កីឡាជាតិ
ជាតិ
ក្រោយជួយក្រុមឈ្នះ Hun Sen Cup សុក សំណាង មិនទាន់បានកាន់ពានឡើយ ព្រោះនៅមន្ទីរពេទ្យ កីឡាករ សុក សំណាង នៅតែបន្តមើលការប្រកួតតាមទូរសព្ទដៃ អំឡុងពេលដែលត្រូវបានបញ្ជូនទៅពិនិត្យរបួស។ រូបថត ហ្វេសប៊ុក លោក រិទ្ធ ឌីកា
× ខ្សែប្រយុទ្ធ សុក សំណាង ដែលបានរួមចំណែកដ៏ធំក្នុងការជួយឲ្យក្រុមព្រះខ័នរាជស្វាយរៀងឈ្នះពានសម្តេច ហ៊ុន សែន ប្រចាំឆ្នាំ២០១៧ មិនទាន់បានលើកពានដោយផ្ទាល់នោះឡើយ។ បន្ទាប់ពីស៊ុតបាល់បញ្ចូលទីចំនួន២គ្រាប់ សំណាង ត្រូវបានបញ្ជូនទៅពិនិត្យនិងព្យាបាលនៅមន្ទីរពេទ្យកាល់ម៉ែត្រភ្លាមៗ ក្រោយរងរបួសបាក់ក្តោងច្រមុះក្នុងជំនួបតទល់ជាមួយក្រុមណាហ្គាវើលកាលពីថ្ងៃទី២៧ ធ្នូ នៅពហុកីឡដ្ឋានជាតិ។
ទោះបីដឹងថាក្រុមព្រះខ័នរាជស្វាយរៀងលើកសម្តេច ហ៊ុន សែន ប្រចាំឆ្នាំ២០១៧ ក៏ដោយ តែកីឡាករ សុក សំណាង ដែលកំពុងសម្រាកព្យាបាលរបួសបាក់ក្តោងច្រមុះនៅមន្ទីរពេទ្យមិនទាន់បានលើកពានផ្ទាល់ដៃនៅឡើយទេ។ នេះបើយោងតាមកីឡាករ ប្រាក់ មុន្នីឧត្តម ដែលបានទៅសួរសុខទុក្ខផ្ទាល់នៅមន្ទីរពេទ្យកាល់ម៉ែត្រ។
មុន្នីឧត្តម បានអះអាងថា ស្ថានភាពរបួសរបស់កីឡាករ សុក សំណាង ឥឡូវនេះមានសភាពប្រសើរជាងមុន ពោលគឺរូបគេលែងហូរឈាមតាមច្រមុះ និងអាចញ៉ាំអាហារបានវិញហើយ។ យ៉ាងណាមិញ បញ្ហារបួសនេះកំពុងស្ថិតក្នុងការតាមដានយ៉ាងយកចិត្តទុកដាក់ពីគ្រូពេទ្យ។ ឧត្តម បានបញ្ជាក់ថា បើស្ថានភាពរបួសពុំធូរស្បើយទេកីឡាករ សុក សំណាង អាចត្រូវបញ្ជូនទៅពិនិត្យ និងព្យាបាលនៅក្រៅប្រទេស។
កីឡាកររូបនេះបានបន្ថែមថា ទោះបីកីឡាករ សុក សំណាង រងរបួសធ្ងន់មានឈាមហូរតាមច្រមុះយ៉ាងណាក៏ដោយ តែរូបគេនៅតែតាមដានការប្រកួតរបស់ក្រុមព្រះខ័នរាជស្វាយរៀងតាមរយៈការផ្សាយផ្ទាល់ជានិច្ច។ ហើយការដែលរូបគេដឹងថាក្រុមព្រះខ័នរាជស្វាយរៀងលើកពានសម្តេច ហ៊ុន សែន ឆ្នាំនេះក៏តាមរយៈការមើលការផ្សាយផ្ទាល់នេះដែរ។
ខ្សែប្រយុទ្ធ សុក សំណាង ត្រូវបានរថយន្តសាម៉ុយដឹកទៅពិនិត្យនិងសង្គ្រោះនៅមន្ទីរពេទ្យកាល់ម៉ែត្រភ្លាមៗក្រោយរូបគេរងរបួសបាក់ក្តោងច្រមុះដោយពុំដឹងមូលហេតុ។ តែបើតាមការសន្និដ្ឋានរបស់សិស្សច្បង ប្រាក់ មុន្នីឧត្តម ក្តោងច្រមុះរបស់ សំណាង អាចត្រូវជាមួយកែងដៃ ជាងការប៉ះទង្គិចជាមួយក្បាល។
របួសបាក់ក្តោងច្រមុះនេះ កើតឡើងក្នុងជំនួបដែលព្រះខ័នរាជស្វាយរៀងយកឈ្នះណាហ្គាវើល ៣-០ នាការប្រកួតវគ្គផ្តាច់ព្រ័ត្រពានរង្វាន់សម្តេច ហ៊ុន សែន ឆ្នាំ២០១៧ កាលពីថ្ងៃទី២៧ ខែធ្នូ ឆ្នាំ២០១៧ នៅពហុកីឡដ្ឋានជាតិ។ ក្នុងជ័យជម្នះ ៣-០ របស់ព្រះខ័នរាជស្វាយរៀងមានការរួមចំណែកពីកីឡាករ សុក សំណាង ចំនួនពីរគ្រាប់ និងកីឡាករ ហួយ ផល្លីន មួយគ្រាប់៕
Tag:
បាល់ទាត់
Hun Sen Cup 2017
សុក សំណាង
© រក្សាសិទ្ធិដោយ thmeythmey.com