លោក ប្រាក់ សុវណ្ណារ៉ា៖ វឌ្ឍនាកាកើនកម្លាំង និងទម្រង់លេង តែការបញ្ចប់ទីអាចធ្លាក់ចុះ

កីឡាជាតិ

ជាតិ

លោក ប្រាក់ សុវណ្ណារ៉ា៖ វឌ្ឍនាកាកើនកម្លាំង និងទម្រង់លេង តែការបញ្ចប់ទីអាចធ្លាក់ចុះ

10, Nov 2017 , 10:39 pm

រូបភាព

ដោយ:

លោក ប្រាក់ សុវណ្ណារ៉ា គ្រូបង្វឹកក្រុមជម្រើសជាតិកម្ពុជាលើកឡើងថា កីឡាករ ចាន់ វឌ្ឍនាកា មានការរីកចម្រើនផ្នែកកម្លាំង និងទម្រង់លេងតែមានការធ្លាក់ចុះផ្នែកបញ្ចប់ទី។ កត្តានេះលោកយល់ថា អាចបណ្តាលមកពីរូបគេបានត្រឹមហ្វឹកហាត់តែមិនសូវបានចូលរួមប្រកួត។ លោកសង្ឃឹមថា សម្រាប់ការប្រកួតដែលនៅសល់ វឌ្ឍនា នឹងបានបង្ហាញខ្លួនជាមួយក្រុម Fujieda MYFC។

ក្រោយហ្វឹកហាត់ពង្រឹងសមត្ថភាពជាមួយក្រុមក្របខណ្ឌលីកលំដាប់ទី៣ Fujieda MYFC របស់ជប៉ុនគ្រូបង្វឹកក្រុមជម្រើសជាតិកម្ពុជាលោក ប្រាក់ សុវណ្ណារ៉ា យល់ឃើញថា កីឡាករ ចាន់ វឌ្ឍនាកា មានការរីកចម្រើនខ្លាំងផ្នែកកម្លាំង និងទម្រង់លេង។ តែយ៉ាងណា លោក ឃើញការបញ្ចប់ទីរបស់គេហាក់មានការធ្លាក់ចុះ។ ការលើកឡើងបែប បន្ទាប់ពីកីឡាកររូបនេះមិនអាចសម្រេចឱកាសមាសពីរដងនាជំនួបមិត្តភាពជាមួយមីយ៉ាន់ម៉ា។

«សម្រាប់ វឌ្ឍនាកា បាល់ឱកាសបែបនឹងគាត់កម្រនឹងភ្លាត់ណាស់ ប្រសិនបើកីឡាករផ្សេងពីគាត់យើងអាចគិតថានឹងភ្លាត់ព្រោះ វឌ្ឍនាកា គាត់ពូកែទាត់បាល់របៀបនឹងណាស់ តែពេលខ្លះយើងគិតថាអាចមកពីសំណាងគាត់តិច»។ នេះជាការលើកឡើងរបស់ លោក ប្រាក់ សុវណ្ណារ៉ា ដែលបានបរាជ័យសម្រាប់ការដឹងនាំក្រុមជម្រើសជាតិលើកដំបូង។

ទោះបីយ៉ាងនេះក្តីគ្រូបង្វឹកឈ្មោះក្រៅហៅ«ទូច»រូបនេះ ចាត់ទុកការខកខានឱកាសមាសឬអាចនិយាយបានថាធ្លាក់ការសម្រេចទីរបស់ វឌ្ឍនាកា អាចបណ្តាលមកពីឱកាសលេងនៅជប៉ុនចរបស់គេតិចពេក។ លោកបានបញ្ជាក់យ៉ាងដូច្នេះថា៖«យើងពិបាកប៉ាន់ស្មានណាស់ បើ វឌ្ឍនាកា មានឱកាសចូលលេងច្រើនទើបយើងអាចវិនិច្ឆ័យថាសមត្ថភាពគាត់ឡើងឬក៏ចុះខ្សោយ ព្រោះការហ្វឹកហាត់ខុសពីការប្រកួត។ តែបើនិយាយពីកម្លាំង និងការយល់ដឹងពីរបៀបលេងគឺគាត់មានការកើនឡើងហើយការសម្រេចទីហាក់មានការធ្លាក់ចុះ សូម្បីតែការទាត់ Free Kick ក៏មិនសូវចំគោលដៅដែរ នេះអាចនិយាយបានថាដោយសារគាត់មានឱកាសលេងនៅជប៉ុនតិចពេក»៕