អន្តរជាតិ
លោក ត្រាំ ត្រៀមបញ្ចេញយុទ្ធសាស្ត្ររក្សាសន្តិសុខជាតិដែល«តម្កល់ប្រយោជន៍អាមេរិកជាធំ»
× ប្រធានាធិបតីអាមេរិកលោក ដូណាល់ ត្រាំ ត្រៀមបញ្ចេញយុទ្ធសាស្ត្រថែរក្សាសន្តិសុខជាតិថ្មីដែលផ្អែកលើពាក្យស្លោក«តម្កល់ប្រយោជន៍អាមេរិកជាធំ»នៅថ្ងៃចន្ទទី ១៨ ខែធ្នូ។ យុទ្ធសាស្ត្រសន្តិសុខថ្មីរបស់លោក ត្រាំ នេះគឺកំណត់យកសន្តិសុខសេដ្ឋកិច្ចជាស្នូល។
គេរំពឹងថា យុទ្ធសាស្ត្រធានាសន្តិសុខជាតិថ្មីរបស់អាមេរិកនឹងត្រូវដាក់ចេញដោយប្រធានាធិបតី ដូណាល់ ត្រាំ នៅដើមសប្តាហ៍នេះ។ គេរំពឹងថា គោលនយោបាយសន្តិសុខថ្មីនេះផ្អែកសំខាន់លើទស្សនវិជ្ជាតម្កល់ប្រយោជន៍អាមេរិកជាធំរបស់លោក ដូណាល់ ត្រាំតែម្តង។
បើតាមទីភ្នាក់ងារព័ត៌មាន AFP បើតាមមន្ត្រីសេតវិមាន គោលនយោបាយថ្មីកំណត់ថា សន្តិសុខសេដ្ឋកិច្ច គឺជាសន្តិសុខជាតិ។ យុទ្ធសាស្ត្រថ្មីនេះគឺធ្វើយ៉ាងណាជំរុញឲ្យមានការធានាតុល្យភាពនៃពាណិជ្ជកម្មរវាងអាមេរិកជាមួយបណ្តាប្រទេសដទៃទៀតលើពិភពលោកជាពិសេសជាមួយមហាយក្សចិនតែម្តង។
«អាវុធដែលខ្លាំងបំផុតរបស់យើងគឺកំណើនសេដ្ឋកិច្ចខ្លាំង»។ នេះជាសម្តីរបស់មន្ត្រីអាមេរិកដែលមិនបង្ហាញអត្តសញ្ញាណ។
ក្រោយចូលកាន់តំណែងជាប្រធានាធិបតីអាមេរិក លោក ដូណាល់ ត្រាំ បានបង្ហាញជំហររឹងត្អឹងក្នុងការដោះស្រាយបញ្ហាសេដ្ឋកិច្ចជាមួយចិន។ លោកបានសន្យាកាត់បន្ថយឱនភាពពាណិជ្ជកម្មរវាងប្រទេសទាំងពីរ និងបានសន្យាធានាឲ្យបាននូវការប្រកួតប្រជែងត្រឹមត្រូវយុត្តធម៌ និងស្មើភាពគ្នាសម្រាប់ក្រុមហ៊ុនអាមេរិកផងដែរ។
តាមពិតទៅ លោក ដូណាល់ ត្រាំ បានគាស់រំលើងចោលអស់នូវរាល់មរតកនយោបាយរបស់លោក បារ៉ាក់អូបាម៉ា ទាំងកិច្ចព្រមព្រៀងប្រែប្រួលអាកាសធាតុដល់កិច្ចព្រមព្រៀងពាណិជ្ជកម្មហើយលោកក៏ប្រឹងទាញអាមេរិកឲ្យកាន់តែឯកោពីគេឯងក្នុងឆាកអន្តរជាតិទៀត។ គេមិនអាចដឹងច្បាស់នៅឡើយទេថា យុទ្ធសាស្ត្រថ្មីរបស់លោកមានប្រសិទ្ធភាព និងល្អប្រសើរកម្រិតណាក្នុងការដោះស្រាយបញ្ហាសន្តិសុខជាតិនោះ។
យ៉ាងណាមិញរឿងអាទិភាពចំនួនបួនដែលស្ថិតក្នុងយុទ្ធសាស្ត្រសន្តិសុខថ្មីរបស់ក្រុងវ៉ាស៊ីនតោននេះក្នុងនោះមានការពារប្រទេស និងប្រជាជនអាមេរិក, លើកស្ទួយវិបុលភាពរបស់អាមេរិក, ធានារក្សាឲ្យបាននូវសន្តិភាពតាមរយៈការពង្រឹងអំណាច រួមទាំងការពង្រីកឥទ្ធិពលអាមេរិកផង។ ដោយបន្តអះអាងពីការតម្កល់ប្រយោជន៍អាមេរិកជាចម្បង កន្លងមកលោក ត្រាំបានបង្រា្កបជនអន្តោប្រវេសន៍ខុសច្បាប់ពីម៉ិកស៊ិក និងចង់រៀបចំកសាងជញ្ជាំងដើម្បីទប់ទល់ការលួចឆ្លងដែនពីម៉ិកស៊ិកចូលទឹកដីអាមេរិកថែមទៀតផង៕
Tag:
ដូណាល់ ត្រាំ
យុទ្ធសាស្ត្រសន្តិសុខ
© រក្សាសិទ្ធិដោយ thmeythmey.com