ជាតិ
ថ្នាក់រាជធានី-ខេត្ត នឹងមានសិទ្ធិពេញលេញក្នុងការរើសមន្ត្រីក្របខណ្ឌដោយខ្លួនឯង
× ភ្នំពេញ៖ អភិបាល នៃគណៈអភិបាល នៅតាមរាជធានី-ខេត្ត អាចនឹងទទួលបានសិទ្ធិអំណាច នាពេលខាងមុខ ក្នុងការជ្រើសរើសមន្ត្រីក្របខណ្ឌដោយខ្លួនឯង។ នេះ គឺជាគម្រោងនៃកំណែទម្រង់ប្រព័ន្ធរដ្ឋបាលក្នុងដំណាក់កាលបន្ទាប់ ដែលសម្តេច ស ខេង រដ្ឋមន្ត្រីក្រសួងមហាផ្ទៃ បានលើកឡើងក្នុងពិធីបូកសរុបការងារប្រចាំឆ្នាំ២០១៧ និងលើកទិសដៅការងារសម្រាប់ឆ្នាំ២០១៨ នៅខេត្តសៀមរាប កាលពីថ្ងៃទី២៥ ខែមករា ឆ្នាំ២០១៨។
សម្តេច ស ខេង អះអាងថា បច្ចុប្បន្ន រដ្ឋាភិបាល កំពុងរៀបចំបែបបទ និងលិខិតបទដ្ឋាន ដើម្បីផ្តល់សិទ្ធិឲ្យរដ្ឋបាលរាជធានី-ខេត្ត អាចជ្រើសរើសមន្ត្រីក្របខណ្ឌ ក្នុងដែនដីរបស់ខ្លួន។ រដ្ឋមន្ត្រីក្រសួងមហាផ្ទៃរូបនេះ បន្តថា ឆ្នាំ២០១៨ ដល់ឆ្នាំ២០២០ គឺជាដំណាក់កាលចុងក្រោយនៃការធ្វើកំណែទម្រង់នៃប្រព័ន្ធវិមជ្ឈការ និងវិសហមជ្ឈការ ដែលជាការផ្ទេរសិទ្ធិអំណាច និងធនធានផ្សេងៗ ទៅឲ្យរដ្ឋបាលថ្នាក់ក្រោមជាតិ។
រដ្ឋមន្ត្រីក្រសួងមហាផ្ទៃ ដែលគ្រប់គ្រងលើរដ្ឋបាលថ្នាក់ក្រោមជាតិ បានបញ្ជាក់យ៉ាងដូច្នេះថា៖«យើងរៀបចំអស់ហើយ រាប់តាំងពីក្របខណ្ឌគោលនយោបាយ ច្បាប់ អង្គការចាត់តាំង ដើម្បីអនុវត្តគោលការណ៍ហ្នឹង ហើយចុងក្រោយនេះ គឺការផ្ទេរសិទ្ធិអំណាច និងធនធានឲ្យរដ្ឋបាលថ្នាក់ក្រោយជាតិ។ [….] យើង ចង់ធ្វើយ៉ាងម៉េច ឲ្យរដ្ឋបាលថ្នាក់ក្រោមជាតិ កាន់តែខ្លាំង»។
ប៉ុន្តែ ការជ្រើសរើសកម្លាំងនគរបាល និងទាហាន នៅតែជាសិទ្ធិរបស់រដ្ឋបាលថ្នាក់ជាតិដដែល ឯរដ្ឋបាលថ្នាក់ក្រោមជាតិ មិនអាចទទួលបានសិទ្ធិអំណាចនេះឡើយ។ នេះជាការបន្ថែមចុងក្រោយរបស់រដ្ឋមន្ត្រីក្រសួងមហាផ្ទៃ។
អ្នកនាំពាក្យក្រសួងមុខងារសាធារណៈ លោក ស សាម៉ីឌី បានពន្យល់ថា បច្ចុប្បន្ននេះ រដ្ឋបាលថ្នាក់ជាតិ ទើបមានសិទ្ធិរៀបចំជ្រើសរើសមន្ត្រីក្របខណ្ឌ ដូចជាជ្រើសរើសតាមរយៈការប្រឡង ជាដើម។ លោក បន្តថា ចំពោះរដ្ឋបាលថ្នាក់ក្រោមជាតិ ពោលគឺរដ្ឋបាលរាជធានី-ខេត្ត មិនទាន់មានសិទ្ធិជ្រើសរើសមន្ត្រីក្របខណ្ឌដោយខ្លួនឯងនោះទេ។
អ្នកនាំពាក្យក្រសួងមុខងារសារធារណៈរូបនេះ បានបញ្ជាក់ប្រាប់សារព័ត៌មានថ្មីៗយ៉ាងដូច្នេះថា៖«រាល់ថ្ងៃនេះ រដ្ឋបាលក្រោមជាតិ អត់មានសិទ្ធិរៀបចំការប្រឡង ដើម្បីរើសមន្ត្រីក្របខណ្ឌទេ។ អ្វីៗ រៀបចំដោយថ្នាក់ជាតិ។ បើក្រសួង ឬស្ថាប័នណាមួយ ត្រូវការមន្ត្រីរាជការ ក្រសួងឬស្ថាប័នោះ ជាអ្នករៀបចំជ្រើសរើស»៕
Tag:
ស ខេង
អភិបាលខេត្ត
ប្រធានមន្ទីរ
© រក្សាសិទ្ធិដោយ thmeythmey.com