កីឡាជាតិ
ជាតិ
លីគ៖ ការពារជាតិឈ្នះណាហ្គាដោយការទាត់ប៉េណាល់ទីដើម្បីឡើងទៅជួបព្រះខ័នរាជនៅវគ្គ១/២ ក្រុមកីឡាករក្រសួងការពារជាតិអបអរជ័យជម្នះរបស់ខ្លួនលើណាហ្គាវើល។ រូបថត FFC
× ក្លិបក្រសួងការពារជាតិ ទទួលបានកៅអីវគ្គពាក់កណ្តាលផ្តាច់ព្រ័ត្រនៃក្របខណ្ឌខេមបូឌានមិត្តហ្វូនលីគឆ្នាំ២០១៧ បន្ទាប់ពីពួកគេយកឈ្នះណាហ្គាវើល ៤-៣ តាមរយៈការទាត់បាល់ប៉េណាល់កាត់ក្តី ក្រោយជំនួប១២០នាទីដោយគ្មានការស៊ុតបាល់បញ្ចូលទី។
ក្រុមទាំងពីរមានឱកាសប្រហាក់ប្រហែលគ្នា ក្រោយការប្រកួតអស់៩០នាទី និងការបន្ថែម១៥នាទីពីរដង។ ណាហ្គាវើលដែលជាម្ចាស់ជើងឯកពីរជំនាន់ បានខកដំណើរក្នុងការដណ្តើមពាននារដូវកាលនេះ ដោយ គួច ដានី ទាត់បាល់ប៉េណាល់ទីមុនគេ ប៉ុន្តែការស៊ុតបែបបញ្ឆោតនាំឲ្យគេទទួលរងពិន័យកាតលឿង និងចាត់ទុកជាគ្រាប់អសារបង់ បើទោះបីជាបាល់បានចូលសំណាញ់ទីក៏ដោយ។
ក្រោយ Atuheire Kipson, Kento Fujihara និង គួច សុគម្ភៈ សុទ្ធតែធ្វើបានសម្រេចលើការទាត់បាល់ប៉េណាល់ទីរបស់ខ្លួន សួន វីរៈ ត្រូវបានរារាំងដោយ អ៊ុំ សេរីរត្នន៍ ខណៈកីឡាករទាំង៤រូបរបស់ក្រសួងការពារជាតិ Ri Hyok-chol, Kim Kyong-hun, Choe Myong-ho និង សុខ ហៀង សុទ្ធតែធ្វើឲ្យអ្នកចាំទីណាហ្គាវើល សំរឹត សីហា លោតខុសគោលដៅ។
ជ័យជម្នះ ៤-៣ លើការទាត់ប៉េណាល់ទីរបស់ការពារជាតិ នាំឲ្យពួកគេឡើងទៅជួបព្រះខ័នរាជស្វាយរៀងនៅវគ្គពាក់កណ្តាលផ្តាច់ព្រ័ត្រនាល្ងាចថ្ងៃទី២៣ ខែធ្នូ នៅកីឡដ្ឋានខេត្តស្វាយរៀង។ ក្រុមដែលឈ្នះនឹងត្រូវប៉ះបឹងកេតនៅវគ្គផ្តាច់ព្រ័ត្រនាថ្ងៃទី៣០ ខែធ្នូ នៅពហុកីឡដ្ឋានជាតិអូឡាំពិក៕
© រក្សាសិទ្ធិដោយ thmeythmey.com