អន្តរជាតិ
នាយករដ្ឋមន្ត្រីវៀតណាម ទទូចឲ្យប្រជាជនដាំបន្លែធម្មជាតិដើម្បីសុខុមាលភាពទាំងអស់គ្នា ![](https://image.thmeythmey.com/pictures/2017/12/19/vn.jpg)
×![]()
រដ្ឋាភិបាលក្រុងហាណូយ បានលើកទឹកចិត្តប្រជាជនឲ្យផលិតបន្លែសរីរាង្គ ឬបន្លែគ្មានជាតិគីមីក្នុងគោលដៅធានាឲ្យបាននូវសុវត្ថិភាពចំណីអាហារ ក៏ដូចជាដើម្បីជំរុញផលិតផលបន្លែវៀតណាមចូលក្នុងទីផ្សាររបស់ពិភពលោកកាន់តែច្រើន ។ ក្រុងហាណូយ ក៏បានទទូចឲ្យមានការចូលរួមគ្នាទាំងខាងមន្ត្រីរដ្ឋាភិបាល អ្នកជំនួញ និងកសិករដើម្បីប្រែក្លាយគោលដៅមួយនេះឲ្យក្លាយជាការពិត ។
នាយករដ្ឋមន្ត្រីវៀតណាម Nguyễn Xuân Phúc នាវេទិកាអន្តរជាតិមួយស្តីការដាំដុះតាមបែបធម្មជាតិកាលពីចុងសប្តាហ៍កន្លងទៅ បានទទូចឲ្យក្រសួងពាក់ព័ន្ធរបស់ខ្លួនរួមគ្នាកំណត់ពីលក្ខខណ្ឌស្តង់ដារមួយសម្រាប់កសិដ្ឋានផលិតបន្លែធម្មជាតិ ។ នាយករដ្ឋមន្ត្រីនេះ បានឲ្យតម្លៃលើសុវត្ថិភាពចំណីអាហារ ក៏ដូចជាស្តង់ដារនៃការផលិតបន្លែធម្មជាតិ ។ នេះបើយោងតាមការចុះផ្សាយរបស់សារព័ត៌មានវៀតណាម Vietnam News នៅថ្ងៃ១៨ ធ្នូ ។
នាយករដ្ឋមន្ត្រីវៀតណាម ក៏បានលើកឡើងដែរថា តម្រូវការទីផ្សារកាន់តែច្រើន គឺជាឱកាសមាសសម្រាប់វៀតណាមក្នុងការអភិវឌ្ឍវិស័យកសិកម្មតាមបែបធម្មជាតិ ឬដោយមិនប្រើប្រាស់សារធាតុគីមី ។ លោក ជឿជាក់ថា មានផលិតផលបន្លែជាច្រើន ដែលអាចផលិតបានតាមបែបធម្មជាតិ ក៏ប៉ុន្តែលោក ក៏បានឲ្យមានការបង្កើតនូវកសិកម្មអនាម័យសម្រាប់ប្រជាជនវៀតណាមទាំងអស់ និងសម្រាប់ការនាំចេញផងដែរ ។
ប្រមុខរដ្ឋាភិបាលក្រុងហាណូយរូបនេះ ក៏បានសង្កត់ធ្ងន់ដែរថា៖«ការអនុវត្តវិធីសាស្ត្រកសិកម្មតាមបែបធម្មជាតិនៅក្នុងតំបន់នីមួយៗ ពិតជាបានបង្ហាញពីការទទួលខុសត្រូវសម្រាប់សហគមន៍របស់ខ្លួន និងអនាគតអ្នកជំនាន់ក្រោយផងដែរ»។
ជាងនេះទៅទៀតនោះ នាយករដ្ឋមន្ត្រី ក៏បានទទូចឲ្យទាំងអ្នកវិទ្យាសាស្ត្រ កសិករ អ្នកជំនួញ និងគ្រប់ភាគីពាក់ព័ន្ធទាំងអស់នៅក្នុងសង្គមចូលរួមអភិវឌ្ឍកសិកម្មបែបធម្មជាតិទាំងអស់គ្នាដើម្បីផលប្រយោជន៍រួមដែលរួមមានទាំងបរិស្ថាន និងសុខភាពល្អ និងជាពិសេសនោះសុភមង្គលដល់ប្រជាជនគ្រប់ៗគ្នាតែម្តង ៕
© រក្សាសិទ្ធិដោយ thmeythmey.com