ជាតិ
×![]()
ភ្នំពេញ៖ ក្នុងឱកាសពិធីបុណ្យចូលឆ្នាំចិន-វៀតណាមខាងមុខនេះ អភិបាលរាជធានីភ្នំពេញ បានហាមពលរដ្ឋដុតផាវ ឬគ្រឿងផ្ទុះ និងការលេងល្បែងស៊ីសង រួមទាំងហែក្បួនដោយគ្មានការអនុញ្ញាត។ អាជ្ញាធររាជធានីពន្យល់ថា បំរាមទាំងនេះនឹងត្រូវអនុវត្តដើម្បីសន្តិសុខ។
សេចក្ដីជូនដំណឹងសាលារាជធានីភ្នំពេញចុះថ្ងៃទី៨កុម្ភៈ បានហាមដាច់ខាតមិនឲ្យពលរដ្ឋដុតផាវ កាំជ្រួច ឬបង្កសំឡេងផ្ទុះគ្រប់ប្រភេទ និងការប្រព្រឹត្តល្បែងស៊ីសងនៅក្នុងពិធីបុណ្យនេះ។ សម្រាប់ការដង្ហែក្បួនបែបសាសនា និងប្រពៃណីផ្សេងៗ សាលារាជធានី ក៏បានហាមដាច់ខាតផងដែរ បើសិនជាគ្មានការអនុញ្ញាត។
លោក ឃួង ស្រេង អភិបាលរាជធានីភ្នំពេញ បានបង្គាប់ឲ្យអាជ្ញាធរគ្រប់លំដាប់ថ្នាក់ ត្រូវចាត់វិធានការឲ្យបានម៉ឺងម៉ាត់ ចំពោះការនាំចូលផាវ និងជាតិផ្ទុះគ្រប់ប្រភេទ តាមច្រកចូលរាជធានីភ្នំពេញ។ ទន្ទឹមនឹងនេះ ត្រូវត្រួតពិនិត្យដកហូតវត្ថុជាតិផ្ទុះទាំងនោះ ពីទីតាំងលក់គ្រប់កន្លែងក្នុងរាជធានីភ្នំពេញផងដែរ។
ក្នុងសេចក្ដីជូនដំណឹងដដែល លោក ឃួង ស្រេង ក៏បានបញ្ជាក់ដល់ក្រសួងធម្មការនឹងសាសនារាជធានីភ្នំពេញ ត្រូវប្រជុំជាមួយបណ្ដាសមាគមចិន និងវៀតណាម ដើម្បីផ្សព្វផ្សាយនូវខ្លឹមសារទាំងនេះ។ ក្រៅពីនេះការហាមឃាត់នូវចំណុចមួយចំនួន អភិបាលរាជធានីភ្នំពេញ បានក្រើនរំលឹកដល់ពលរដ្ឋ រោងចក្រ សហគ្រាស ត្រូវប្រុងប្រយ័ត្នចំពោះការអុជទៀនធូប ក្រដាសសែន ដែលបង្កឲ្យមានអគ្គិភ័យជាយថាហេតុ។ ជាពិសេសការដុតក្រដាសសែន មិនត្រូវដុតលើចិញ្ចើមផ្លូវ ឬទ្រូងផ្លូវសាធារណៈជាដាច់ខាត៕
Tag:
ចូលឆ្នាំចិន
សាលារាជធានី
© រក្សាសិទ្ធិដោយ thmeythmey.com
«ទាយជ្ជទាន»មានន័យដូចម្តេច?
1 សប្តាហ៍
