ឧត្តមសេនីយ៍កម្ពុជា-វៀតណាម នឹងសន្ទនាគ្នា ស្តីពីនយោបាយការពារជាតិ

ជាតិ

ឧត្តមសេនីយ៍កម្ពុជា-វៀតណាម នឹងសន្ទនាគ្នា ស្តីពីនយោបាយការពារជាតិ

19, Dec 2017 , 10:39 pm

រូបភាព

ដោយ: ថ្មីៗ

ភ្នំពេញ៖ កិច្ចសន្ទនាស្តីពីនយោបាយការពាជាតិ នឹងត្រូវបានរៀបចំឡើងរវាងប្រទេសកម្ពុជា និងប្រទេសវៀតណាម។ នេះបើតាមសេចក្តីប្រកាសព័ត៌មានពីក្រសួងការពារជាតិកម្ពុជា។

សេចក្តីប្រកាសព័ត៌មាន បានឲ្យដឹងថា លោកឧត្តមសេនីយ៍ឯកបម្រុង ង្វៀន ជីវិញ សមាជិកបក្សកុម្មុយនីស្ត និងជាអនុរដ្ឋមន្ត្រីក្រសួងការពារជាតិវៀតណាម នឹងដឹកនាំគណៈប្រតិភូជាន់ខ្ពស់ មកបំពេញទស្សនកិច្ចនៅកម្ពុជា ចាប់ពីថ្ងៃទី២០ ដល់ថ្ងៃទី២២ ខែធ្នូ ឆ្នាំ២0១៧។ ហើយលោក ជាអ្នកចូលរួមក្នុងកិច្ចសន្ទនាខាងលើ ជាមួយនាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិកម្ពុជា។

ប្រភពដដែល បានបន្តថា គោលបំណងនៃកិច្ចសន្ទនាខាងលើ គឺដើម្បីជំរុញឲ្យមានកិច្ចសហប្រតិបត្តិការល្អ លើគ្រប់វិស័យ រាប់ទាំងការពង្រឹងទំនាក់ទំនងមិត្តភាព និងសាមគ្គីភាព នៃប្រទេសទាំងពីរ ដែលបានអនុវត្តយ៉ាងត្រឹមត្រូវ និងមានប្រសិទ្ធភាពនាពេលកន្លងមក។ ក្រសួងការពារជាតិ បានបញ្ជាក់ក្នុងសេចក្តីប្រកាសព័ត៌មានយ៉ាងដូច្នេះថា៖«ប្រទេសទាំងពីរ នឹងបន្តអនុវត្តឲ្យបានល្អប្រសើរបន្ថែមទៀតនូវអនុស្សារណៈស្តីពី កិច្ចសហប្រតិបត្តិការ ការពារជាតិរវាងក្រសួងការពារជាតិនៃប្រទេសទាំងពីរ នាពេលខាងមុខ»។

បើតាមសេចក្តីប្រកាសព័ត៌នោះ លោក ង្វៀន ជីវិញ ក៏នឹងមានជំនួបជាមួយសម្តេចនាយករដ្ឋមន្ត្រី ហ៊‌ុន សែន និងសម្តេច ទៀ បាញ់ រដ្ឋមន្ត្រីក្រសួងការពារជាតិកម្ពុជា ផងដែរ៕