ជាតិ
នយោបាយជាតិ
សម្តេចក្រុមព្រះ៖ អនាធិបតេយ្យដែលបង្កដោយជនអសកម្ម កើតមានរឿយៗក្នុងហ្វ៊ុនស៊ិនប៉ិច សម្តេចក្រុមព្រះ នរោត្តម រណឫទ្ធិ ប្រធានគណបក្សហ៊្វុនស៊ិនប៉ិច
× គ្មានអ្វីប្លែកនោះឡើយសម្រាប់សម្តេចក្រុមព្រះ នរោត្តម រណឫទ្ធិ ជុំវិញបញ្ហាដែលបានកើតឡើងក្នុងគណបក្សហ្វ៊ុនស៊ិនប៉ិចរបស់ព្រះអង្គ។ កាលពីថ្ងៃទី២៥ ខែមករា ព្រះអង្គបានចេញសេចក្តីណែនាំមួយដល់ថ្នាក់ដឹកនាំគ្រប់លំដាប់ថ្នាក់ក្នុងបក្ស ចាត់វិធានការលើជនអសកម្មដែលព្យាយាមបំផ្លាញរចនាសម្ព័ន្ធបក្ស ដោយព្រះអង្គបានលើកឡើងថា ករណីបែបនេះ ធ្លាប់កើតឡើងជារឿយៗកាលពីអតីតកាល។
យោងតាមការផ្សព្វផ្សាយនានា លោក ប៉ោ ប៊ុនស្រ៊ឺ អនុប្រធាន និងលោក យឹម សាវី អគ្គលេខាធិការគណបក្សហ្វ៊ុនស៊ិនប៉ិច រងការចោទប្រកាន់ថា ជាថ្នាក់ដឹកនាំដែលប្រកាន់បក្ខពួក ដែលធ្វើឲ្យបាត់បង់ទំនុកចិត្តក្នុងបក្ស។ ថ្នាក់ដឹកនាំមួយចំនួនបានទូលសុំសម្តេចក្រុមព្រះ ដកមេដឹកនាំទាំងពីររូបនេះចេញ។
ដោយមិនលើកឡើងចំៗចំពោះករណីខាងលើ សម្តេចក្រុមព្រះ នរោត្តម រណឫទ្ធិ បានគូសបញ្ជាក់ថា ប្រភពព័ត៌មានក្រៅផ្លូវការ និងព័ត៌មានដែលបានបង្ហោះនៅលើបណ្តាញសង្គម បង្កឡើងដោយជនអសកម្មមួយចំនួនក្នុងបក្សក្នុងគោលបំណងបំផ្លាញរចនាសម្ព័ន្ធរបស់បក្ស។
«ករណីរបៀបនេះ ធ្លាប់បានកើតឡើងជារឿយៗតាំងពីអតីតកាល ដែលបង្កដោយជនមួយក្រុមតូចគិតតែផលប្រយោជន៍ផ្ទាល់ខ្លួនតែប៉ុណ្ណោះ»។ នេះជាចំណាររបស់សម្តេចក្រុមព្រះ។
ដើម្បីជៀសវាងការញុះញង់ ការបំបែកបំបាក់សាមគ្គីភាពផ្ទៃក្នុង ឬការបំផ្លាញរចនាសម្ព័ន្ធ តាមរយៈការផ្តិតមេដៃលើញត្តិ ការជួបប្រជុំសម្ងាត់ ឬការធ្វើសមាជខុសច្បាប់ ព្រះប្រធានគណបក្សហ្វ៊ុនស៊ិនប៉ិច បានស្នើទៅថ្នាក់ដឹកនាំគ្រប់លំដាប់ថ្នាក់ ចាត់វិធានការស្របតាមលក្ខន្តិកៈ ឬវិធានផ្ទៃក្នុងបក្សចំពោះជនអសកម្មមួយចំនួនដែលលាក់ខ្លួនរង់ចាំឱកាសដើម្បីបំផ្លាញភាពសុខសានរបស់បក្ស។
សម្តេច នរោត្តម រណឫទ្ធិ បានមានបន្ទូលថា បក្សត្រូវរក្សាស្ថេរភាពផ្ទៃក្នុងឲ្យបានរឹងមាំដើម្បីឈានឆ្ពោះទៅការបោះឆ្នោតជាបន្តបន្ទាប់ដ៏ខ្លីខាងមុខ ជាពិសេសតាមរយៈការពង្រឹងសមត្ថភាពទាំងនៅថ្នាក់កណ្តាល និងនៅមូលដ្ឋាន៕
Tag:
សម្តេចក្រុមព្រះ
ហ៊្វុនស៊ិនប៉ិច
© រក្សាសិទ្ធិដោយ thmeythmey.com