សកម្មជនបរិស្ថានពីរនាក់ ដែលថតរូបក្រុមហ៊ុនបូមខ្សាច់ ត្រូវជាប់ពន្ធនាគារ ១ឆ្នាំ

ជាតិ

សកម្មជនបរិស្ថានពីរនាក់ ដែលថតរូបក្រុមហ៊ុនបូមខ្សាច់ ត្រូវជាប់ពន្ធនាគារ ១ឆ្នាំ

26, Jan 2018 , 4:53 pm

រូបភាព

(ពីឆ្វេងទៅស្តាំ) លោក ហ៊‌ុន វណ្ណៈ និងលោក ឌឹម គុណឌី សកម្មជននៃអង្គការមាតាធម្មជាតិ។ រូបភាពពីគណនីហ្វេសបុក Ma Chettra

ដោយ: ថ្មីៗ

ចៅក្រមជំនុំជម្រះនៃតុលាការខេត្តកោះកុង បានប្រកាសសាលក្រម នៅរសៀលថ្ងៃទី២៦ ខែមករា ឆ្នាំ២០១៨នេះ ដោយសម្រេចផ្តន្ទាទោសលោក ហ៊ុន វណ្ណៈ និងលោក ឌឹម គុណឌី សកម្មជននៃអង្គការមាតាធម្មជាតិ ឲ្យជាប់ពន្ធនាគាររយៈពេល១ឆ្នាំ ក្រោម «បទធ្វើឲ្យប៉ះពាល់សិទ្ធិខាងរូបភាពនៃបុគ្គល និងបទញុះញង់ឲ្យប្រព្រឹត្តបទឧក្រិដ្ឋជាអាទិ៍»។ ប៉ុន្តែ ចៅក្រម កំណត់ឲ្យសកម្មជនទាំងពីរនេះ អនុវត្តទោសក្នុងពន្ធនាគារតែ៥ខែទៀតប៉ុណ្ណោះ ហើយបន្ទាប់មកនឹងត្រូវដោះលែងឲ្យមានសេរីភាពវិញ។

ក្រៅពីជាប់ពន្ធនាគារ លោក ហ៊ុន វណ្ណៈ និង លោកឌឹម គុណឌី ក៏ត្រូវបានចៅក្រម បង្គាប់ឲ្យបង់ប្រាក់ ១លានរៀលក្នុងម្នាក់ៗ ចូលទៅរដ្ឋផងដែរ។ ចៅក្រម បានបើកសវនាការជំនុំជម្រះលើសំណុំរឿងរបស់សកម្មជនទាំងពីរនាក់នេះ តាំងថ្ងៃម្សិលមិញមកម្ល៉េះ ប៉ុន្តែបានលើកពេលមកប្រកាសសាលក្រមនៅថ្ងៃនេះ។

លោក សំ ចំរើន មេធាវី ដែលការពារក្តីឲ្យពួកគេទាំងពីរ បានប្រាប់សារព័ត៌មានថ្មីៗ តាមទូរសព្ទយ៉ាងដូច្នេះថា៖«ក្នុងនាមខ្ញុំជាមេធាវី ខ្ញុំមិនអាចទទួលយកបានទេ ចំពោះការសម្រេចនេះ។ ខ្ញុំនឹងពិភាក្សាជាមួយកូនក្តី ដើម្បីសម្រេចថាត្រូវធ្វើយ៉ាងម៉េចទៀត»។

លោក ហ៊ុន វណ្ណៈ និង លោកឌឹម គុណឌី ត្រូវបានឃាត់ខ្លួនកាលពីអំឡុងខែកញ្ញា ឆ្នាំ២0១៧ ដោយសារតែពួកគេ បានថតរូបសកម្មភាពក្រុមហ៊ុនមួយ ដែលបូមខ្សាច់នៅក្នុងខេត្តកោះកុង។ អ្នកទាំងពីរនេះ រួមជាមួយសកម្មជនតាមសហគមន៍នានា តែងចេញមុខជំទាស់នឹងការបូកខ្សាច់ យកទៅលក់នៅក្រៅប្រទេស និងការកាប់បំផ្លាញព្រៃឈើ ជាដើម៕