណែងខុសនីតិវិធី ដែលករណីនេះធ្លាប់មានការកើតឡើងកន្លងមកហើយ។ គេហទំព័រអគ្គស្នងការនគរបាលជាតិបានស្រង់រដ្ឋមន្ត្រីមហាផ្ទៃ ដែលថ្លែងដូច្នេះក្នុងសិក្ខាសាលាប្រកាសផ្សព្វផ្សាយផែនការយុទ្ធសាស្ត្របញ្ជ្រាបយេនឌ័រ ២០១៨-២០២៣ នៅថ្ងៃទី១៩ ខែតុលា។

តាមគេហទំព័រអគ្គស្នងការនគរបាលជាតិ រដ្ឋមន្ត្រីមហាផ្ទៃ បានបន្ថែមទៀតថា មិនឲ្យមានករណីរត់ការ ទៅកាន់អ្នកមានឥទ្ធិពលនៅក្រសួងមហាផ្ទៃ ហើយមកដាក់សម្ពាធថ្នាក់ក្រោមដាច់ខាត មុននឹងបញ្ជាក់បន្ថែមដូច្នេះ៖«ករណីសុំឡើងមុខតំណែងនេះ គឺត្រូវឆ្លងកាត់តាមបែបបទរដ្ឋបាលត្រឹមត្រូវនៅក្រសួងមហាផ្ទៃ ដោយដាក់សំណើមកផ្ទាល់»។

អត្ថបទទាក់ទង

មហាផ្ទៃនឹងចាត់ការទីប្រឹក្សា និងជំនួយការសម្តេច ស ខេង ដែលលួចកាងបទល្មើសផ្សេងៗ

ទាក់ទងនឹងករណីនេះដែរ កាលពីថ្ងៃទី១៦ ខែតុលាកន្លងទៅ ក្រសួងមហាផ្ទៃព្រមានចាត់វិធានការ ទីប្រឹក្សា និងជំនួយការសម្ដេច ស ខេង ដែលលួចប្រព្រឹត្តអំពើមិនគួរគប្បី ក្នុងគោលបំណងកាងបទល្មើសផ្សេងៗ ដែលប៉ះពាល់ដល់កិត្តិយសរដ្ឋមន្ត្រីមហាផ្ទៃផងដែរ។ បើតាមលោក ខៀវ សុភ័គ ប្រធានគ្រប់គ្រងទីប្រឹក្សា និងជំនួយការ បានសម្ដេច ស ខេង បានប្រាប់សារព័ត៌មាន thmeytthmey.com ថាអំពើដែលធ្វើឲ្យប៉ះពាល់ដល់កិត្តិយសរដ្ឋមន្ត្រីមហាផ្ទៃ មានដូចជា សកម្មភាពរត់ការ កាងអំពើល្មើសផ្សេងៗ ឬអន្តរាគមន៍ទៅស្ថាប័នមានសមត្ថកិច្ច ដើម្បីប្រយោជន៍ផ្ទាល់ខ្លួនជាដើម៕