កីឡាជាតិ
កម្ពុជានឹងមានទូរទស្សន៍កីឡាជាតិលើកដំបូងនាពេលដ៏ខ្លីខាងមុខ ![លោក វ៉ាត់ ចំរើន អគ្គលេខាធិការ NOCC ថ្លែងក្នុងពិធីបើកសិក្ខាសាលា«កម្មវិធីអភិវឌ្ឍន៍ប្រព័ន្ធគ្រប់គ្រងគេហទំព័រ» នៅទីស្នាក់ការ NOCC កាលពីពេលកន្លងទៅ](https://image.thmeythmey.com/pictures/2017/12/19/vatt.jpg)
លោក វ៉ាត់ ចំរើន អគ្គលេខាធិការ NOCC ថ្លែងក្នុងពិធីបើកសិក្ខាសាលា«កម្មវិធីអភិវឌ្ឍន៍ប្រព័ន្ធគ្រប់គ្រងគេហទំព័រ» នៅទីស្នាក់ការ NOCC កាលពីពេលកន្លងទៅ
×![]()
គណៈកម្មាធិការជាតិអូឡាំពិកកម្ពុជាបានអះអាងថា កម្ពុជានឹងមានទូរទស្សន៍កីឡាជាតិផ្ទាល់អង្គភាពកីឡាលើកដំបូងក្នុងពេលដ៏ខ្លីខាងមុខ សម្រាប់ត្រៀមផ្សាយផ្ទាល់ការប្រកួតកីឡាស៊ីហ្គេមលើកទី៣២ដែលកម្ពុជាធ្វើជាម្ចាស់ផ្ទះ។ ការអះអាងនេះធ្វើឡើងក្នុងសិក្ខាសាលាស្តីពី«កម្មវិធីអភិវឌ្ឍន៍ប្រព័ន្ធគ្រប់គ្រងគេហទំព័រ»ដែលរៀបចំដោយ NOCC ក្រោមការឧបត្ថម្ភរបស់អង្គការសាមគ្គីអូឡាំពិក។
អគ្គលេខាធិការនៃគណៈកម្មាធិការជាតិអូឡាំពិកកម្ពុជាលោក វ៉ាត់ ចំរើន បានបញ្ជាក់ថា កម្ពុជានឹងសាងសង់ស្ថានីយទូរទស្សន៍កីឡាជាតិនៅបរិវេណពហុកីឡដ្ឋានជាតិមរតកតេជោក្នុងពេលដ៏ខ្លីខាងមុខ ខណៈច្បាប់សុំការអនុញ្ញាតត្រូវបានរៀបចំរួចរាល់។ វត្តមានទូរទស្សន៍កីឡាជាតិលើកដំបូងនៅកម្ពុជានឹងក្លាយជាចំណែកមួយដ៏សំខាន់សម្រាប់ផ្សព្វផ្សាយការប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ លោកសង្កត់ធ្ងន់ថា បើគ្មានផែនការឆ្នាំ២០២៣ កម្ពុជាក៏គ្មានអ្វីទាំងនេះដែរ ហើយសហព័ន្ធកីឡាជាតិក៏មិនដុតដៃដុតជើងខំប្រឹងពង្រឹងសមត្ថភាពរបស់ខ្លួនផងដែរ។
«ជាលើកទី១ដែលកម្ពុជាមានទូរទស្សន៍កីឡាជាតិ សូម្បីតាំងពីជំនាន់រាស្ត្រនិយម ឬប៉ុន្មានជំនាន់មុនក៏គ្មានដែរ។ អ្នកជាម្ចាស់នៃទូរទស្សន៍កីឡាជាតិ គឺសហព័ន្ធកីឡាជាតិទាំងអស់ក្រោមកិច្ចសហការយ៉ាងម៉ឺងម៉ាត់ជាមួយគណៈកម្មាធិការជាតិអូឡាំពិកកម្ពុជាក្នុងការដឹកនាំ និងជួញជំរុញឲ្យទូរទស្សន៍នេះក្លាយជាទូរទស្សន៍ដ៏មានឥទ្ធិពលសម្រាប់ឆ្នាំ២០២៣»។ នេះជាការលើកឡើងរបស់លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាក្នុងសិក្ខាសាលាស្តីពី«កម្មវិធីអភិវឌ្ឍន៍ប្រព័ន្ធគ្រប់គ្រងគេហទំព័រ»កាលពីថ្មីៗកន្លងទៅ។
![](https://image.thmeythmey.com/pictures/2017/12/19/thumb2/nocc_01.jpg)
ទន្ទឹមនឹងការគ្រោងបង្កើតទូរទស្សន៍កីឡាជាតិជាលើកដំបូងនេះដែរ អគ្គលេខាធិការ NOCC រូបនេះ ជំរុញឲ្យបណ្តាសហព័ន្ធកីឡាជាតិទាំងអស់បង្កើតប្រព័ន្ធផ្សព្វផ្សាយផ្ទាល់ខ្លួនដូចជាទំព័រហ្វេសប៊ុក ឬគេហទំព័រព័ត៌មានជាដើមជាមុនសិន។ ហើយគេហទំព័ររបស់សហព័ន្ធកីឡា គឺស្ថិតក្រោមសេនាធិការគេហទំព័ររបស់ NOCC ដែលមានទំនាក់ទំនងយ៉ាងជិតស្និតជាមួយគណៈកម្មាធិការអូឡាំពិកអន្តរជាតិ។
កាលពីថ្ងៃទី១៤ ខែធ្នូ ឆ្នាំ២០១៧ កន្លងទៅ គណៈកម្មាធិការជាតិអូឡាំពិកកម្ពុជាក្រោមការឧបត្ថម្ភរបស់អង្គការសាមគ្គីអូឡាំពិកបានរៀបចំសិក្ខាសាលាស្តីពី«កម្មវិធីអភិវឌ្ឍន៍ប្រព័ន្ធគ្រប់គ្រងគេហទំព័រ» ដើម្បីចែករំលែកចំណេះដឹងផ្នែកព័ត៌មានវិទ្យាដល់សហព័ន្ធកីឡាជាតិនីមួយៗ ព្រោះសិក្ខាកាមភាគច្រើនជាមន្ត្រីមកពីសហព័ន្ធ។ សិក្ខាសាលាដែលធ្វើឡើងតែមួយថ្ងៃនេះ ក្រោមការធ្វើបទបង្ហាញរបស់អ្នកជំនាញការអៀរឡង់ លោក Jones Ajayi និងលោក Ken អ្នកគ្រប់គ្រងវេបសាយ NOCC៕
Tag:
វ៉ាត់ ចំរើន
ទូរទស្សន៍កីឡាជាតិ
© រក្សាសិទ្ធិដោយ thmeythmey.com