មន្ត្រីជាន់ខ្ពស់ទទួលបន្ទុកវប្បធម៌បារាំងអះអាងពីការពង្រឹងប្រតិបត្តិការជាមួយកម្ពុជា

ជាតិ

មន្ត្រីជាន់ខ្ពស់ទទួលបន្ទុកវប្បធម៌បារាំងអះអាងពីការពង្រឹងប្រតិបត្តិការជាមួយកម្ពុជា

19, Dec 2017 , 7:59 am

រូបភាព

ដោយ: ថ្មីៗ

លោកស្រី ឡូរ៉ង់ អូវែ (Laurence Auer) ប្រធាននាយកដ្ឋានវប្បធម៌ សិក្សា ស្រាវជ្រាវ និងបណ្តាញ នៃក្រសួងអឺរ៉ុបនិងការបរទេសបារាំង បានគូសបញ្ជាក់សារជាថ្មី ពីការយក ចិត្តទុក ដាក់របស់ប្រទេសបារាំងក្នុងកិច្ចសហប្រតិបត្តិការជាមួយប្រទេសកម្ពុជានៅក្នុងវិស័យអប់រំ វិទ្យាសាស្ត្រ សាកលវិទ្យាល័យ ការស្រាវជ្រាវ សុខាភិបាល វប្បធម៌ និងបេតិកភណ្ឌ។ លោកស្រីបានលើកឡើងនាអំឡុងទស្សនកិច្ចពីថ្ងៃទី១៤ ដល់ថ្ងៃទី១៧ ខែធ្នូ ឆ្នាំ២០១៧ ដើម្បីចូលរួមក្នុងកិច្ចប្រជុំពេញអង្គនៃគណៈកម្មាធិការអន្តរជាតិដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ (ICC-Angkor) និងពិធីអបអរខួប២៥ឆ្នាំនៃការដាក់បញ្ចូលតំបន់ប្រាសាទអង្គរក្នុងបញ្ជីសម្បត្តិបេតិកភណ្ឌពិភពលោករបស់អង្គការយូណេស្កូ។

ក្នុងដំណើរទស្សកិច្ចរយៈពេល៤ថ្ងៃនៅកម្ពុជា លោកស្រី ឡូរ៉ង់ អូវែ បានអញ្ជើញទៅទស្សនាការដ្ឋានជួសជុលប្រាសាទមេបុណ្យខាងលិច ដែលទទួលបានការឧបត្ថម្ភពីប្រទេសបារាំងក្នុងភាពជាដៃគូជាមួយអាជ្ញាធរជាតិអប្សរា។ ការដ្ឋានខាងលើក៏ជាកន្លែងបណ្តុះបណ្តាលមន្ត្រីជំនាញកម្ពុជាពាក់ព័ន្ធការអភិរក្ស និងការជួសជុលប្រាសាទផងដែរ។

លោកស្រីបានចូលក្រាបបង្គំគាល់ព្រះមហាក្សត្រ ព្រះករុណាព្រះបាទសម្តេចព្រះបរមនាថ នរោត្តម សីហមុនី និងបានជួបសម្តែងការគួរសមជាមួយលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ។

ជាមួយគ្នានេះផងដែរ មន្ត្រីជាន់ខ្ពស់ផ្នែកវប្បធម៌របស់បារាំងរូបនេះ បានទៅទស្សនាសាកលវិទ្យាល័យវិទ្យាសាស្ត្រសុខាភិបាល ដែលបានធ្វើកិច្ចសហប្រតិបត្តិការជាមួយប្រទេសបារាំងអស់រយៈពេល២៥ឆ្នាំមកហើយ។ ជាងនេះទៅទៀត លោកស្រីបានជួបជាមួយតំណាងស្ថាប័នសាកលវិទ្យាល័យ និងវិទ្យាសាស្ត្រនានា រួមទាំងអតីតនិស្សិត ដែលបានសិក្សាថ្នាក់ភាសាបារាំងនៅតាមសាកលវិទ្យាល័យ ឬធ្លាប់បានបន្តការសិក្សាថ្នាក់ឧត្តមនៅ បារាំង៕