កីឡាជាតិ
ជាតិ
បូរ៉ាវី និង Kipson ត្រៀមទទួលស្បែកជើងមាសរៀងៗខ្លួននៅចុងខែមករានេះ
×
ខ្សែប្រយុទ្ធ ឃួន ឡាបូរ៉ាវី ឈ្នះស្បែកជើងមាសពានរង្វាន់សម្តេច ហ៊ុន សែន ប្រចាំឆ្នាំ២០១៧ ក្រោយរកបាន១៦គ្រាប់សម្រាប់ក្រុមបញ្ចប់ចំណាត់ថ្នាក់លេខ៤បឹងកេត។ ជាមួយគ្នានេះ ខ្សែប្រយុទ្ធ Atuheire Kipson ក្រោយរកបាន២៧គ្រាប់ឲ្យណាហ្គាវើល បានគ្រងស្បែកជើងមាសក្របខណ្ឌលីគកំពូលកម្ពុជាប្រចាំឆ្នាំ២០១៧។
ក្រោយខកខានពីរឆ្នាំក្នុងការគ្រងពានរង្វាន់ស្បែកជើងមាសនៅឆ្នាំ២០១៥ និង ២០១៦ ខ្សែប្រយុទ្ធ ឃួន ឡាបូរ៉ាវី ដែលរកបាន១៦គ្រាប់ឲ្យបឹងកេតបានឈ្នះស្បែកជើងមាសពានរង្វាន់សម្តេច ហ៊ុន សែន សារជាថ្មីនៅឆ្នាំ២០១៧។ តាំងពីឆ្នាំ២០០៧ នេះជាលើកទី៤សម្រាប់ ឃួន ឡបូរ៉ាវី ដែលឈ្នះពានរង្វាន់នេះ ពោលគឺរូបគេធ្លាប់ឈ្នះពីរលើកពេលរួមរស់ជាមួយព្រះខ័នរាជស្វាយរៀងនៅឆ្នាំ២០១១ និង២០១២ ក្រោយរកបាន២៤គ្រាប់ និងឆ្នាំ២០១៤ ក្រោយរកបាន១២គ្រាប់ឲ្យបឹងកេត។
តែយ៉ាងណា ១៦គ្រាប់របស់កីឡាករ ឃួន ឡាបូរ៉ាវី មិនអាចជួយឲ្យបឹងគ្រងជើងឯកនៅឆ្នាំនេះឡើយ ពោលគឺក្រុមបឹងកេតបានបញ្ចប់ក្នុងចំណាត់លេខ៤ក្រោយចាញ់ក្រុមអគ្គិសនីកម្ពុជាដោយបាល់ប៉េណាល់ទី ៥-៤។
ទន្ទឹមនឹងនេះកីឡាករជនជាតិរវ៉ាន់ដា Atuheire Kipson បានឈ្នះពានស្បែកជើងមាសក្របខណ្ឌមិត្តហ្វូនខេមបូឌានលីកឆ្នាំ២០១៧ ក្រោយរកបាន២៧គ្រាប់សម្រាប់ណាហ្គាវើល។ ប៉ុន្តែគ្រាប់បាល់ដ៏ច្រើននេះមិនអាចជួយឲ្យណាហ្គាវើលគ្រងជើងឯកនោះឡើយ ដោយក្រុមនេះបញ្ចប់ត្រឹមចំណាត់ថ្នាក់លេខ៤ ក្រោយចាញ់ក្រសួងការពារជាតិដោយបាល់ប៉េណាល់ទី ៤-៣។
គេសង្កេតឃើញអ្នកដែលរកគ្រាប់បាល់បានច្រើនជាងគេទាំង៥នាក់នៅឆ្នាំនេះសុទ្ធតែជាកីឡាករបរទេស ខណៈកីឡាករកម្ពុជាមិនជាប់ក្នុងបញ្ជីអ្នករកគ្រាប់បាល់បានច្រើនជាងគេដែលបង្ហាញដោយគណៈកម្មការប្រកួតបាល់ទាត់ជាតិកម្ពុជាឡើយ។ តាមរយៈលទ្ធផលនេះគេអាចសន្និដ្ឋានបានថា សមត្ថភាពបញ្ចប់ទីរបស់កីឡាករកម្ពុជានៅមានកម្រិតនៅឡើយ។
ក្រៅពីម្ចាស់ស្បែកជើងមាសខាងលើ កីឡាករដែលរកគ្រាប់បាល់បានច្រើនជាបន្តបន្ទាប់រួមមានខ្សែប្រយុទ្ធជនជាតិប្រេស៊ីល Maycon Calijuri រកបាន២៥គ្រាប់ឲ្យក្រុមជើងឯកបឹងកេត ខណៈខ្សែប្រយុទ្ធកូរ៉េខាងជើង Choe Myongho សម្រេចបាន២៣គ្រាប់ឲ្យក្រសួងការពារជាតិ។ រីឯកីឡាករនីហ្សេរីយ៉ា Dzama Bata រកបាន១៨គ្រាប់សម្រាប់អាស៊ីអឺរ៉ុប និងខ្សែប្រយុទ្ធនីហ្សេរីយ៉ា Timothy Okereke រកបាន១៧គ្រាប់សម្រាប់ខេមបូឌានថាយហ្គឺរ។
ពានរង្វាន់ស្បែកជើងមាសទាំងនេះរួមទាំងពានរង្វាន់លក្ខណៈបុគ្គលជាច្រើនទៀតរួមអ្នកចាំទីល្អ ក្រុម Fair Play គ្រូបង្វឹក និងកីឡាករប្រជាប្រិយ នឹងប្រកាសជាផ្លូវការក្នុងកម្មវិធី Award Night របស់គណៈកម្មការប្រកួតបាល់ទាត់ជាតិកម្ពុជានាថ្ងៃទី២៥ ខែមករា ឆ្នាំ២០១៨ ខាងមុខនេះ៕
Tag:
Cambodian League 2017
ស្បែកជើងមាស
Atuheire Kipson
© រក្សាសិទ្ធិដោយ thmeythmey.com