អន្តរជាតិ
ចិន៖ ចំនួនក្មេងកើតឆ្នាំ ២០១៧ធ្លាក់ចុះ ទោះរដ្ឋាភិបាលអនុញ្ញាតឲ្យមានកូនពីរក៏ដោយ រូបភាព៖ AFP
× ចំនួនក្មេងកើតនៅក្នុងប្រទេសចិនធ្លាក់ចុះ ទោះបីជារដ្ឋាភិបាលសម្រេចឲ្យប្រជាជនទាំងអាចមានកូនដល់ពីរនាក់ក្តី។ គេសង្កេតឃើញថា ចំនួនក្មេងកើតក្នុងឆ្នាំ ២០១៧ មានចំនួនតិចជាងចំនួនក្មេងដែលកើតនៅក្នុងឆ្នាំ ២០១៦។
ឆ្នាំ ២០១៧ ចំនួនក្មេងកើតនៅក្នុងប្រទេសចិនមានត្រឹម ១៧, ២៣ លាននាក់ ដែលចំនួននេះ ធ្លាក់ចុះបើប្រៀបធៀបនឹងចំនួនក្មេងកើតនៅឆ្នាំ ២០១៦នោះ។ ឆ្នាំ ២០១៦ ចំនួនក្មេងកើតសរុបទូទាំងប្រទេសចិនមានរហូតដល់ ១៧, ៨៦ លាននាក់ឯណោះ។ នេះបើតាមការបញ្ជាក់របស់ការិយាល័យជាតិស្ថិតិចិន។
យោងតាមទីភ្នាក់ងារព័ត៌មាន AFP ចំនួនក្មេងកើតថយចុះ បើទោះជារដ្ឋាភិបាលចិនបានសម្រេចបញ្ឈប់ការអនុវត្តគោលនយោបាយកូនតែមួយ និងអនុញ្ញាតឲ្យប្រជាជនមានកូនដល់ពីរនាក់ក្តី។ វិធានការរឹតត្បិតការមានកូនលើសពីមួយនេះ ត្រូវបានអនុវត្តចាប់ពីឆ្នាំ ១៩៧០ មក ហើយអ្នកដែលបំពានវិធានការនេះត្រូវរងវិន័យ និងត្រូវបង្ខំឲ្យរំលូតកូនផង។
ចិនដែលមានប្រជាជនសរុប ១,៤ ពាន់លាននាក់នេះ បានសម្រេចបញ្ឈប់ការអនុវត្តគោលនយោបាយកូនតែមួយនៅនៅក្នុងឆ្នាំ ២០១៥ ដើម្បីឆ្លើយតបនឹងកង្វល់ជុំវិញការកើនឡើងនៃចំនួនមនុស្សចាស់នៅក្នុងប្រទេសនិងថយចុះកម្លាំងពលកម្ម។
ពាក់ព័ន្ធការថយចុះចំនួនក្មេងកើតនេះ គណៈកម្មការសុខាភិបាល និង ផែនការគ្រួសារចិនបានបញ្ជាក់ថា ការថយចុះនេះបណ្តាលពីមូលហេតុមួយចំនួនក្នុងនោះមានថយចុះនូវចំនួនស្ត្រីដែលមានអាយុអាចពរពោះបាន ការសម្រេចចិត្តរបស់ប្រជាជនក្នុងការរៀបការ និង សម្រេចយកកូននៅពេលខ្លួនមានអាយុច្រើនផង។
ចំណែកការចំណាយលុយកាក់លើការថែទាំកូន កង្វះសេវាថែទាំងក្មេង និងការអភិវឌ្ឍនៃការងាររបស់ស្ត្រីក៏ជាមូលហេតុសំខាន់ក្នុងការជំរុញឲ្យប្រជាជនមិនចង់មានកូនផងដែរ។
យ៉ាងណាមិញ បើទោះជាចំនួនក្មេងដែលកើតមានការថយចុះក៏ពិតមែន តែរបាយការណ៍ជារួមបានបង្ហាញថាចំនួនក្មេងដែលកើតនៅក្នុងក្រុមគ្រួសារដែលមានកូនមួយហើយនោះកើនឡើងដល់ ៥១ភាគរយនៅឆ្នាំ ២០១៧។ វាកើនឡើងជាងឆ្នាំ ២០១៦ ចំនួន ប្រាំភាគរយ។
Tag:
ចិន
គោលនយោបាយកូនតែមួយ
© រក្សាសិទ្ធិដោយ thmeythmey.com